Ok Pokposun
pasal sok Sulat ni Pol song mga Moktotombaꞌ sok Pilipi
Mga pigilugan,
Salam diniyu kotanan.
Ok sulat nok posunguꞌ niyu bastahon kini, sinulat ni Pol mga 25 tahun mipuwas ni Isa Al-Masih motubuꞌ puliꞌ bu muliꞌ sok surgaꞌ. Tagnaꞌ mimologbog tokodoy si Pol sog agama Yahudi bu sinumaggaꞌ song mga moktotombaꞌ ni Isa Al-Masih. Sugaid miimung da sop yanin nong moktotombaꞌ sog Al-Masih. Sog waktu koyon, Sol ong ngalanin (Kitab Injil, Mga Ginang 9:1-19).
Pogbiyan nok sanu tahun mikposampoy yanin pasal sog Al-Masih song mga bonuwa nog Bataꞌ-bataꞌ Asiya nong misakup sok Turki ningkomun. Doksuꞌ misaut sop yanin song mga bonuwa nog Grik bug ayin mibotang og lungsud nok Pilipi. Tibuwa ongon diyon ong mga sinumaggaꞌ sok pokposampoy ni Pol pasal ni Isa. Dadi misaggow yanin dunut nog duma nin bangka pirisuhoy (Kitab Injil, Mga Ginang 16:11-40). Tidu sog waktu koyon miongon og jomaa nong mga moktotombaꞌ sog Al-Masih sog bonuwa Pilipi.
Sog waktu nong miksulat si Pol nok sulat kini, solabu nin sog diyalom pirisuhan sog Rum. Tibuwa bisan maꞌ nituꞌ, yonin da og loliyag ni Pol pasal sok kogot nok pongandolin sok Tuhan. Sok sulat ni Pol kini pisampoyanin ong mga moktotombaꞌ sok Pilipi nong mga taluꞌ mokopobais nok pongatoyan nilon. Pongonihonin dinilon nok sumboy ilon mokpobabaꞌ nok pongatoyan nilon mamaꞌ ni Panghuꞌ Isa. Pipondom sop ni Pol dinilon nog initung nok Tuhan ong mga tow nong mologdong, kanaꞌ sabap sok pogunut nilon nong mga saraꞌ agama Yahudi, sugaid sabap sok pongandol nilon sog Al-Masih. Domikkiyan taluꞌ ni Pol ong mga tow nong miksolobuk sog Al-Masih bogoyan nok Tuhan nog loliyag bug kosannangan sog diyalom pongatoyan nilon.
Bung mayan tonduan ita niyu nok Tuhan sok pogbasta ta kini, bu oyitonin ita niyu sog dalan nok posunguꞌ sok surgaꞌ.
Wassalam