Pituwa paali song mga Balu Libun bug Migmokogulang
5
Diꞌ nu pogboluanan ong mga mokogulang laki,
sugaid pologdongan nu ilon pituwahan mamaꞌ hantang nog gommaꞌ nu.
Bu ong mga laki mokobataꞌ pa,
niyat nu ilon nog gilug nu bilaꞌ pituwahan nu.
2 Domikkiyan da sop ong mga mokogulang libun,
niyat nu nog ginaꞌ nu,
bu ong mga mokobataꞌ sop nok kolibunan,
niyat nu ilon nog gilug dunut mosutsi nok pikilan nu.
3 Tabangoy bu pogaddatoy nu ong mga balu libun nog daꞌdun na ok tumabang dinilon.
4 Sugaid bilaꞌ solobuk balu libun ongon og bataꞌ in atawa gapuꞌ in,
na sumboy ilon posunan nog winajib dinilon nok Tuhan mokotumbas mogipat song mga mokogulang nilon.
Poꞌ yonin koyon ok kosulutan nok Tuhan.
5 Og balu libun nog daꞌdun na ok tumabang diyanin,
pongandolin na sok Tuhan og lam nituꞌ,
bu podayunonin ok poksumba bu pongoni-ngoni nin gobi-gondow sok Tuhan.
6 Tibuwa og balu libun nong migbayaꞌ mokpoduhul nong napsu nin sog dunya,
mamaꞌ hantang patoy na yanin bisan totubuꞌ pa.
7 Posampoy nu ong mga pimilin ku kini song mga moktotombaꞌ bagun unuton nilon supaya daꞌdun ong mosallaꞌ dinilon.
8 Na bilaꞌ ongon dinilon og diꞌ mogipat song mga lahasiyaꞌ in,
labi na sok kodumahanin sog baloy,
na tinolikudanin ok kotombaꞌ in,
bu labi pa yanin kolaat tidu song mga kanaꞌ moktotombaꞌ.
9 Ong mga sunuon sok tumpukan nong mga balu libun nok tabangan,
sumboy mogumul na nong nom puluꞌ tahun bu minunung tagnaꞌ sog laki nilon.
10 Sumboy mibantug ilon sabap song mga ginang nilon nong mokobais mamaꞌ na nok kopogoyit nog gumbataꞌ nilon,
bu mohurmat song mga tow nong mongumbaloy dinilon.
Mibantug da sop ilon koyon sabap sok pibabaꞌ nilon og ginawa-baran nilon sok kopogusibaꞌ nong mga moktotombaꞌ bisan sok kopogugas nog botis nilona,
tinabangan nilon ong mga kisigpitan,
bu pitattap nilon og ginawa-baran nilon sog lam nog ginang mokobais.
11 Tibuwa ong mga balu libun nong mokobataꞌ sumboy diꞌ niyu sunuon sok tumpukan nong mga balu libun nok sumboy tabangan.
Poꞌ bilaꞌ matong og leg nilon moglaki mokpuliꞌ,
sunoy kolukatan na nilon og janjiꞌ nilon sog Al-Masih nong moginang ilon hadja para diyanin.b
12 Dadi hukumon ilon poꞌ dinugtul nilon og janjiꞌ nilon tagnaꞌ.
13 Bu len pa diyon,
sunoy kolayaman nilon mokkololaꞌ moginang bu moglinsuwaan song mga gumbaloyan monglibak bu mongampuan sok kotubuꞌ nog len tow.
Bu moksuksug ilon nong mga kanaꞌ patut taluon.
14 Saan na miktaluꞌ u nog golom pa moglaki puliꞌ ong mga balu libun nong mokobataꞌ pa,
bangka pogbataꞌ bu moktogikul sog diyalom baloy nilon.
Dadi diꞌ nilon kobogoyan nog waktu ong mga banta ta mokopoktaluꞌ nong molaton.
15 Mikopoktaluꞌ u nong maꞌ niyon poꞌ ongon na song mga balu libun nong mobataꞌ pa ong mikosimoy bu migunut na sog Iblis.
16 Na bilaꞌ soupama ongon ong mga libun moktotombaꞌ nok taga lahasiyaꞌ nog balu libun,
sumboy nilon tabangan.
Diꞌ nilon pobogatan ong mga moktotombaꞌ nog len mokpotubuꞌ dun,
bagun sop ong mga moktotombaꞌ nog len mokotabang song mga balu libun nog daꞌdun muwal ong mokotabang dun.
17 Pasal song mga migmokogulang sog jomaa nong mobais ok kopogoyit nilon,
sumboy pogaddatan bu niyaton niyu nok patut ilon tumbasan nok kulang-kabus nilon,
lubaꞌ na ong mga miktiksaꞌ kituꞌ mongnasihat bu monintuluꞌ.
18 Poꞌ tinaluꞌ sok Kitab,
“Ondiꞌ niyu bogbodon og babaꞌ nok kolabow soliyanin moginang bagun mokokan yanin.”c
Bu tinaluꞌ da sop,
“Ong mga mogoginang patut na dodaꞌ tindanan.”d
19 Diꞌ nu malingon ok sumbungan pasal sok solobuk migmokogulang,
luwal dona bilaꞌ kosaksian nog duwaꞌ atawa tolu kotow.
20 Ong mga migmokogulang nog diꞌ lumotaꞌ mokponginang nog dusa,
sumboy pogbinaan sog jomaa ta bagun og duma kopodinsamaan.
21 Suguon ku ika sog gadapan nok Tuhan bu ni Isa Al-Masih sampoy song mga mipiliꞌ in nong malaikat nok tombaan nu ong mga pimituwa u dinika nog daꞌdun ok polabihon nu,
sugaid pogbatuk-batuk nu og lam nok tow.
22 Diꞌ a mogdaliꞌ-daliꞌ momiliꞌ nong migmokogulang sog jomaa ta niyu.
Bu diꞌ a mongampuan sok kodusahan nog duma.
Potattap nu og ginawa-baran nu sok kosutsihan.
23 Kanaꞌ hadja tubig ok poginumon nu,
sugaid inuma sop nok tubig anggule mikaꞌ-mikaan pogbulung nu sok tiyan nu bu song mga mosakit nu koyon nong mokpuliꞌ-puliꞌ.