4
Na pononggian ku kini diniyu:
Sowpama,
bilaꞌ mikaan pa ok kipusakaan nog gartaꞌ nok solokotow nog gommaꞌ,
mamaꞌ da yanin nog gulipon bisan yanin na og gapuꞌ nok kotanan nok pongartaꞌ.
2 Dadi sumboy pa ipaton yanin bug mga pongartaꞌ in toktob song matong na og waktu nok tinaluꞌ na asal nog gommaꞌ in nog bogoyon da diyanin ok pusakaꞌ in kituꞌ.
3 Na sog daꞌ ita pa tombaꞌ sog Al-Masih mamaꞌ ita niyu da sop nog bataꞌ koyon,
inulipon ita niyu song mga suguan bug gaddat kododunyahoy.
4 Tibuwa dangan minatong na og waktu nog ginantaꞌ nok Tuhan,
piangoyin sog dunya og Bataꞌ in.
Binataꞌ yanin nok solobuk libun,
bu sog diyaloman yanin nok saraꞌ agama
5 bagun molokatin ita,
ong mga sog diyaloman da sop nok saraꞌ agama magun ita moimung nog gumbataꞌ nok Tuhan.
6 Na pagga bataꞌ ita na nok Tuhan,
piangoyin sog diyalom pongatoyan ta og Ruh nog Bataꞌ in,
saan na ok tawag ta diyanin “Ommaꞌ.”
7 Dadi ningkomun kanaꞌ amu na mga gulipon,
sugaid gumbataꞌ amu na nok Tuhan.
Dangan miimung amu na nog gumbataꞌ nok Tuhan,
kipusakaanin da sop amu nog lam nog diyon diyanin.
Kisusahan ni Pol og Jomaa sog Galatiya
8 Na sog bon nog daꞌ niyu pa kilalahoy ok Tuhan,
miulipon amu song mga tuhan-tuhan.
9 Tibuwa song ningkomun,
kilalahan niyu na ok Tuhan,
atawa labi pa kilalahan amu na nok Tuhan.
Manu meleg amu ma mogunut puliꞌ song mga gaddat nog daꞌdun ok kopologunahanin bu kanaꞌ mokowasa mogawon diniyu?
Kolegan niyu pa mokpoulipon puliꞌ dun?
10 Pilabi niyu ok kopogunut niyu song mga mosolag nog gondow,
bulan,
tahun bug pokoradjaan.
11 Ok kondokan ku kalu-kalu mogasta hadja ok tiksaꞌ u moktintuluꞌ diniyu.
12 Dadi mga koilugan,
pongonihon ku tokodoy diniyu nog ilingan niyu akon.
Poꞌ tidu sok kopongandolu ni Panghuꞌ Isa,
ondaꞌ u na pogbayaoy nok saraꞌ agama,
moluhaya u na mamaꞌ diniyu nok kanaꞌ Yahudi.
Daꞌdun og ininang niyu nong molaat dinakon.
13 Kiosunan niyu,
ok kolamma,
ok ponognaan nok pokposampoyu nong Mobais nok Suksugan diyon diniyu.
14 Sugaid bisan misasow amu sok kolamma u koyon,
ondaꞌ niyu da akon poksudioy atawa bugowoy.
Tinolimaꞌ niyu akon nong mamaꞌ nong malaikat nok Tuhan atawa mamaꞌ ni Panghuꞌ Isa Al-Masih nong mikangoy diyon diniyu.
15 Landuꞌ tokodoy og loliyag niyu sog bon nog diyon ku pa diniyu.
Ayin na og loliyag niyu kituꞌ?
Kisaksian ku pa nok tagnaꞌ lamig niyu lugiton ong mata niyu bangka bogoyoy dinakon gantaꞌ nog lolat niyu.
16 Na miimungu taꞌ nog banta niyu kobalan sok poksuksugu diniyu nok kosobonnalan?
17 Ong mga tow koyon nok sinumasow diniyu,
mimologbog ilon bagun moyit amu dun,
sugaid kanaꞌ para sok kobaisan niyu.
Og gawoy nilon,
bagun hadja mopolayuꞌ amu dinami,
bagun mokobologbog amu dinilon.
