Ok Pognasihat pasal sog Al-Masih
4
Dadi tidu sog lolat nok Tuhan dinami,
kiwakilanin ami mokposampoy nog Bogu Pigjanjian kini,
saan na daꞌ ami kobolongoy nok pogdodama bug pongandol.
2 Sugaid binolong nami og lam nog binuni bug mokosipog mga ginang.
Ondaꞌ ami pongakkal song mga tow,
bu daꞌ nami posimoyoy ok Parman nok Tuhan,
sugaid mokposampoy ami nok kosobonnalan.
Mokpotampal ami mokposampoy sog lam nok tow bagun kosunan nilon nok kopongandolan ami,
bu ok Tuhan ok saksiꞌ nami.
3 Bilaꞌ ong Mobais nok Suksugan nok pisampoy nami pasal sog Al-Masih mobuni sok ponabut nong mga tow,
mibuni tibuwa para song mga tow nong mokposunguꞌ sok kosiksaan loma-dinglag.
4 Ong mga tow kini ondiꞌ tumombaꞌ sog Al-Masih,
poꞌ dinungmaan ok pikilan nilon nog Iblis nog yanin ong migbayaꞌ song mga tow kododunyahoy.
Saan na ondiꞌ nilon motongow ok sahaya tidu song Mobais nok Suksugan pasal sok kotas ni Isa Al-Masih.
Biyan diyanin kosunan ta bug ponoy tokodoy ok Tuhan.
5 Dadi ok pokposampoy nami kanaꞌ pasal sog lawas nami,
sugaid pasal ni Isa Al-Masih nog yonin na ok Panghuꞌ nong mogbayaꞌ sok kotanan.
Ami kini ong mga moktotolagad tibuwa diniyu para ni Panghuꞌ Isa.
6 Poꞌ dangan mikpoongon ok Tuhan nog dunya,
miktaluꞌ yanin,
“Moongon ok sahaya tidu sok kodoloman.”a
Na yanin sop ong mikposahaya nok kodolagin sog diyalom pongatoyan ta bagun kosunan ta ok kowasa bug kotasin nong motongow ta diyon ni Isa Al-Masihb.
7 Poꞌ ok pokposampoy nami pasal sog Al-Masih landuꞌ kohalgaꞌ,
tibuwa ami kini nong mogogoyit dun,
daꞌdun tantu ok pagas nami.
Mamaꞌ ami hadja nong mga bangga da nok kanaꞌ mopagon bu modaliꞌ mobogbag,
bagun kosunan nong mga tow,
og landuꞌ nok kowasa nog binogoy dinami moktolagad para sok Tuhan,
kanaꞌ tidu dinami,
sugaid tidu diyanin.
8 Sobolaꞌ-posobolaꞌ og logon nong molumpak nami sok pokposampoy,
sugaid ondaꞌ ami tokodoy dagoy.
Mosasow ok pikilan nami,
tibuwa ondaꞌ ami kobolongoy nok pogdodama bug kopongandol.
9 Pogbinsanaon ami,
sugaid daꞌ ami da potiyangoy nok Tuhan,
pokposakitan ami,
sugaid daꞌ ami da pogmula.
10 Ok kobinsanaan nog lolayun mosugat sog lawas nami,
mamaꞌ nong mokpotongow nok kopatoy ni Isa Al-Masih bagun motongow sop ok kotubuꞌ in dinami.
11 Poꞌ sog bon ami totubuꞌ lolayun ami sok komulahan nok kopatoy pasal sok kopogunut-unut nami ni Isa,
bagun motongow ok kowasa nin nong mokobogoy nok kotubuꞌ diyon sog lawas nami nok taga kopatoy.
12 Saan na bisan madap ami aluꞌ-aluꞌ nok komulahan nok kopatoy sok pokposampoy nami,
biyan dun kiongonan amu nong mosannang nok kotubuꞌ solama-lama.
13 Na misulat sog diyalom Kitab Jabur,
“Tinumombaꞌ u sok Tuhan saan miktaluꞌ u.”c
Dadi mokpodayun ami da sop mokposampoy poꞌ binogoyan ami da sop nog Ruh nok Tuhan nok kotombaꞌ,
mamaꞌ nok tow moktotombaꞌ kituꞌ nong misulat ok taluꞌ in sog diyalom Kitab.
14 Mikposampoy ami poꞌ kiosunan nami nog ok Tuhan ong mikpotubuꞌ puliꞌ ni Panghuꞌ Isa tidu sok kopatoy,
yanin da sop ong mokpotubuꞌ dinita puliꞌ poꞌ sukuꞌ ita ni Isa.
Tubus bangka nin ami oyiton dunut diniyu madap diyanin.
15 Poꞌ og lam nong mikobiyan kituꞌ,
mikobiyan para sok kobaisan niyu bagun moksidakol ong mga tow nong mokotabuk nok kolasa-kololat nok Tuhan biyan ni Isa Al-Masih.
Dadi moksidakol da sop ong mga moksarang-sukul sok Tuhan bangka yanin potasoy.
Ok Surgaꞌ ong Motud nok Pogonongan ta
16 Saan na diꞌ ami tokodoy kobolongan nok pogdodama.
Poꞌ bisan og lawas nami kini moksilamma bu moglogulang na,
ok kotombaꞌ sog diyalom pongatoyan nami popagonon bu pongimboguhan nok Tuhan gondow-gondow.
17 Poꞌ ok kobinsanaan nok sinandalan nami song ningkomun kini,
diꞌ na sooy bistahon poꞌ mogbunga para dinami nok kotas solama-lama nog diꞌ tokodoy motokkad nong manusiyaꞌ.
18 Saan na kosandalan nami poꞌ diꞌ nami polabihon ong mga olo-olo dini sog dunya,
sugaid halgaan nami ong mga olo-olo nog diꞌ motongow.
Poꞌ ong mga motongow miyan hadja,
sugaid ong mga diꞌ motongow,
ok toktoban nilon solama-lama.