Og Ikoduwaꞌ Sulat ni Pol song mga Moktotombaꞌ sok
KURINTU
1
Salam-duwaa diniyu jomaa nok Tuhan diyon sok siyudad nok Kurintua dunut nong mga len nok sinutsi nok sukuꞌ in sog liwag nok probinsiya nog Akaya.
Akon si Pol ong mipiliꞌ moimung nong mokpoposampoy ni Isa Al-Masih biyan sok kolegan nok Tuhan.
Tidu da sop kini sog gilug ta sok kotombaꞌ nok si Timuti.
2 Bung mayan modiyon diniyu ok kolasa-kololat bug kosannangan nok tidu sok Tuhan,
og Gommaꞌ ta bug Panghuꞌ ta Isa Al-Masih.
Ok Poksarang-sukul ni Pol sok Tuhan
3 Pudjihon ta niyu ok Tuhan,
og Gomma nok Panghuꞌ ta niyu Isa Al-Masih poꞌ yanin og Gommaꞌ nong molilolatoy bu ok Tuhan nog lolayun mokpobogan nok pongatoyan ta.
4 Pobogananin ita sog lam nok kobinsanaan ta bagun biyan dun mopobogan ta da sop ok pongatoyan nok koilugan ta bilaꞌ mobinsanaꞌ ilon.
5 Poꞌ bisan miglabi-labi ok kobinsanaan nong mosugat dinita mga moktotombaꞌ pasal sok kopogunut ta ni Isa Al-Masih,
miglabi-labi da sop nok pokpobogan nok Tuhan sok pongatoyan ta biyan sok kosolobuk ta ni Isa Al-Masih.
6 Dadi bisan mokobiyan ami nong mga kobinsanaan pasal sok pokposampoy nami,
atawa bilaꞌ mokonanam ami nok pokpobogan bug tabang nok Tuhan,
mokohampit amu da sop dun.
Poꞌ moinang kini bagun mosunuꞌ amu amuꞌ-amuan bu awonon nok Tuhan,
bu bagun kosabaran niyu ong mga kologonan mamaꞌ nong minanam nami da sop.
7 Na mosolag ok pongandol nami sok Tuhan pasal diniyu,
poꞌ mitantu nami nong minunung amu moktiggol sok kologonan batuk dinami.
Dadi moampuꞌ amu da sop amuꞌ-amuan nok Tuhan.
8 Na mga koilugan,
diꞌ ami meleg nong moawam amu pasal sok kobinsanaan nong minanam nami sok probinsiya nog Bataꞌ-bataꞌ Asiya.
Landuꞌ kobogat ok kosigpitan nami,
agon-agon diꞌ ami na mokotiggol dun boyaan kiawaan ami nok pogdodama motubuꞌ.
9 Minanam nami nong matoy ami na dun.
Tibuwa poksuloy hadja kituꞌ bagun diꞌ ami mongandol sog ginawa-baran nami,
sugaid sok Tuhan da nong mokpotubuꞌ puliꞌ nong mga minatoy.
10 Pinuwasin ami tidu sok komulahan koyon saan daꞌ ami patoy,
bu mitantu nami nok puwasonin ami.
Ok Tuhan ok pigdodamahan nami nok puwasonin da sop ami loma-dinglag.
11 Na sumboy tabangan niyu da sop ami biyan sok pongoni-ngoni niyu sok Tuhan,
bagun modakol da sop ong mokposarang-sukul sok Tuhan pasal sok tabangin dinami.
Mipinda og Waktu nok Pokpuliꞌ ni Pol sok Kurintu
12 Na mokopoktaluꞌ ami,
bu mokpomotud ok pongatoyan nami nog ikhlas ong niyat bug pongaddatan nami song mga tow bu labi-labi na diniyu.
Sugaid ok pongaddatan nami kini,
tidu sok kolasa-kololat nok Tuhan dinami.
Kanaꞌ kini tidu sok kokosun nog ginawa-baran nami.
13-14 Daꞌdun sok sulat nami nong mologon niyu bastahon atawa sabuton.
Sugaid bisan ongon pa og diꞌ niyu mosabut sog ginang bug gawoy nami,
bung mayan matong da bosiya og waktu nong mosabut niyu da tokodoy nog amu ok kobantugan nami,
bu ami ok kobantugan niyu bilaꞌ matong na si Panghuꞌ Isa puliꞌ.
15 Pagga mitantu u pasal niyon,
mikpikilu tagnaꞌ nok tumibow diyon diniyu duwaꞌ kali bagun kodublihan amu nog barakat.
16 Melegu bosiya tumibow diyon diniyu bilaꞌ mangoyu sok probinsiya nong Makedonyab bu tumibow da sop diniyu bilaꞌ mokpuliꞌ u.
Dadi kotabangan niyu akon sok kopanowu sog Yahudiya.
17 Maꞌ niyon bosiya ok pinikilu,
sugaid daꞌ kodayun.
Kanaꞌ koyon migmaana nok kanaꞌ kopongandolan ok tinaluꞌ u,
bu mokpoduhulu hadja sok kolegan ku.
Ondiꞌ u moktaluꞌ nog “Oo,”
bilaꞌ ong maksudu “Ondiꞌ.”
18 Kopongandolan ok Tuhan,
bu ami sooy.
Bilaꞌ moktaluꞌ ami “Oo,”
ondiꞌ mopinda sog “Ondiꞌ.”
19 Miktaluꞌ u nong maꞌ niyon poꞌ si Isa Al-Masih,
og Bataꞌ nok Tuhan nok pisampoy nami ni Silas bu ni Timuti diniyu,
kanaꞌ moktaluꞌ nog “Oo” bilaꞌ ong maksudin “Ondiꞌ.”
Tibuwa diyon diyanin lolayun tokodoy nog “Oo.”
20 Poꞌ ok kotanan nong mga janjiꞌ nok Tuhan miunut biyan ni Isa Al-Masih.
Saan na pasal sog ininang ni Isa Al-Masih,
mokotabal ita nog “Amin”,
dadi potason ok Tuhan biyan dun.
21 Ok Tuhan ong mokpopagon nok pongatoyan ta niyu sok pongandol ta diyon sog Al-Masih,
bu yanin ong mikpiliꞌ dinita moimung nok sukuꞌ in.
22 Ok Tuhan da sop ong miktatak dinita bu ong migbogoy nog Ruh nin sok pongatoyan ta,
og gindanan nong motabuk ta ong mga janjiꞌ in.
23 Na ok Tuhan da ong mikosaksiꞌ nong motud ok tinaluꞌ u diniyu nog daꞌ u pokpuliꞌ diyon diniyu sok Kurintu poꞌ diꞌ u meleg mogbogoy nok kosusahan bug sakit-atoy diniyu.
24 Kanaꞌ kini migmaana nog ami ong mogbayaꞌ sok kotombaꞌ niyu poꞌ mopagon ma ok kotombaꞌ niyu.
Sugaid meleg ami moginang dunut diniyu bagun moglabi-labi og loliyag niyu.