18 Ong motudin,
mobais da ok kopomologbog basta para sok kobaisan.
Dadi pomologbog amu lolayun dun,
bisan daꞌ u diyon diniyu.
19 Mga piglogumbataan ku,
mamaꞌ u nok pinakitan puliꞌ para diniyu toktob sog bon nong moglillaꞌ na tokodoy ok pongatoyan niyu sog Al-Masih.
20 Mosolag bosiya og legu nog diyon ku diniyu ningkomun bagun kosunan ku bug olohon ku poktaluꞌ,
poꞌ landuꞌ tokodoy ok kosusa u diniyu.
Pinonggian si Hadjar bu si Sarah
21 Na sakon ku amu mga meleg pogbayaan nok saraꞌ agama:
Olo ok pomintangan nong moalap ta sok Kitab Tawrat?
22 Sinulat diyon nog ongon duwaꞌ kotow og bataꞌ ni Nabi Ibrahim.
Ok solokotow nog bataꞌ in,
tidu sog libunin nog gulipon,
bu ok solokotow tidu sog libunin nok kanaꞌ gulipon.
23 Og bataꞌ in sog libunin nog gulipon kituꞌ,
binataꞌ mounut sok kopogbataꞌ nog lam nok tow.
Tibuwa og bataꞌ in sog libunin nok kanaꞌ gulipon,
binataꞌ mounut sog janjiꞌ nok Tuhan dituꞌ ni Nabi Ibrahim.
24 Ok kobiyan-biyanan kini,
mipononggiꞌ sog duwaꞌ buk pigjanjian nok Tuhana.
Og libun nog gulipon,
yonin na si Hadjar,
mopononggiꞌ sog Dan Pigjanjian nong miimung sog Bontud nok Sinay dangan binogoy nok Tuhan ok saraꞌ posunguꞌ ni Nabi Musa,
bu ong mga tow sog diyaloman nini mamaꞌ hantang nong miulipon ilon kotanan.
25 Na si Hadjar kini nog yonin og Bontud Sinay sog bonuwa Arab kituꞌ,
mopononggiꞌ sog Jerusalem dini sog dunya poꞌ ong mga piktowanin pigbayaan nok saraꞌ agama.
26 Sugaid si Sarah nok kanaꞌ gulipon,
mopononggiꞌ sog Jerusalem kituꞌ nog dituꞌ sok surgaꞌ.
Bu yanin sop ong mopononggiꞌ sog ginaꞌ ta mga mogogunut sog Al-Masih,
sabap kanaꞌ ita na gulipon nok saraꞌ,
bu mosannang ita na.
27 Poꞌ misulat sog diyalom Kitab,
“Ika libun nog baug bu ondiꞌ mokobataꞌ,
pogloliyaga!
Ika nog ondaꞌ pa sibon pokonanam nok ponakit,
pogekesa nog loliyag!
Poꞌ og libun nok potiyangan,
modakol pa ong moitung nog bataꞌ in tidu sok taga laki.”b
28 Dadi koilugan,
amu koyon og gumbataꞌ nok Tuhan sabap sog janjiꞌ in,
mamaꞌ ni Isahak nog binataꞌ pasal sog janjiꞌ nok Tuhan.
29 Tagnaꞌ pisakitan ok solokotow kituꞌ nog binataꞌ biyan sog bayaꞌ nog Ruh nok Tuhan nok solokotow kituꞌ nog binataꞌ mounut sok kopogbataꞌ nog lam nok tow.
Domikkiyan da sop song ningkomun,
posakitan amu nok towanan nok pigbayaan nok saraꞌ.
30 Sugaid olo ok tinaluꞌ sok Kitab?
Poawaꞌ nu og libun gulipon koyon bug bataꞌ in,
poꞌ og bataꞌ nog libun gulipon ondiꞌ kobahagian nok pusakaꞌ nog bogoyon sog bataꞌ nog libun nok kanaꞌ gulipon.c
31 Saan na mga koilugan ku,
ita niyu kini,
kanaꞌ mamaꞌ nog bataꞌ nog libun nog gulipon,
sugaid mamaꞌ nog bataꞌ nog libun nok kanaꞌ gulipon.