Moluhaya ita pasal sog Al-Masih
5
Pinuwas ita nog Al-Masih bagun moluhaya ita na.
Dadi pokpopagon amu,
bu diꞌ amu na mokpoulipon puliꞌ.
2 Akon kini si Pol,
inongogan niyu ok taluꞌ u kini:
Bilaꞌ islamon amu poꞌ pikilan niyu moawon amu dun,
na daꞌdun tokodoy ok kopologunahan nok kopatoy ni Panghuꞌ Isa para diniyu.
3 Pulian ku tumaluꞌ,
ok tow nong mogmuhut-muhut nok kosuatan ok Tuhan diyanin biyan sok kopogislam diyanin,
sumboy inangonin sop og lam nok suguan sok saraꞌ agama.
4 Poꞌ bilaꞌ mogmuhut-muhut amu moimung mologdong sok ponontong nok Tuhan biyan sok kopogunut niyu sok saraꞌ ni Nabi Musa,
limayuꞌ amu na tidu sog Al-Masih,
bu mibolong amu sok kolasa-kololat nok Tuhan.
5 Tibuwa ita nong misolobuk sog Al-Masih,
pigdodamahan ta nong moitung ita nok Tuhan mologdong biyan sok kopongandol ta bug kowasa nog Ruh nin.
6 Poꞌ bilaꞌ ita niyu sumolobuk sog Al-Masih,
daꞌdun na ok pogbiddaan nog inislam bu ondaꞌ islamoy.
Ong mohalgaꞌ,
ok kopongandol diyanin nong mopotongow biyan sog lasa sok kodumahan ta.
7 Tagnaꞌ mopagas ok pogunut niyu sog Al-Masih.
Sima na ong mikosaggaꞌ diniyu mogunut sok kosobonnalan?
8 Kanaꞌ da ok Tuhan poꞌ yanin tanan ong mongonggat diniyu posunguꞌ sok kosobonnalan.
9 Na ok poktonduꞌ nilon koyon nok kanaꞌ motud,
mikanat mamaꞌ sopantun nong mikaan nok posulig nog inampuꞌ sog inabdun bangka pokpokumbang sok kotanan.
10 Tibuwa mingandolu sok Tuhan nong moksolobuk amu song mga tinintuluꞌ u diniyu.
Sugaid ok tow nok sinumasow koyon diniyu bisan sima yanin,
siksaon da nok Tuhan.
11 Mga koilugan,
bilaꞌ soupama motud nong minintuluꞌ u pa nok sumboy islamon ong mga kolakihan bagun motolimaꞌ nok Tuhan,
daꞌdun da ok sabapan nong miubaꞌ ong mga Yahudi sok ponintuluꞌ u.
Sugaid minintuluꞌ u nong moawon ita pasal hadja sok poglansang ni Panghuꞌ Isa sok kayu para dinita,
saan na pigbinsanaꞌ nilon akon.
12 Na ong mga tow nong minasow sok pomikil niyu koyon,
bung mayan kanaꞌ hadja ilon mokpoislam,
sugaid mokpokapun ilon.a
13 Tibuwa amu mga koilugan,
inonggat amu nok Tuhan para sok koluhayahan bagun diꞌ amu na pogbayaan nok saraꞌ.
Sugaid bisan moluhaya amu na,
diꞌ amu mogimakat nok koluhayahan niyu monginang nok konapsuhan.
Tibuwa poglinasahoy bu poktinabangoy amu.
14 Poꞌ og lam nok suguan nok saraꞌ,
misolobuk sok suguan kini nog,
“Kolasahoy niyu ok kodumahan niyu mamaꞌ nog lasa niyu sog ginawa-baran niyu.”
15 Tibuwa,
bilaꞌ lolayun amu moksuwal,
pokpotubud amu poꞌ sunoy moglinaatoy amu.
Unuton niyu og Ruh nok Tuhan, kanaꞌ Ginawa-baran niyu
16 Sugaid taluon ku diniyu,
unut niyu ok kolegan nog Ruh nok Tuhan bagun ondiꞌ amu mokpoduhul song napsu niyu.
17 Poꞌ ong napsu nog ginawa-baran,
mokodugtul sog leg nog Ruh nok Tuhan.
Bu og leg nog Ruh nok Tuhan,
mokodugtul da sop song napsu nog ginawa-baran.
Moksinaggaoy ilon,
saan na ong mobais nok kolegan niyu inangon,
ondiꞌ niyu moinang.
18 Sugaid bilaꞌ mopotontul amu nog Ruh nok Tuhan,
na ondiꞌ amu na pogbayaan nok saraꞌ agama.
19 Na ok kodoksuan nok konapsuhan motampal,
mamaꞌ na nok pogjina bug len nok kolomuꞌ-lomuꞌ,
20 poksumba song mga tuhan-tuhan,
poggayd,
pogbanta,
poksuwal,
kodalu,
bulolokowon,
kopingot,
poksuwoy-suwoy bangka pogimung nog len-len nok tumpukan,
21 pogima,
poglangu-langu,
bu pokpoduhul tokodoy sok konapsuhan sok tumpukan nok kobatuk nilon nok tow,
bug duma nong maꞌ niyon nog ginang.
Pidinsamaan ku na amu tumaluꞌ sok tagnaꞌ kituꞌ,
sugaid podinsamaan ku amu mokpuliꞌ,
ok tow nong monginang nong maꞌ niyon koyon,
diꞌ kopusakaan nok Pomarinta nok Tuhan.
22 Sugaid bilaꞌ mopotontul amu nog Ruh nok Tuhan,
mopononggiꞌ amu sok pun kayu nong mobais og bunga nin,
dadi moongon diniyu og lasa,
loliyag,
kosannangan,
sabar,
lolat,
bu kohatul,
kopongandolan amu,
23 bu moongon sop diniyu ok pokpobabaꞌ bug poksaggaꞌ nog ginawa.
Na daꞌdun ok saraꞌ nok sumilaꞌ sog lam niyon.
24 Ok kotanan nong misukuꞌ ni Panghuꞌ Isa Al-Masih,
sinaggaan nilon ong napsu nilon sok kolaatan,
mamaꞌ nok pidunut na nilon ni Panghuꞌ Isa polansang bangka patoy sok kayu.
25 Dadi pagga ita niyu mikobalak nog bogu kotubuꞌ biyan sog Ruh nok Tuhan,
na sumboy potontulan ita niyu nok koleganin.
26 Sumboy diꞌ ita mogabbu,
bu diꞌ ita niyu mokpolingit atawa mima sog duma ta niyu.