Ok Pokposun
pasal sog Ikoduwaꞌ Sulat ni Pol song mga Moktotombaꞌ sok Kurintu
Mga pigilugan,
Salam diniyu kotanan.
Ok sulat kini nok posunguꞌ niyu bastahon sinulat ni Pol mga 23 tahun na tidu si Isa Al-Masih motubuꞌ puliꞌ bangka pokpuliꞌ sok surgaꞌ. Tagnaꞌ mimologbog tokodoy si Pol sog agama nong mga Yahudi, bu sinumaggaꞌ yanin song mga moktotombaꞌ ni Isa Al-Masih. Sugaid miimung da sop si Pol nong moktotombaꞌ ni Isa Al-Masih. Sog waktu koyon, si Sol ong ngalanin (Kitab Injil, Mga Ginang 9:1-19). Ondaꞌ kobon inimung si Pol nok solobuk kiwakilan nok Tuhan bagun mokposampoy nong Mobais nok Suksugan pasal ni Isa Al-Masih song mga len-len bangsa. Ong Mobais nok Suksugan kini, yonin na nok piangoy nok Tuhan si Panghuꞌ Isa dini sog dunya miimung nok kurban gantiꞌ dinita. Dadi biyan sok kopatoyin bu kotubuꞌ in puliꞌ, mangkon yanin nog dusa nong mga manusiyaꞌ bagun sima-sima ong mongandol diyanin mosurgaꞌ.
Na si Pol kini, modakol ong mga sulatin song mga moktotombaꞌ sog len-len nog bonuwa. Dadi miksulat da sop yanin song mga moktotombaꞌ sok siyudad nok Kurintu nong misakup ningkomun sog bangsa Grik. Bu kini og ikoduwaꞌ nok sulatin dinilon nok totubuꞌ pa song ningkomun. Bakas mikoposampoy si Pol bug si Silas nong Mobais nok Suksugan song mga tow sok Kurintu sok pokpanow nilon mokposampoy (Kitab Injil, Mga Ginang 18), bu migonong si Pol diyon sog bon nok sotahun bu tongaꞌ. Ok siyudad nok Kurintu kini, solobuk mibantug nok siyudad pasal song mga mobais nok pogdagangan nilon. Sugaid mibantug da sop ok Kurintu pasal sog ginang nilon nong molaton mamaꞌ nok pogjina, poglangu-langu bu pasal sok poksumba nilon song mga tuhan-tuhan.
Sok sulatin kini, migloliyag si Pol sog dongogan nong miktowbat na ong mga duma nong mga moktotombaꞌ diyon sok Kurintu sok kodusahan nilon. Dadi tinaluanin ilon nok sumboy moginampunoy ilon, bu pipondomin dinilon nong mosolag tokodoy ok poglasa nin dinilon.
Na miktagnaꞌ og jomaa sok Kurintu mokpulun nok totabangan para song mga koilugan nilon sok kotombaꞌ nong mosigpit sog Jerusalem. Dadi pipondoman ilon ni Pol nong mobais nok podayunon nilon ok pokpulun kini sampoy modoksuꞌ.
Na sog waktu nok sinulat ni Pol ok sulat kini, ongon ong mga duma sog jomaa sok Kurintu nong mononaggaꞌ sok pononduꞌ ni Pol. Ondiꞌ ilon tumombaꞌ nok si Pol kiwakilan moimung nong mokpoposampoy pagga modakol ok kibiyan-biyananin nok kobinsanaan, bu binabaꞌ-babaꞌ nilon ok taluꞌ bug ginangin. Dadi sinugutan ni Pol og ginawa nin pasal sok poksilaꞌ nilon koyon diyanin. Sinulat ni Pol nog bisan kulang pa tokodoy ok kopagas nog ginawa nin sok taluꞌ bug ginang, pitongow nok Tuhan ok kowasa nin biyan diyanin. Pipondom ni Pol dinilon og lam nok kobinsanaan nok kibiyananin pasal sok kopogunutin ni Panghuꞌ Isa. Na mitantu ni Pol nok saan na pitampalin dinilon pasal song mga sumbungan nong mga duma kituꞌ bagun bilaꞌ montow na yanin dinilon, bung mayan mobais na ok poksolobuk nilon. Kolegan ni Pol nong moksulut ilon poꞌ lolayun lumasa yanin dinilon.
Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.
Wassalam