Ok Sulat ni Pol song mga Moktotombaꞌ sok
KOLOSAS
1
1-2 Salam-duwaa diniyu mga sinutsi nok sukuꞌ nog Al-Masih sok Kolosas,
ong mga kopongandolan nok koilugan ta biyan diyanin.
Tidu kini dinakon,
si Pol,
ong mokpoposampoy nog Al-Masih biyan sok kolegan nok Tuhan,
bu si Timuti,
og gilug ta.
Bung mayan modiyon diniyu ok kolasa-kololat bug kosannangan nok tidu sok Tuhan og Gommaꞌ ta niyu.
Ok Poksarang-sukul bug Pongoni-ngoni
3 Kada pongoni-ngoni nami diniyu,
lolayun ami moksarang-sukul sok Tuhan,
og Gommaꞌ nok Panghuꞌ ta niyu Isa Al-Masih.
4 Miksarang-sukul ami poꞌ midongog nami nok tinumombaꞌ amu na ni Isa Al-Masih,
bu linumasa amu na sog lam nok sukuꞌ in.
5 Poꞌ mingandol amu sog janjiꞌ kituꞌ nok tinogama diniyu nok Tuhan dituꞌ sok surgaꞌ.
Miongon ok kopongandol niyu koyon tidu sok kodongog niyu nong Mobais nok Suksugan pasal sog Al-Masih nog yonin na ok taluꞌ nok kosobonnalan.
6 Ong Mobais nok Suksugan kini mikanat sog liwag nog dunya.
Saan na modakol ok towanan ok tinumombaꞌ dun,
bu mipinda ok kotubuꞌ nilon,
mamaꞌ nong miinang diniyu dangan misabut bu tinolimaꞌ niyu ok kosobonnalan pasal sok kolasa-kololat nok Tuhan.
7 Kiosunan niyu ong Mobais nok Suksugan kini tidu ni Epaprasa,
ok kolasahan nog duma nami,
bu ok kopongandolan sosuguon nog Al-Masih bagun monintuluꞌ diniyu gantiꞌ dinami.
8 Bu yanin da sop ong miksuksug dinami pasal sog lasa niyu tidu sog Ruh nok Tuhan.
9 Saan na tidu sok kodongog nami pasal diniyu,
sigi-sigi nami amu pongoni-ngonihan.
Pingoni nami lolayun sok Tuhan nog bogoyanin amu nok ponabut pasal sok koleganin biyan sog Ruh nin bagun kosunan niyu tokodoy.
10 Dadi bung mayan moinang niyu sog lam nog olo-olo og dumait sok tow nok sinumolobuk sok Panghuꞌ bug mosulut diyanin.
Mura-murahan mogbunga ok kotombaꞌ niyu sog lam nog ginisan nok kobaisan nok ponginangon niyu,
bu mogdungag ok pogilala niyu sok Tuhan.
11 Bung mayan bogoyan amu da nok pagas nok Tuhan tidu sok kotas nok kowasa nin,
bagun niyu kotiggolan bu kosabaran og olo-olo nok kosigpitan dunut loliyag.
12 Bung mayan moksarang-sukul amu sog Gommaꞌ Tuhan nog inimungin amu nog dait song mosahaya nok pigbayaanin bagun kobahagian amu nok pusakaꞌ nok tinogama nin song mga tow nong misukuꞌ in.
13 Inawonin ita tidu sok pogbayaꞌ nog Iblis bangka nin ita pindahoy sok pogbayaꞌ nog Bataꞌ in nok kolasahanin.
14 Pasal sok kosolobuk ta sog Bataꞌ in,
mipuwas ita tidu sok kosiksaan nong mga dusa ta.
Dadi miampun ita na.
Ok Kotas nog Al-Masih
15 Yanin og bayuꞌ-bayuꞌ nok Tuhan nog diꞌ motongow,
og Bataꞌ nok Tuhan og asal na ongon sog daꞌ pa koongon og lam nituꞌ,
bu motas yanin sog lam nok piongon.
