Ok Pokposun
pasal sok Sulat ni Pol song mga Moktotombaꞌ sok Kolosas
Mga pigilugan,
Salam diniyu kotanan.
Ok sulat kini nok posunguꞌ niyu bastahon, sinulat ni Pol mga 30 tahun na doksuꞌ ni Isa Al-Masih motubuꞌ puliꞌ bu mokpuliꞌ sok surgaꞌ. Tagnaꞌ mimologbog tokodoy si Pol sog agama Yahudi, bu sinumaggaꞌ yanin song mga moktotombaꞌ ni Isa Al-Masih. Sugaid miimung da sop yanin nong moktotombaꞌ sog Al-Masih. Sog waktu koyon, Sol ong ngalanin (Kitab Injil, Mga Ginang 9:1-19). Pogbiyan nok sanu tahun piangoy yanin nok Tuhan mokposaplag nong Mobais nok Suksugan pasal sog Al-Masih song mga kobonuwahan. Sog waktu nok sinulat ni Pol kini, mipirisu yanin pasal sok pokposampoyin dun.
Og lungsud nok Kolosas kini, misakup na nok Turki ningkomun. Daꞌ kotampal nong mikangoy sibon si Pol sok Kolosas, sugaid modakol diyon ong mikokilala diyanin.
Miktonduꞌ si Pol dini nok si Panghuꞌ Isa og bayuꞌ-bayuꞌ nok Tuhan. Mikampuꞌ yanin sok pogimung nog dunya bu sok pogipat dun, bu yanin ong moglokounutan sog ummat nok Tuhan, nog yonin na ok tumpukan nong mga sukuꞌ in. Piangoy yanin dini bagun matoy para mopuwas ita song mga dusa ta bu bagun dagonin ok kolaatan. Dadi sumboy ta kolingowan ok kolegan ta bu polabihon ok kolegan nok Tuhan, bu pohatulan ta ong mga kodumahan ta. Miktonduꞌ sop si Pol nok sumboy dumait sok kotombaꞌ og gaddat bug tobiat nong mga mogogunut sok Tuhan.
Bung mayan tonduan ita niyu nok Tuhan sok pogbasta ta nini, bu potontulonin ita niyu sog dalan nok posunguꞌ sok surgaꞌ.
Wassalam