Ok Sulat ni Pol song mga Moktotombaꞌ sog
EPESUS
1
Salam diniyu mga sinutsi nok sukuꞌ nok Tuhan,
amu ong mga moliunungoy nong mogogunut ni Isa Al-Masih sog Epesus.
Akon kini si Pol,
ong mokpoposampoy ni Isa Al-Masih tidu sok kolegan nok Tuhan.
2 Bung mayan modiyon diniyu ok kolasa-kololat bug kosannangan nok tidu sok Tuhan og Gommaꞌ taꞌ bug Panghuꞌ ta Isa Al-Masih.
Mobarakat ong Misolobuk sog Al-Masih
3 Pudjihon ta ok Tuhan,
og Gommaꞌ nok Panghuꞌ ta Isa Al-Masih!
Biyan sog Ruh nin binogoyin dinita og lam nog ginisan nog barakata dituꞌ sok surgaꞌ sabap sok kosolobuk ta sog Al-Masih
4 Poꞌ biyan sog Al-Masih piniliꞌ in ita niyu na sog daꞌ pa koongon og dunya bagun sutsi ita bu diꞌ kotuntutan sok ponontongin.
5 Pasal sog lasa nin ginantaꞌ in nog imungonin ita nog gumbataꞌ in biyan ni Isa Al-Masih,
poꞌ yonin kituꞌ ok kosuatanin.
6 Dadi pudjihon ta niyu ok Tuhan pasal sog landuꞌ kotas nok kolasa-kololatin nog binogoyin dinita biyan sog Bataꞌ in nok kolasahanin.
7 Pasal sok kosolobuk ta diyanin,
mipuwas ita tidu sok kosiksaan nong mga dusa ta,
poꞌ piglillaꞌ in og duguꞌ in dinita.
Dadi miampun na ong mga dusa ta mounut sog landuꞌ kosolag nok kolasa-kololat nok Tuhan.
8 Miglabi-labi ok kolasa-kololatin dinita niyu dunut nog lam nok kokosun bug ponabut nog binogoyin.
9 Piosunin dinita niyu ong mibuni kituꞌ tagnaꞌ nong maksudin,
bu si Isa Al-Masih ong moginang dun mounut sok koleganin.
10 Ong maksud nok Tuhan bilaꞌ matong og waktu nog ginantaꞌ in,
poksolobukonin sog diyaloman ni Isa Al-Masih og lam nog diyon sog langit bu sog lupaꞌ.
11 Piniliꞌ in ita bagun moimung nok piktowanin biyan sok kosolobuk ta ni Isa Al-Masih,
poꞌ kituꞌ na og ginantaꞌ in tidu sok koleganin bu mounut sok pogbayaꞌ in.
12 Ok koleganin nong mga mikuna tumombaꞌ sog Al-Masih mamaꞌ dinamib,
mokpudji bu mokpotas diyanin.
13 Bu misolobuk amu da sop diyon sog Al-Masih dangan midongog bu tinolimaꞌ niyu ok kosobonnalan pasal song Mobais nok Suksugan nong mokawon song manusiyaꞌ.
Dadi tinumombaꞌ amu bu binogoy nok Tuhan og Ruh nin nog jinanjiꞌ in diniyu,
og gindanan nok sukuꞌ in na amu.
14 Og Ruh Mahasutsi kini,
yonin na sop og gindanan nog bogoyon dinita nok Tuhan og lam nok kobaisan nog jinanjiꞌ in dinita sog ahirat.
Sog gondow binayaꞌ jukuponin ok poglokatin dinita biyan sog Al-Masih.
Dadi pudjihon ta ok kotasin.
Ok Pongoni-ngoni ni Pol
15 Na pasal diyon,
tidu sok kodongogu nok tinumombaꞌ amu na ni Panghuꞌ Isa,
bu linumasa amu na song mga sukuꞌ nok Tuhan,
16 daꞌdun na og lotaꞌ nok poksukulu sok Tuhan pasal diniyu.
Lolayun ku amu pongoni-ngonihan sok Tuhan,
17 ong Mokowasa nog Gommaꞌ nok Panghuꞌ ta Isa Al-Masih nok piotasin.
Bung mayan bogoyanin amu nok kokosun bu ponabut biyan sog Ruh nin bagun kilalahan niyu tokodoy yanin.
18 Pingoni-ngoni u nog bung mayan podolagonin da ok pongatoyan niyu bagun kosunan niyu og barakat nog dinodamahan sog lam nok tumabuk nok pogonggat nok Tuhan mampuꞌ sok kongkomanin.
Mura-murahan mosabut niyu bug ponoy kohalgaꞌ bug kotas og barakat nok pusakaꞌ nog jinanjiꞌ nok Tuhan song mga sukuꞌ in.
19 Bung mayan mosabut niyu nog daꞌdun og lumabi sog landuꞌ kosolag nok kowasa nok Tuhan para song mga mingandol diyanin.
20 Ok kowasa nin da sop koyon ong mikpotubuꞌ mokpuliꞌ diyon sog Al-Masih tidu sok kopatoy bangka pingkudoy sog dapit lintu nok Tuhan dituꞌ sok surgaꞌ.
21 Og Al-Masih og labi motas tidu sok kotanan nong mga taga pogbayaꞌ,
kopatut bug kowasa,
bu og gollalin motas pa tidu sog lam nong mga binogoyan nog gollal kanaꞌ hadja sog waktu kini,
sugaid sampoy sog ahirat.
22 Pibayaꞌ nog Gommaꞌ sog Al-Masih og lam nituꞌ,
bu kiwakilanin mamaꞌ sopantun nog gulu nog ummatin.
23 Bu ong mga moktotombaꞌ,
mamaꞌ ilon sopantun nog lawasin nong mokpotongow nok kojukupanin,
poꞌ yanin ong mogbogoy nok kojukupan sog lam nituꞌ.