16 Poꞌ biyan diyanin,
inimung og lam sog langit bug lupaꞌ,
ong motongow bug diꞌ motongow,
ong mga mokowasa,
mogbayaꞌ bu mga moglokounutan.
Og lam nituꞌ,
inimung biyan diyanin bu para diyanin.
17 Asal na yanin ongon sog daꞌ pa imungoy ok kotanan,
bu sog diyalom kongkomanin og lam nituꞌ,
dadi migusoy-usoy ok pogbotang dun.
18 Yanin ong mamaꞌ sopantun gulu nog ummatin nong mopononggiꞌ sog lawasin.
Yanin ok ponognaan nok kotanan,
bu yanin ong mikuna motubuꞌ tidu song mga minatoy bagun motampal nog yanin ong motas tidu sok kotanan.
19 Poꞌ kolegan nok Tuhan,
motongow ok kojukupanin diyon sog Bataꞌ in,
dadi og lam nog diyon diyanin,
diyon da sop sog Bataꞌ in.
20 Ok koleganin nog biyan sog Bataꞌ in moposulut diyanin og lam nog diyon sog langit bu sog lupaꞌ.
Miinang kini biyan sok kopoglillaꞌ nog Bataꞌ in og duguꞌ in nog linumuwas dangan minatoy yanin sok kayu.
21 Sok tagnaꞌ kituꞌ,
molayuꞌ amu pa sok kongkoman nok Tuhan,
bu binanta niyu yanin sabap sok pomikil bug mga ginang niyu nong molaat.
22 Sugaid ningkomun mipoksulutin amu diyanin biyan sok kopoglillaꞌ ni Al-Masih nog ginawa nin sok kopatoy bagun amu sutsi bu diꞌ kotuntutan sok ponontongin.
23 Tibuwa,
suboy niyu potattapon ok kopongandol niyu nong mopagon,
bu diꞌ niyu bolongon ok kosurgaan nog dinodamahan kituꞌ nok pisampoy diniyu biyan song Mobais nok Suksugan.
Milatag na sok kobonuwahan ok Suksugan kini nong midongog niyu,
bu akon si Pol,
kiwakilan da sop mokposampoy pasal nini.
Og Ginang ni Pol para sog Ummat nok Tuhan
24 Dadi bisan mibinsanaꞌ u ningkomun,
migloliyagu poꞌ ong mga kobinsanaan ku para da sok kobaisan niyu,
mga moktotombaꞌ sog Al-Masih.
Ok kobinsanaan ku kini gantaꞌ dungag hadja bagun mojukup ok kobinsanaan nog Al-Masih para sog lawasin nog yonin na og ummatin.
25 Inimungu nok Tuhan nok sosuguonin,
bu kiwakilanin akon mokposampoy nog lam nok Parmanin diniyu,
mga kanaꞌ Yahudi.
26 Song masa pa kituꞌ mibuni ok pisampoyu kini,
sugaid ningkomun pitampal na nok Tuhan song mga tow sukuꞌ in.
27 Poꞌ asal na ginantaꞌ nok Tuhan nok posampoyonin da bisan song mga tow nok kanaꞌ Yahudi og landuꞌ kohalgaꞌ bu kolingkat nong mibuni kini tagnaꞌ.
Ong mibuni kini,
yonin na si Isa Al-Masih nong modiyon sok pongatoyan ta niyu,
bu yanin og dinodamahan sok kosurgaan ta.
28 Dadi yanin ok pisampoy nami sok kotanan nok tow.
Pihalliꞌ bu tinintuluan nami ilon tidu sog lam nok kokosun nami,
bagun pasal sok poksolobuk nilon sog Al-Masih,
daꞌdun ong motuntut dinilon bilaꞌ madap ilon sok Tuhan.
29 Saan na pigmuhut-muhutan ku tokodoy inangon og lam nok sinuguꞌ dinakon nok Tuhan tidu sok kowasa nog Al-Masih nok tinumugu dinakon.