1 Kurintu i

Ok Pokposun

pasal sog Ikosolobuk Sulat ni Pol song mga Moktotombaꞌ sok Kurintu

Mga pigilugan,

Salam diniyu kotanan.

Ok sulat kini nok posunguꞌ niyu bastahon, sinulat ni Pol mga 20 tahun na tidu si motubuꞌ puliꞌ bangka pokpuliꞌ sok . Tagnaꞌ mimologbog tokodoy si Pol sog agama nong mga Yahudi, bu sinumaggaꞌ yanin song mga ni Isa Al-Masih. Sugaid miimung da sop si Pol nong moktotombaꞌ ni Isa Al-Masih. Sog waktu koyon, si Sol ong ngalanin (Kitab Injil, Mga Ginang 9:1-19). Ondaꞌ kobon inimung si Pol nok solobuk kiwakilan nok Tuhan bagun mokposampoy nong pasal ni Isa Al-Masih song mga len-len bangsa. Ong Mobais nok Suksugan kini, yonin na nok piangoy nok Tuhan si dini sog dunya, bu biyan sok kopatoyin bu kotubuꞌ in puliꞌ, mangkon yanin nog nong mga manusiyaꞌ bagun sima-sima ong mongandol diyanin mosurgaꞌ.

Na si Pol kini, modakol ong mga sulatin song mga moktotombaꞌ sog len-len nog bonuwa. Dadi miksulat da sop yanin song mga moktotombaꞌ sok siyudad nok nong misakup ningkomun sog bangsa Grik. Bakas mikoposampoy si Pol bug si nong Mobais nok Suksugan song mga tow sok Kurintu sok pokpanow nilon mokposampoy (Kitab Injil, Mga Ginang 18), bu bakas migonong si Pol diyon sog bon nok sotahun bu tongaꞌ. Ok siyudad nok Kurintu kini, solobuk mibantug nok siyudad pasal song mga mobais nok pogdagangan nilon, sugaid mibantug da sop pasal sog ginang nilon nong molaton mamaꞌ nok pogjina, poglangu-langu bu pasal sok poksumba nilon song mga tuhan-tuhan.

Sok sulatin kini, pipondom ni Pol song mga moktotombaꞌ nok si Panghuꞌ Isa Al-Masih ok kounutan nilon nog unuton nilon. Tinaluanin ilon nog kanaꞌ ong mga mokpoposampoy ong motud nog kounutan nilon, poꞌ solobuk da ok kounutan bug Panghuꞌ nilon, yonin na si Isa Al-Masih. Mikodongog da sop si Pol nog ongon ong mga duma nok tow sok tumpukan nilon moktotombaꞌ nong migjina bu mikpikil nong moluhaya ilon moginang nog bisan olo. Na pipondoman ilon ni Pol nong minatoy si Panghuꞌ Isa para song mga dusa nilon, dadi og ginang nilon sog lawas nilon mokopoglaat nok poksolobuk nilon ni Panghuꞌ Isa. Pingoni da sop dinilon ni Pol nog bilaꞌ ongon ok piksuwalan nilon sok pokasi nilon moktotombaꞌ, pogusoyon nilon song mga kounutan nilon moktotombaꞌ. Golom pa taluꞌ ni Pol nok potiyangan nilon na hadja bilaꞌ ongon og jumongki atawa moglimbung dinilon, tidu pa sok posauton nilon song mga monghuhukum diyon sog bonuwa nog daꞌ tanan tombaꞌ. Binogoy da sop ni Pol ok pituwa dinilon bug olo og inangon nilon pasal song mga kan nog asal dinulang song mga tuhan-tuhan. Tubus miktonduꞌ dinilon si Pol pasal song mogusoy-usoy nok poksumbaꞌ. Bilaꞌ ongon ong mga koilugan nilon sok kotombaꞌ nok poponogan nok taluꞌ tidu sok Tuhan, atawa binarakatan nog len nok kopandoyan nok tidu sog , sumboy moginaddatoy ilon. Tinaluꞌ in nong mobais pogmuhut-muhutan nilon ong mga kopandoyan nog bogoyon dinilon nog Ruh nok Tuhan gantaꞌ barakat dinilon, sugaid labi pa tokodoy mobais nong mogapas ilon nok kolasa posunguꞌ sok Tuhan bug mga duma nilon manusiyaꞌ.

Na ongon og duma mga tow sok tumpukan nilon nong miktaluꞌ nog daꞌdun da kotubuꞌ puliꞌ nong mga minatoy. Dadi pipondom dinilon ni Pol nong modakol ong mikotongow ni Isa Al-Masih pogdoksuꞌ yanin potubuoy puliꞌ. Doksuꞌ miktonduꞌ pa dinilon si Pol pasal sog halgaꞌ nok pokpotubuꞌ puliꞌ ni Isa Al-Masih tidu sok kopatoy. Tinaluꞌ ni Pol, ok pokpotubuꞌ puliꞌ ni Isa Al-Masih ok pagon nok kotombaꞌ ta, bu yonin koyon ok pun nong moksolobuk ong mga moktotombaꞌ. Dadi mokpolayuꞌ ita niyu sog dusa. Pasal sok pokpotubuꞌ diyanin puliꞌ, ongon ok pagas nong mga moktotombaꞌ lumasa. Bu pagga mitubuꞌ si Isa Al-Masih puliꞌ, mokopogdodama ita niyu nok potubuon ita niyu da sop mokpuliꞌ nong mosannang sog binayaꞌ gondow.

Bung mayan tonduan ita niyu nok Tuhan sok pogbasta ta kini, bu potontulonin ita niyu sog dalan nok posunguꞌ sok surgaꞌ.

 

Wassalam