Ong Mobais nok Kotubuꞌ-tubuꞌ
3
Popondoman nu ong mga sukuꞌ nog jomaa diyon nok sumboy mokpobabaꞌ bu tumombaꞌ ilon song mga mikkounutan bug mga taga kopatut song mga bonuwa.
Sumboy ilon togama sog bisan olo nong mobais nog ginang.
2 Tintuluan nu ilon nok sumboy diꞌ ilon moktaluꞌ nong molaat pasal bisan sima towoy,
bu moghalliꞌ ilon sok suwalan.
Sugaid sumboy mokpohatul,
bu mobabaꞌ og goyitan nilon sog lam nok tow.
3 Poꞌ ita sooy tagnaꞌ,
og dupangon ita da sop bu dinumugtul ita.
Misuwoy ita sog dalan nong mologdong,
bu kiduhulan ita song miglologinis nok konapsuhan nong migbayaꞌ dinita.
Ok kotubuꞌ ta miponuꞌ nok kolaatan bu koimahan.
Dinumutan ita nong mga tow,
bu migdumut ita da sop dinilon.
4 Tibuwa minatong og waktu nok pitongow nok Tuhan,
ong Mogogawon dinita,
og lasa bug kohatulin dinita.
5 Inawonin ita,
tibuwa kanaꞌ pasal song mga mologdong nog ininang ta,
tibuwa pasal sog lolatin.
Inawonin ita biyan sok pogugasin nong mga dusa ta,
bu binogoyanin ita nog bogu kotubuꞌ biyan sog Ruh Mahasutsi.
6 Og Ruh nin kini,
binogoyin dinita mamaꞌ hantang nok tubig nok tinuyungin dinita biyan ni Isa Al-Masih,
ong Mogogawon dinita.
7 Dadi tidu sok kolasa-kololat nok Tuhan,
initungin ita nong mologdong,
bu kiongonan ita nok pogdodama nok kopusakaanin ita nok kotubuꞌ solama-lama.
8 Na kopongandolan og lam nong mitaluꞌ u koyon.
Dadi kolegan ku nok tintuluꞌ nu sop sog duma,
bagun ok sosuku nok tinumombaꞌ kituꞌ sok Tuhan,
mogmuhut-muhut moginang nong mobais.
Poꞌ mobais og lam niyon bu mokotabang song mga tow.
9 Tibuwa sumboy hallian nu og daꞌdun kopologunahan nok pogdodaawa,
gusulan pangkat-momangkat bu mga suwalan pasal sok saraꞌ agama.
Mga ginang koyon daꞌdun da og jatu nin,
bu daꞌdun malap ta dun.
10 Bilaꞌ ongon ok tow moimung nok sabapan nok poksuwoy-suwoy niyu,
sumboy pituwahan nu insan atawa duwaꞌ kali.
Na bilaꞌ diꞌ pa yanin tumombaꞌ,
potiyangoy nu na.
11 Poꞌ kiosunan ta na nong maꞌ niyon nok tow sinumuwoy sog dalan mologdong.
Mikodusa yanin,
dadi motampal nog dait yanin hukuman.
Og ginawa nin da ong motaksilin.
Ok Pomilin
12 Pangoyon ku diyon dinika si Artimas atawa si Tikikus.
Pogdatong nog bisan sima dinilon,
pogmuhut-muhuta mangoy dinakon song Nikopolis,
poꞌ misolobuk ok pikilan ku nog dituꞌ u pokpobiyan nok ponigdow.
13 Pogmuhut-muhutan nu tabangan si Senas,
og abugadu,
bu si Apollosa sok panow nilon.
Tantu nu nog diꞌ ilon kotipotan sok kogunahan nilon.
14 Sumboy sop ong mga pigilugan ta mokpotugos moginang nong mobais bagun mokotabang ilon sok kulang-kabus nong mga duma nilon.
Dadi ongon ok kopolosuddahan nok kotubuꞌ nilon.
15 Og lam nog dunutu dini miksalam-duwaa dinika.
Salam nu ong mga molasa dinami sok kotombaꞌ.
Bung mayan modiyon diniyu ok kolasa-kololat nok Tuhan.
Wassalam