Ok Sulat ni Pol song mga Moktotombaꞌ sok
PILIPI
Salam song mga Moktotombaꞌ
1
Salam sog lam niyu sinutsi nok sukuꞌ ni Isa Al-Masih diyon sog bonuwa Pilipi sampoy song mga kounutan bug mga moktotolagad sog jomaa niyu.
Ami kini si Pol bug Timuti,
ong mga gulipon ni Isa Al-Masih.
2 Bung mayan modiyon diniyu ok kolasa-kololat bug kosannangan tidu sok Tuhan,
og Gommaꞌ ta niyu bug Panghuꞌ Isa Al-Masih.
Ok Poksukul bug Pongoni-ngoni ni Pol
3 Moksukulu sok Tuhan kada mopondomu og lam niyu,
4 bu tattap ok pongoni-ngoni u para diniyu dunut loliyag,
5 poꞌ tidu sog waktu nok tinumombaꞌ amu sampoy ningkomun,
poktabangan niyu ami sok pokposampoy nong Mobais nok Suksugan pasal sog Al-Masih.
6 Mitantu u nog ok Tuhan ong miktagnaꞌ nong mobais nog ginang diyon diniyu,
podayunonin pa toktob mojukup sog gondow nok pokpuliꞌ ni Isa Al-Masih.
7 Daitan dodaꞌ nong maꞌ nini ok pikilan ku pasal sog lam niyu poꞌ lolayun amu sog diyalom pongatoyan ku.
Misunuꞌ amu da sop saan sok kolasa-kololat nok Tuhan dinakon minsan sooy maꞌ nini ok kobotang-botangu dini sok pirisuhan bu sok pomologbog bug poksobonnalu nong Mobais nok Suksugan.
8 Tuhan ok saksiꞌ u bug ponoy og gindowan ku diniyu dunut lasa nong miktidu ni Isa Al-Masih.
9 Pongoni-ngonihon ku sok Tuhan nong moksisolag da og lasa niyu,
bu moksidalom ok kokosun bug ponabut niyu,
10 bagun mopiliꞌ niyu ok kinobaisan,
bu bagun mosutsi amu bu diꞌ kotuntutan toktob sog gondow nok pokpuliꞌ nog Al-Masih.
11 Bung mayan biyan sok poktabang ni Isa mamaꞌ amu nog bunga kayu nong mosongkuꞌ,
moglabi-labi ong mga ginang niyu nong mologdong bu potason bu pudjihon ok Tuhan dun.
Ok Kopirisu ni Pol Mikobogoy nok Kobaisan
12 Mga pigilugan ku,
kolegan ku nok kosunan niyu nog ok kibiyan-biyanan ku kini,
mikotabang dodaꞌ mokposaplag nong Mobais nok Suksugan.
13 Saan na kiosunan nog lam nong mogogipat nog gastanaꞌ bu modakol pa nong mga duma nog ok pogunutu sog Al-Masih ok sabapan nong mipirisu u.
14 Bu sok pokpirisu dinakon,
miksipagas ok kotombaꞌ nok kodakolan nong mga pigilugan ta niyu ni Panghuꞌ Isa,
bu migdungag ok kotowakkal nilon mokposampoy nok Parman nok Tuhan nog daꞌdun og gondok nilon.
15 Ong mga duma mognasihat hadja nok pasal sog Al-Masih sabap sok pogdalu bug leg nilon mokpolabi,
sugaid og duma sabap song mobais nong maksud.
16 Ininang nilon koyon sabap sok kasi-lasa,
poꞌ kiosunan nilon nog winakilu nok Tuhan nog dini u ningkomun bagun ku momologbog song Mobais nok Suksugan.
17 Ong mga migdalu koyon nong milabitu,
mikposampoy ilon nok pasal sog Al-Masih bagun mokpotas nog ginawa-baran nilon.
Kanaꞌ koyon ikhlas dinilon,
sugaid bagun hadja mogbogoy dinakon nok kosasowan soliyan ku dini sok pirisuhan.
18 Tibuwa daꞌdun da koyon dinakon.
Migloliyagu da bisan olo ong maksud nilon sok pokposampoy,
ikhlas taꞌ atawa kanaꞌ,
basta mignasihat ilon nong motud pasal ni Isa.
Mokpodayun sop ok pogloliyagu dun.
19 Poꞌ kiosunan ku nong moawon ku biyan song mga pongoni-ngoni niyu bu sok tabang nog Ruh ni Isa Al-Masih.
20 Migdodama u tokodoy bu mingandolu nong momologbogu bagun ondiꞌ u kosipogan sok Tuhan.
Sugaid bung mayan lolayun pa mojukup ok kotowakkalu bisan song ningkomun kini bagun pudjihon og Al-Masih biyan dinakon bisan pa sok kotubuꞌ atawa kopatoy.
21 Poꞌ para dinakon,
ok kotubuꞌ u,
yonin na og Al-Masih,
bu ok kopatoy,
og guntungu.
22 Tibuwa bilaꞌ poyabaon ok kotubuꞌ u,
ong maana nin,
modakol pa ong moinangu nong mobais para sog Al-Masih.
Dadi bilaꞌ popilion ku,
diꞌ u na kosunan bug ayin ok kinobaisan.
23 Mobais dodaꞌ og duwaꞌ kini.
Ok kolegan ku mawaꞌ u na sog dunya bagun dituꞌ u na sog Al-Masih,
poꞌ yonin koyon ok kinobaisan.
24 Tibuwa mobais pa para diniyu nok totubuꞌ u pa.
25 Na mitantu u nog yonin na ok kolegan nok Tuhan,
saan dini u pa sog dunya bagun mogdungag pa ok kokosun bug loliyag niyu sok kotombaꞌ.
26 Dadi bilaꞌ mokpuliꞌ u na sop diyon diniyu,
moglabi na ok pokpotas niyu ni Isa Al-Masih pasal song mga miinangin dinakon.
27 Mogolo-olo sooy,
sumboy tattap og gaddat niyu dumait song Mobais nok Suksugan pasal sog Al-Masih.
Dadi bisan mokangoyu diyon atawa ondiꞌ,
modongogu da nong mopagon ok kopoksolobuk nok pongatoyan niyu,
bu mogmuhut-muhut amu bagun tumombaꞌ ong mga tow song Mobais nok Suksugan.
28 Diꞌ amu tokodoy mondok song mga simaggaꞌ diniyu.
Poꞌ bilaꞌ diꞌ amu mondok,
moimung koyon nog gindanan para dinilon tidu sok Tuhan nog amu og awonon,
tibuwa ilon ok siksaon.
29 Poꞌ dinuhul diniyu nok tinumombaꞌ amu sog Al-Masih,
bu kanaꞌ hadja koyon,
sugaid dinuhul da sop nong mobinsanaꞌ amu pasal sok kotombaꞌ niyu diyanin.
30 Dadi mikonanam amu da sop nok kobinsanaan pasal sok kotombaꞌ niyu sog Al-Masih,
mamaꞌ nong minanamu.
Mitongow niyu ok kobinsanaan ku song miniyana,
bu midongog niyu sampoy ningkomun mikonanamu pa dun.