Ok Pokposun
pasal sog Ikosolobuk Sulat ni Pol song mga Moktotombaꞌ sok Tesalonika
Mga pigilugan,
Salam diniyu kotanan.
Ok sulat nok posunguꞌ niyu bastahon kini, sinulat ni Pol dangan posunguꞌ na mga 20 tahun mipuwas ni Isa Al-Masih motubuꞌ puliꞌ bu muliꞌ sok surgaꞌ. Tagnaꞌ mimologbog tokodoy si Pol sog agama nong mga Yahudi bu sinumaggaꞌ song mga moktotombaꞌ ni Panghuꞌ Isa Al-Masih. Sugaid miimung da sop yanin nong moktotombaꞌ sog Al-Masih. Sog waktu koyon, Sol ong ngalanin (Kitab Injil, Mga Ginang 9:1-19). Pogbiyan nok sanu tahun piangoy yanin nok Tuhan song mga kobonuwahan mokposampoy nong Mobais nok Suksugan nog ongon na ok pogawon biyan ni Isa Al-Masih.
Sog ikoduwaꞌ panow ni Pol mokposampoy, ok kodumahanin siloꞌ Silas bug Timuti. Sog waktu nituꞌ mikposampoy ilon nong Mobais nok Suksugan song mga tow sok solobuk siyudad sok probinsiya nong Makedonya, yonin na og bonuwa Grik ningkomun. Ong ngalan nok siyudad koyon Tesalonika bu molani sok siyudad Pilipi. Minsan sooy ondaꞌ siloꞌ Pol kobon mogonong dituꞌ, modakol nok towanan ong minginongog nok pognasihat nilon bu tinumombaꞌ ilon sok Tuhan nok piangoyin dini si Panghuꞌ Isa Al-Masih nog yanin ong Mogogawon dinilon. Tibuwa, ongon og duma tow Yahudi nok sinumaggaꞌ sok pokposampoy ni Pol koyon nong miktidu sok Tuhan. Inoyit da sop nong mga sinumaggaꞌ kituꞌ og duma tow sok Tesalonika boyaan misasow na (Kitab Injil, Mga Ginang 17:1-9). Dadi minawaꞌ siloꞌ Pol sog bonuwa koyon.
Pogobon-obon, misasow ok pikilan ni Pol pasal song mga moktotombaꞌ sog Al-Masih dituꞌ sok Tesalonika. Poꞌ onsunoy mosassat ilon boyaan kotolikudan nilon na ok Tuhan. Dadi pipuliꞌ ni Pol si Timuti posunguꞌ sok Tesalonika mangoy tumontong bug olo na ok kobotang-botang nong mga moktotombaꞌ sog Al-Masih dituꞌ.
Dangan mikpuliꞌ si Timuti, miksuksug yanin nong mopagon da ok kotombaꞌ nong mga mogogunut ni Isa Al-Masih sok Tesalonika. Dadi landuꞌ kosolag ok poksukul ni Pol sok Tuhan pasal sok kotombaꞌ bug kolasa nilon. Tubus pinoyitin ok sulatin kini dituꞌ mga duwaꞌ puluꞌ tahun pokpuliꞌ ni Panghuꞌ Isa sok surgaꞌ. Mimituwa yanin bug mikpobais yanin nok pongatoyan nong mga moktotombaꞌ. Tinaluꞌ in dinilon nok sumboy mongandol ilon sok Tuhan, minsan sooy kologonan ilon. Tinonduꞌ in da sop dinilon ong mokobiyan sok kopokpuliꞌ ni Panghuꞌ Isa sog dunya.
Bung mayan tonduan ita niyu pa nok Tuhan biyan sok sulat kini, bu oyitonin ita niyu sog dalan nok posunguꞌ sok surgaꞌ.
Wassalam