2
Dadi pagga diꞌ u meleg mogbogoy puliꞌ nok kosusahan diniyu,
migbayaꞌ u nog golom pa nog diꞌ u poguna tumibow diyon.
2 Poꞌ bilaꞌ posusahon ku ok pongatoyan niyu,
sima na ong mogbogoy nakon nog loliyag pagga amu ong mokpololilyag dinakon?
3 Saan na mikpoyitu moguna nok sulat diyon diniyu,
bagun bilaꞌ mokangoyu diyon,
ondiꞌ u kobogoyan nok kosusahan nong mga tow nong mogbogoy bosiya nog loliyag dinakon.
Poꞌ mitantu u nog olo ong mokobogoy dinakon nog loliyag,
mokobogoy da sop diniyu kotanan nog loliyag.
4 Dangan sinulatan ku amu,
landuꞌ kosusa u,
bu diꞌ motonaꞌ og diyalom pongatoyan ku boyaan miktogduꞌ og luwaꞌ u dun.
Ondaꞌ u amu sulatoy bagun posusahon ku,
sugaid kolegan ku nok kosunan niyu bug ponoy kosolag ok kolasa u diniyu.
Sumboy Ampunon ok Tow kituꞌ nong Mikodusa
5 Na pasal sok tow kituꞌ sok tumpukan niyu nong mikodusa bangka pokobogoy nok kosusahan,
kanaꞌ tibuwa akon ong misusa dun,
sugaid og lam niyu,
atawa modakol diyon diniyu bagun kanaꞌ u mokpolabi nok taluꞌ.
6 Na para na ok pokpaat nok pinanam nok kodakolan niyu sog duma niyu kituꞌ nong mikodusa.
7 Dadi ningkomun kini ampun niyu yanin bu amuꞌ-amuan niyu na yanin bagun diꞌ na landuꞌ yanin kosusa bangka kobolongoy yanin nok kotombaꞌ.
8 Pongonihon ku tokodoy diniyu nok potongowon niyu diyanin og ikhlas nok poglasa.
9 Saan na sinulatan ku amu nok sulat kituꞌ poꞌ kolegan ku kosunan bilaꞌ kopongandolan amu mogunut sog lam nok tinonduꞌ u diniyu.
10 Sima-sima og ampunon niyu,
inampun ku da sop.
Na pasal sok tow kituꞌ,
bisan kanaꞌ tantu akon ok kidusahan,
inampun ku da sop yanin sabap diniyu sog gadapan ni Isa Al-Masih.
11 Sumboy mongampun ita poꞌ bilaꞌ ondiꞌ,
sunoy mogimakat og Iblis mongakkal dinita bagunin ita dagon poꞌ kiosunan ta nong moksipi yanin nong molaat.
Mikposampoy si Pol sog Bonuwa Trowas
12 Na minangoyu sok Trowasa mokposampoy nong Mobais nok Suksugan pasal ni Isa Al-Masih.
Bu sok tabang nok Tuhan modakol ong mga tow diyon nong mobukaꞌ ok pongatoyan nilon monginongog dun.
13 Sugaid ondiꞌ motonaꞌ ok pikilan ku poꞌ ondaꞌ u ma kobalak dituꞌ si Titus,
og gilug ta sok kotombaꞌ.
Saan mimuhun ku song mga moktotombaꞌ bangka u pogdayun song Makedonya.
Ok Poktombaꞌ ni Panghuꞌ Isa Al-Masih ok Pobiyan nok Kopomondag Solama-lama
14 Na landuꞌ tokodoy ok poksarang-sukulu sok Tuhan nog lolayun miglokounutan dinita sok kopomondagan pasal sok poksolobuk ta ni Isa Al-Masih.
Gamitonin ita mokposampoy nong Mobais nok Suksugan pasal ni Isa bisan ayin bonuwahoy,
bu ok kokosun pasal diyanin mamaꞌ hantang nok pomomut nong mokanat bu mosapu song mga kobonuwahan.
15-16 Poꞌ ok pokposampoy nami pasal sok kurban ni Isa Al-Masih song manusiyaꞌ mamaꞌ sopantun nong momut nok sapu posunguꞌ sok Tuhan.
Sugaid ok ponapu nong mga mokodongog sok pokposampoy kini kanaꞌ batuk.
Para song mga diꞌ tumombaꞌ bangka kosiksaꞌ,
ok sapu nok pokposampoy pasal sok kurban ni Isa Al-Masih mamaꞌ nog goduꞌ nok kopatoy poꞌ ok koposunguan nilon ong narkaꞌ.
Tibuwa para song mga tumombaꞌ bangka koawon,
ok sapu nok pokposampoy kini momut tokodoy poꞌ ok koposunguan nilon ong mosannang nok kotubuꞌ sok surgaꞌ.
Na og ginang kini mokposampoy pasal sog Al-Masih bagun moawon ong mga manusiyaꞌ,
daꞌdun na ong mokoinang dun biyan sok kopandoyan nong manusiyaꞌ.
17 Kanaꞌ ami batuk song mga duma nok tow nong mokposampoy nok Parman nok Tuhan bagun ilon mokosin mamaꞌ sopantun nong migdagang ilon dun.
Sugaid kiwakilan ami nok Tuhan,
dadi ikhlas ok pokposampoy nami nok Parman nok Tuhan,
poꞌ ami ong mga sosuguon ni Isa Al-Masih.