Ok Pokposun
pasal sok Sulat ni Pol song mga Moktotombaꞌ sog Epesus
Mga pigilugan,
Salam diniyu kotanan.
Ok sulat ni Pol nok posunguꞌ niyu bastahon kini, sinulat mga 30 tahun mipuwas ni Isa Al-Masih motubuꞌ puliꞌ bu muliꞌ sok surgaꞌ. Sog waktu nok sinulatin kini, soliyan ni Pol mipirisu pasal sok pokposampoyin pasal ni Isa Al-Masih. Tagnaꞌ sinumaggaꞌ yanin song mga moktotombaꞌ ni Isa Al-Masih. Sugaid mikpotongow og Al-Masih ni Pol, bu kiwakilan yanin mokposampoy sog dalan nok pogawon biyan sok kopatoy nog Al-Masih. Sog waktu koyon, Sol ong ngalanin (Kitab Injil, Mga Ginang 9:1-19).
Sok kopanow niloꞌ Pol mokposampoy pasal dun, mikosaut ilon song mosolag nok siyudad nog Epesus, nong mibotang sok Turki ningkomun. Mikposampoy bu miginang diyon ong mga kodumahan ni Pol, bu mikpuliꞌ na sop yanin diyon mokposampoy sog bon nog 3 tahun. Ong mga tow diyon, milayam moksumba sok tuhan-tuhan nilon nok si Artemis. Dadi og duma dinilon milingit pagga mikposampoy si Pol nog daꞌdun ong mga tuhan-tuhan, bu diꞌ ilon dait sumbahon.
Ok pononduꞌ ni Pol, ok Tuhan da ok piktiduhan nok pogawon bu pasal sok kolasa-kololatin, moawon og lam nok tinumombaꞌ ni Isa Al-Masih. Saan na daꞌdun na ok pogbiddaan nong mga Yahudi bug kanaꞌ Yahudi, misolobuk ita niyu na bu tolimaon ta ong mga barakat nog binogoy nok Tuhan para song mga moktotombaꞌ. Pibatuk ni Pol og jomaa nong mga moktotombaꞌ sok solobuk lawas, bu og gulu yonin na og Al-Masih. Mipononggiꞌ in da sop og jomaa sok solobuk baloy bu og Al-Masih ok pagonin. Pitampal sop ni Pol song mga mogbasta pasal sog landuꞌ kosolag nok kolasa-kololat nok Tuhan song mga manusiyaꞌ. Ongon da sop dini ok ponintuluꞌ pasal sog laku-tobiat nog dumait song mga mogogunut sok Tuhan.
Bung mayan tonduan ita niyu nok Tuhan sok pogbasta ta nini, bu oyitonin ita niyu sog dalan nok posunguꞌ sok surgaꞌ.
Wassalam