Og Bogu Pigjanjian, og Bogu Pobiyan Mokpolani sok Tuhan
3
Sunoy biyan sok taluꞌ nami bogu kini,
mokpikil amu nong mogbantug ami na puliꞌ nog lawas nami.
Na kanaꞌ koyon ong maksud nami.
Kanaꞌ ami mamaꞌ nog duma nong mikkogunahan nok sulat pokpokilala posunguꞌ diniyu atawa tidu diniyua bagun ami tabukon.
2 Poꞌ amu tokodoy og gantiꞌ nok sulat pokpokilala dinami nong mokopomotud nog ginang nami diniyu bu kolasahan nami amu.
Ok kotubuan niyu mamaꞌ nok sulat nong motongow bu mobasta bisan sima towoy.
3 Motampal song mga tow nog amu koyon yonin na og hantang nok sulat nok tidu sog Al-Masih nok pisampoy dinami.
Tibuwa ok sulat kini,
sinulat nok kanaꞌ tidu sok tintaꞌ,
sugaid tidu sog Ruh nok Tuhan nok totubuꞌ solama-lama.
Bu kanaꞌ sop sinulat sog batu mamaꞌ song masa ni Nabi Musa,
sugaid sinulat sog diyalom nok pongatoyan niyu.
4 Mokotowakkal ami moktaluꞌ nong mamaꞌ nini pasal sok kopongandol nami sok Tuhan biyan ni Isa Al-Masih.
5 Diꞌ ami mogniyat nog ongon ok kopandoyan nog ginawa-baran nami moginang para sok Tuhan,
sugaid ok kopandoyan nami tidu diyanin.
6 Ok Tuhan ong mogbogoy dinami nok kopandoyan mokposampoy nog Bogu Pigjanjianinb nog daꞌ kosulat sog batu,
sugaid tidu sog Ruh nin.
Poꞌ sog Bogu Pigjanjian kini bogoyon nok Tuhan og Ruh nin song mga manusiyaꞌ nok tumombaꞌ sog Al-Masih,
bu koongonan ilon nok kotubuꞌ solama-lama biyan sog Ruh nin.
Tibuwa ok kodoksuan nog Dan Pigjanjianc nok sinulat kituꞌ sog batu,
yonin na ok kopatoy bug siksaꞌ solama-lama poꞌ mokodugtul ong mga manusiyaꞌ song mga saraꞌ in.
7 Na sog waktu nog binogoy nok Tuhan dituꞌ ni Nabi Musa ok saraꞌ kituꞌ nok sinulat sog batu,
pitongowin ok sahaya nin bisan ok kodoksuan nok saraꞌ ok kopatoy bug kosiksaan poꞌ mikodugtul ong mga tow dun.
Dadi mosahaya ong muluꞌ ni Nabi Musa.
Tidu dituꞌ diꞌ yanin mogaga tontongon nong mga tow Israel,
sugaid mogmayaꞌ-mayaꞌ da mokkobolong ok sahaya kituꞌ.
8-9 Na bilaꞌ mipotongow nog Dan Pigjanjian ok kosahaya nok Tuhan bisan migoyit koyon nog binsanaꞌ song mga manusiyaꞌ poꞌ diꞌ ilon mokopogunut tokodoy dun,
labi-labi na mopotongow ok kosahaya nin biyan sog Bogu Pigjanjian nong mogoyit nok kopogawon song mga manusiyaꞌ.
Poꞌ sog Bogu Pigjanjian kini,
itungon ong mga tow nong mologdong sok ponontong nok Tuhan bilaꞌ tumabuk ilon dun,
bu og ginang kini,
og ginang nog Ruh Mahasutsi.
10 Ong motudin,
ok kotas nog Dan Pigjanjian,
mamaꞌ da nog daꞌdun bilaꞌ pobatukon sog Bogu Pigjanjian,
poꞌ labi pa tokodoy motas og bogu kini.
11 Poꞌ bilaꞌ pitongow nok Tuhan ok sahaya bug kotasin dangan piponogin og Dan nok Pigjanjian nong mikobiyan na,
labi na tokodoy motas og Bogu Pigjanjian poꞌ daꞌdun ok kodoksuanin.
12 Dadi pasal sok kosolag nok pogdodama nami,
mokotowakkal ami mokposampoy nog Bogu Pigjanjian nong mokowasa kini pasal ni Isa Al-Masih.
13 Kanaꞌ ami mamaꞌ ni Nabi Musa nog dinungmaanin ong muluꞌ in,
bagun diꞌ motongow nong mga tow Israel nong mokkulang da ok sahaya kituꞌ bangka kobolong.
14 Sugaid tidu pa sok tagnaꞌ kituꞌ,
diꞌ mokosabut ong mga tow Israel,
poꞌ miksitogas ok pongatoyan nilon.
Bu sampoy ningkomun,
mamaꞌ da nog hantang dinungmaan ok pomikil nilon bilaꞌ mogbasta ilon nok Kitab Tawrat.
Moawaꞌ tibuwa og dungmaꞌ kituꞌ,
bilaꞌ tumombaꞌ na ilon sog Al-Masih.
15 Poꞌ bisan pa sog waktu kini,
bilaꞌ pobastahon na nilon ok sinulat sok saraꞌ nok piponog ni Nabi Musa,
diꞌ nilon pa mosabut,
poꞌ mamaꞌ pa kidungmaan ok pomikil nilon.
16 Sugaid sima-sima ong moktowbat bangka unut sok Pogbayaꞌ-bayaꞌd,
mawaꞌ na ong midungmaꞌ kituꞌ sok pomikilin.
17 Na ok Pogbayaꞌ-bayaꞌ,
yonin na og Ruh.
Bu sima-sima towoy nog diyon diyanin og Ruh nok Tuhan,
moluhaya ok pongatoyanin posunguꞌ sok Tuhan.
18 Na og lam ta niyu kini mga moktotombaꞌ sog Al-Masih,
daꞌ na kodungmaoy ong muluꞌ ta.
Dadi motongow ta nong motampal ok kotas bug sahaya nok Panghuꞌ,
bu motongow da sop ok kotasin bug sahaya nin biyan dinita.
Poꞌ boguhanin ok pongatoyan ta bagun mogbatuk-batuk diyanin.
Ong moginang dun,
ok Panghuꞌ nog yonin og Ruh.