2
Kolegan ku nok kosunan niyu nong miktiksaꞌ u tokodoy para diniyu bu song mga tow sog bonuwa Laodikiya bu sog duma nong moktotombaꞌ nog ondaꞌ pa pokotongow dinakon.
2 Ininangu kini bagun moksipagas ok kotombaꞌ niyu kotanan biyan sok poksolobuk bu poglinasahoy niyu.
Miktiksaꞌ u bagun mosabut niyu tokodoy pasal song maksud nok Tuhan nong mibuni tagnaꞌ,
yonin na og Al-Masih.
3 Poꞌ diyon sog Al-Masih mobalak ta og landuꞌ kohalgaꞌ nok kokosun bug kopandoy nok Tuhan.
4 Sinuksugan ku amu nini bagun daꞌdun na ong mokoakkal diniyu bu diꞌ amu mooyit sok kanaꞌ motud bisan ponoy kobais ok ponaluon nilon.
5 Poꞌ bisan daꞌ u diyon diniyu,
lolayun amu sok pongatoyan ku,
bu migloliyagu nong moksulut-sulut amu bu mopagon ok kotombaꞌ niyu sog Al-Masih.
Og Bogu Kotubuꞌ nog Binogoy song mga Moktotombaꞌ
6 Dadi pagga tinolimaꞌ niyu si Isa Al-Masih ok Panghuꞌ niyu nog yanin ong migbayaꞌ diniyu,
potattap amu moksolobuk diyanin.
7 Sumboy pogamuton niyu bu popagonon niyu pa ok kotombaꞌ niyu dun,
mamaꞌ na nok tinintuluꞌ diniyu,
bu poglabi-labi niyu ok poksarang-sukul niyu diyanin.
8 Dadi hallioy niyu nog ondiꞌ amu koakkalan bu moulipon sok kokosun bu gaddat nong manusiyaꞌ nog daꞌdun guna nin.
Minintuluꞌ ilon nong mga poli-polihan kododunyahoy tagnaꞌ.
Kanaꞌ koyon miktidu sog Al-Masih.
9 Poꞌ diyon sog Al-Masih og lam nok kojukupan nok Tuhan bisan binataꞌ yanin nong manusiyaꞌ.
10 Bu pasal sok poksolobuk niyu sog Al-Masih mojukup amu da sop,
poꞌ yanin ong motas sok kotanan nok taga pogbayaꞌ bug kopatut.
11 Dadi pasal sok kosolobuk niyu sog Al-Masih,
mamaꞌ sopantun inislam amu bagun moimung amu nok sukuꞌ in.
Kanaꞌ nog inislam amu biyan sok komot mamaꞌ nok kolakihan,
sugaid biyan sok poksutsi nin diniyu bagun mobogu ok pongaddatan niyu.
12 Poꞌ ok pokpoliguꞌ diniyu,
mopononggiꞌ song mikubul amu da sop dunut sog Al-Masih.
Sugaid mitubuꞌ amu mokpuliꞌ dunut diyanin pasal sok kotombaꞌ niyu sok kowasa nok Tuhan nong mikpotubuꞌ ni Isa tidu sok kopatoy.
13 Sok tagnaꞌ kituꞌ,
mamaꞌ amu hantang nok patoy pasal sok pinginang niyu nok kodusahan,
bu ondaꞌ pa boguhoy ok pongatoyan niyu.
Sugaid ningkomun pidunut amu na nok Tuhan sok pokpotubuꞌ in puliꞌ ni Isa Al-Masih tidu sok kopatoy,
bu inampunin og lam nog dusa ta.
14 Hukumon ita bosiya nok Tuhan pasal sok kosaggaꞌ ta diyanin.
Tibuwa pinapasin og lam nok kodusahan ta biyan sok kolansang nog Al-Masih sok kayu,
dadi diꞌ ita na hukumon.
15 Bu biyan sok kopatoyin sok kayu,
dinagin ong mga taga kowasa bug mga soytan.
Mimondag yanin dinilon,
bu pisipogin dangan pitongowin sok kodakolan nog daꞌdun ong mokatu diyanin.
Ong mga Suguan nong Miktidu song Manusiyaꞌ
16 Dadi posagaran niyu na bilaꞌ ongon ong mga tow monghukum diniyu sog olo-olo nok kanon atawa ginumon niyu,
atawa pasal song mga pokoradjaan,
bogu bulan bug Gondow Pogogulali.
17 Poꞌ og lam niyon koyon og gindanan nog ongon ong matong.
Sugaid ong motudin,
minatong na yanin,
yonin na og Al-Masih nog diyon diyanin ok kosobonnalan.
18 Diꞌ niyu bolongon ok pahalaꞌ niyu biyan sok pogunut niyu song mga tow nong moktogol diniyu mokposakit sog ginawa-baran niyu bu moksumba sok komalaikatan.
Mogunut ilon dow song mokosobuꞌ-sobuꞌ nong mga toginop nilon.
Sugaid mogabbu tibuwa ilon,
bu ok ponintuluꞌ nilon miktidu sok pikilan manusiyaꞌ.
19 Poꞌ ok tow nong mamaꞌ dinilon miksibolong na sok Panghuꞌ nong mamaꞌ sopantun nog guluꞌ nog ummatin.
Tibuwa ita niyu kini,
og ummatin nong miitung nog lawasin,
timubuꞌ bu miksipagas pasal sok Tuhan,
mamaꞌ hantang nog lawas ta misolobuk pasal sok poksukpat-sukpat nong mga longlonguan bu mga kougatan ta.
20 Na pagga mamaꞌ amu na hantang minatoy dunut nog Al-Masih,
maana nin mipuwas amu na song mga pononduꞌ nok kododunyahoy.
Dadi diꞌ amu na sumboy mogunut song mga suguan mamaꞌ na nog long nilon,
21 “Naꞌ niyu onggaydan!”
“Diꞌ amu na minam dun.”
Bu,
“Diꞌ amu kumomol dun!”
22 Ong mga olo-olo nok pigondiꞌ koyon,
para sok pogamit hadja dini sog dunya,
bu diꞌ mobon mobolong da.
Miktidu ong mga suguan koyon song manusiyaꞌ.
23 Bilaꞌ pikil-pikilon ta,
mamaꞌ nong mosugat ok poksumbaꞌ nilon.
Sugaid ok pog-agama nilon ok pokpotongow-tongow da nok pokpobabaꞌ bu pokposakit sog ginawa-baran nok tidu hadja sok pikilan nilon.
Song motudin,
ong mga suguan koyon diꞌ tanan mokotabang song mga tow moktiggol nong napsu nilon.