Moktinabangoy ita
6
Dadi mga koilugan ku,
bilaꞌ ongon sog duma niyu nong mikodusa,
sumboy amu,
ong mga mipotontul sog Ruh nok Tuhan,
mokpopuliꞌ diyanin sog dalan mologdong.
Tibuwa,
inang niyu biyan sok kolunuk nok pongatoyan niyu,
bu pokpotubud amu bagun diꞌ amu da sop mosassat.
2 Poktinabangoy amu sog lam nog logon niyu,
poꞌ biyan diyon mounut niyu ok suguan nog Al-Masih.
3 Bilaꞌ ongon diniyu ong migniyat nog yanin motas bisan kanaꞌ sooy,
na linimbunganin og ginawa nin.
4 Dadi sumboy sosolokotow diniyu mogliling nog ginangin.
Bilaꞌ monanamin nong mobais ok pinginangin,
na mogloliyag yanin,
sugaid kanaꞌ mobais nok pogbatukonin og ginangin sog ginang nog duma nin.
5 Poꞌ ong monolokotow diniyu,
yanin da ong mongadap song mga olo-olo nog bogoyon diyanin inangon.
6 Amu koyon ok piktintuluan nok Parman nok Tuhan,
sumboy niyu bogoyan og guru niyu nog duma nog ridjikiꞌ nog ongon diniyu.
7-8 Diꞌ niyu limbungan og ginawa-baran niyu,
poꞌ ok Tuhan diꞌ mopodupang.
Bilaꞌ unuton nok tow ong napsu nin,
kosiksaan ong moalapin solama-lama,
sugaid bilaꞌ sop unutonin ok kolegan nog Ruh nok Tuhan,
na ong mosannang nok kotubuꞌ ong moalapin solama-lama.
Olo-olo ok pomulahon niyu,
yonin da sop og ganihon niyu.
9 Dadi ondiꞌ ita motonop moginang nok kobaisan poꞌ lomaꞌ-dinglag bogoyan ita nok tumbas basta diꞌ ita hadja motonop,
mamaꞌ nok tow nong mokoponggani basta mosabar yanin mogbagad toktob timpu ponggani.
10 Saan na mogimakat ita monginang nok kobaisan sog lam nok tow,
bu labi na song mga koilugan ta sok kotombaꞌ.
Ok Pomilin-milin
11 Tontong niyu bug ponoy kosolag ok sinulatu para diniyu nong mismu komotu simulat dun.
12 Ong mga tow nong moktogol diniyu nog islamon amu,
ok kolegan nilon kosuatan ilon nong mga Yahudi.
Mondok saan ilon binsanaon pasal sok ponintuluꞌ nok kopatoy da ni Panghuꞌ Isa sok kayu ong mokopogawon song manusiyaꞌ.
13 Poꞌ bisan ong mga inislam na kituꞌ,
ondaꞌ da pogunut sog lam nok saraꞌ ni Nabi Musa.
Tibuwa ok kolegan nilon nog islamon amu bagun mopobantug nilon pasal diniyu.
14 Sugaid para dinakon daꞌdun muwal og bantugon ku luwal sok kopatoy nok Panghuꞌ ta Isa Al-Masih sok kayu.
Poꞌ pasal nituꞌ daꞌdun na og halgaꞌ nog olo-olo dini sog dunya para dinakon,
bu daꞌdun da sop og halgaꞌ u para song mga tow nong mikpolabi nog olo-olo nituꞌ sog dunya.
15 Daꞌdun ok pogbiddaan nog inislam bu ondaꞌ islamoy.
Ong mohalgaꞌ sok Tuhan bilaꞌ tabukon nong mga manusiyaꞌ nong mopobogu nin ok kotubuꞌ nilon biyan sog Al-Masih.
16 Dadi bung mayan ok kosannangan bug kololat modiyon sok sosuku nok tow nong migunut sok kolegan nok Tuhan,
Yahudi taꞌ atawa kanaꞌ.
17 Tidu ningkomun,
naꞌ niyu na pogdungagan og logon ku,
poꞌ ongon na ong mga paliꞌ sog lawasu kini,
og gindanan nog gulipon ku ni Panghuꞌ Isa.
18 Na mga koilugan ku,
bung mayan modiyon sok pongatoyan niyu ok kolasa-kololat nok Panghuꞌ ta Isa Al-Masih.
Amin.
Wassalam