Ok Pokposun
pasal sog Ikoduwaꞌ Sulat ni Pol song mga Moktotombaꞌ sok Tesalonika
Mga pigilugan,
Salam diniyu kotanan.
Sok ponabut nong mga mokokosun, og ikoduwaꞌ sulat ni Pol posunguꞌ song mga moktotombaꞌ sok Tesalonika nok posunguꞌ niyu na bastahon kini, misulat mga sanu bulan pogdoksuꞌ nog ikosolobuk sulat ni Pol dinilon.
Muna-muna pibaisan ni Pol ok pongatoyan nilon nog bisan mibinsanaꞌ ilon sog waktu nituꞌ, duhulan da ilon nok Tuhan nok kosannangan sog gondow binayaꞌ.
Sok sulat ni Pol kini, motampal nog ongon ong mga tow sog jomaa nilon nong mioyit sok taluꞌ nong miniyan na dow ok kopokpuliꞌ ni Panghuꞌ Isa Al-Masih dini, saan na misasow ok pikilan nilon. Dadi pitampal ni Pol dinilon nok kanaꞌ koyon motud. Poꞌ sog daꞌ pa koyon pokobiyan, moongon ong mosolag nok kopongatu nok towanan sok Tuhan, bu tumuwaꞌ pa ok tow landuꞌ baldusa nong mokpotas nog ginawa nin mangkon nog yanin dow ok Tuhan.
Tinaluan ni Pol ong mga moktotombaꞌ nok pingoni-ngonihanin ilon, bu sinuguꞌ in nong mongoni-ngoni da sop ong mga moktotombaꞌ diyon para dinilon. Mimilin pa yanin dinilon nog diꞌ ilon moglolaꞌ-lolaꞌ mogusaha bu popagason pa nilon ok kotombaꞌ nilon.
Bung mayan tonduan ita niyu pa nok Tuhan biyan sok sulat kini, bu oyitonin ita niyu sog dalan nok posunguꞌ sok surgaꞌ.
Wassalam