Pasal song mga Gulipon
6
Na og lam nong moktotombaꞌ kituꞌ nog inulipon,
sumboy niyaton nilon nok patut pogaddatan og gamu nilon sog lam nituꞌ,
bagun diꞌ ilon mokobogoy nok kosipogan song ngalan nok Tuhan bu sok tintuluanin.
2 Sima-sima ok taga gamu nong moktotombaꞌ da sop,
sumboy diꞌ nilon kulangan ok pogaddat nilon dun sabap hadja sok kopogilug nilon sok kotombaꞌ.
Tibuwa sumboy moktolagad mahatul ong mga gulipon koyon song mga gamu nilon.
Poꞌ ong mokohampit nok tiksaꞌ nilon ong mga gamu nilon nok kolasahan bu moktotombaꞌ da sop.
Ponintuluꞌ nu mahatul ong mga pinaluꞌ u kini,
bu onggat nu ong mga moktotombaꞌ mogunut dun.
Pasal sok Ponintuluꞌ nog Loput bu ong Motud nok Kopogdaya
3 Ongon ong monintuluꞌ nok kanaꞌ motud bu ondaꞌ pogunut song mobais nok pinaluꞌ nok Panghuꞌ ta niyu Isa Al-Masih,
bu ondaꞌ da sop kotontul sok poktuhan.
4 Na ong maꞌ niyon nok tow,
piotasin hadja og ginawa nin bu kulang ok ponabutin.
Mitagi na yanin sok kopoglugat bug kopoksuwal pasal song mga taluꞌ-monaluꞌ.
Bu yonin koyon ong mokoyit nok kopogima,
kopogbanta,
pokkulibot bug kopongintom nok sumolap.
5 Ok kodoksuanin,
daꞌdun og lotaꞌ nok kopoksuwal nong maꞌ niyon nong mga tow,
molikoꞌ na ok pomikilan nilon,
bu tinolikudan nilon ok kosobonnalan.
Inimung nilon nog gusaha ok ponintuluꞌ nilon pasal sok kotombaꞌ bagun mokountung ilon dun.
6 Song motudin,
ong mosobonnal nok poktuhan,
mosolag og guntungin,
basta lolayun ta suaton og bisan olo ok kobotang-botang ta.
7 Poꞌ miongon ita sog dunya nog daꞌdun goyit ta,
bu daꞌdun da sop ong moyit ta bilaꞌ matoy ita na.
8 Dadi bilaꞌ ongon ok kan bug ponapot ta,
sumboy ita moksarang-sukul.
9 Sugaid ong mga tow nong meleg mogdaya,
ok koposunguan nilon mosassat.
Koikotan ilon nong napsu nilon,
bu koduhulan ilon nong mokomula nog daꞌdun og guna nin.
Na yonin koyon ong mokoyit nong mga tow sok kolugian bu kosiksaan.
10 Poꞌ ong napsu sok sin,
ok pun nog lam nok kolaatan,
bu sabap niyon,
tinumolikud na og duma sok kotombaꞌ nilon,
bu misugat ilon nok kosusahan.
Ok Pituwa ni Pol diyon ni Timuti
11 Sugaid ika,
Timuti,
ok sosuguon nok Tuhan,
pokpolayuꞌ a sog lam nong milabitu sok tas.
Pogmuhut-muhutan nu ok kologdongan,
ok kopoktuhan,
kopoktombaꞌ,
kopoglasa,
kopoksandal bug molunuk nok pongatoyan.
12 Mopononggiꞌ sok pololumbaꞌ,
pomologboga tokodoy sok kotombaꞌ ta!
Poꞌ saan inonggata nok Tuhan bagun ka koongonan nok kotubuꞌ solama-lama,
bu sok sunguan nong modakol nok tow inangkon nu nok tinumombaꞌ a dodaꞌ ni Isa.
13 Na sok ponontong nok Tuhan ong migbogoy nok kotubuꞌ sog lam nituꞌ,
bu ni Isa Al-Masih ong miksuksug nok sobonnal sog gadapan ni Gubernur Pontus Pilatu,a
ongon ok pituwahon ku dinika,
14 potattap nu ok sinuguꞌ dinika bagun daꞌdun ong mosallaꞌ dinika toktob sok pogdatong nok Panghuꞌ ta Isa Al-Masih.
15 Na ok pokpuliꞌ in koyon,
matong sog waktu nog ginantaꞌ nok Tuhan,
ok solobuk-lobuk Mokowasa bu patut pudjihon,
ok Sultanb nong motas sog lam nok sultan,
bu ok Pogbayaꞌ-bayaꞌ nong motas sok kotanan nong mogbayaꞌ.
16 Yanin da og daꞌdun ok kodoksuanin.
Migonong yanin sok sahaya nog diꞌ kopolanihan
bu daꞌdun pa sibon ong manusiyaꞌ mikotongow atawa mokotongow dun.
Yanin ok patut bantugon solama-lama bu daꞌdun ok kodoksuan nok kowasa nin.
Amin.
17 Dadi pasal song mga dayahan dini sog dunya,
suguꞌ nu ilon nog diꞌ mogabbu bu diꞌ mongandol sok pongartaꞌ nong miyan hadja dinilon.
Sugaid sumboy mongandol ilon sok Tuhan nog yanin ong migbogoy nog lam nituꞌ bagun ita mogloliyag.
18 Suguꞌ nu ilon gamiton ok pongartaꞌ nilon sok kobaisan bagun ilon mokkodayahan song mobais nog ginang,
molitabangoy bu mokpomogoy.
19 Dadi mamaꞌ nong mokopoktaguꞌ ilon nok pongartaꞌ nilon sok Tuhan,
maꞌ nong mopagon nok pokpasokan sog ahirat para sok kotubuꞌ nong mosannang,
yonin koyon ong motud nok kotubuꞌ.
20 Dadi Timuti,
bologbogoy nu tokodoy ok ponintuluꞌ nog inuwakil dinika.
Hallioy nu ok taluꞌ nok kododunyahoy nog diꞌ mosulut sok Tuhan bu ok poglugat nog daꞌdun ok kopologunahanin.
Og duma inangkon nilon ok kokosun koyon,
sugaid kanaꞌ motud.
21 Na sabap sok kodupangan koyon,
tinolikudan na nog len nok tow ok kotombaꞌ nilon sok kosobonnalan.
Bung mayan modiyon dinika ok kolasa-kololat nok Tuhan.
Wassalam