Mga Salam-duwaa
16
Ningkomun,
poilalahon ku diniyu og gilug ta nog libun nok si Pebi.
Solobuk yanin moktotolagad song mga moktotombaꞌ sog jomaa sog bonuwa Kinkiriya.
2 Pagga gilug ta niyu yanin biyan ni Panghuꞌ Isa,
pongonihon ku diniyu nok tolimaon niyu yanin pahatul,
poꞌ yonin koyon ok tolop inangon nong mga sukuꞌ in.
Tabangoy niyu yanin sog olo-olo nok kulang-kabusin,
poꞌ modakol nok tow ok kitabanganin,
sampoy akon.
3 Salam-duwaa ni Prisila bu ni Akilaa.
Ilon koyon mga duma u mokposampoy pasal ni Isa Al-Masih.
4 Atas nilon piglillaꞌ ong nyawa nilon dinakon,
bu kanaꞌ hadja akon ong miksarang-sukul dinilon,
sugaid sampoy kotanan nong mga moktotombaꞌ song mga jomaa Al-Masih nok kanaꞌ Yahudi.
5 Posampoy niyu da sop ok salam-duwaa u sog jomaa nong moglumpuk-lumpuk diyon sog baloy nilon.
Salam-duwaa da sop diyon ni Epenitus,
ok kolasahan ku nong mikuna tokodoy tumombaꞌ sog Al-Masih dituꞌ sok probinsiya nog Bataꞌ-bataꞌ Asiya.
6 Posampoy niyu da sop ok salam-duwaa dituꞌ ni Mariam,
ong mitiksaꞌ tokodoy diniyu.
7 Salam-duwaa da sop diyon ni Andronikus bu ni Yuniyas,
ok salu-bangsa u nong mipirisu dunut dinakon tagnaꞌ.
Mobais og dongogan nilon song mga mokpoposampoy,
bu mikuna da sop ilon tumombaꞌ sog Al-Masih tidu dinakon.
8 Salam-duwaa diyon ni Ampliyatus,
ok kolasahan ku nog gilug ta niyu biyan ni Panghuꞌ Isa.
9 Salam-duwaa da sop ni Urbanus,
og duma ta niyu moginang para sog Al-Masih,
bu si Istakis,
ok kolasahan ku da sop.
10 Salam-duwaa da sop diyon ni Apelles nok kisuloyan na ok kopongandolin sog Al-Masih.
Salam-duwaa da sop song mga sakup ni Aristobulus sog baloy.
11 Salam-duwaa diyon ni Herodiyon,
ok salu-bangsa u Yahudi.
Salam-duwaa da sop song mga moksolobuk ni Isa Al-Masih diyon sog baloy ni Narkissus.
12 Posampoy niyu da sop ok salam-duwaa u niloꞌ Tripena bu Triposa nong moktiksaꞌ para sok Panghuꞌ ta.
Salam-duwaa da sop dituꞌ sok kolasahan nog gilugu nok si Persiya nong mitiksaꞌ tokodoy pasal sok Panghuꞌ ta.
13 Na salam-duwaa da sop diyon ni Rupus ong mipiliꞌ ni Panghuꞌ Isa bu diyon sog ginaꞌ ni Rupus nong mamaꞌ na nog ginaꞌ u.
14 Salam-duwaa da sop dituꞌ ni Asinkiritus,
ni Pilegon,
ni Hermes,
ni Patrobas,
ni Hermas,
sampoy na song mga pigilugan ta niyu diyon dinilon.
15 Posampoy niyu da sop ok salam-duwaa u dituꞌ niloꞌ Pilologu bu Yuliya,
ni Neriyus bug gilugin nog libun,
sampoy ni Ulimpas bu kotanan nong mga sukuꞌ nog Al-Masih nog diyon dinilon.
16 Pogjara-jinarahoy amu nong mosutsi.
Og lam nong moktotombaꞌ song mga jomaa nog Al-Masih dini mikposampoy nok salam-duwaa diyon diniyu.
Mga Pomilin-milin ni Pol
17 Dadi pongonihon ku diniyu mga pigilugan ku nong moghalliꞌ amu sok sosuku nok tow nong mokopoglaat nok kopoksolobuk niyu bu mokosaggaꞌ sok kosobonnalan nok tinintuluꞌ diniyu.
Pokpolayuꞌ amu dinilon!
18 Poꞌ ong mga tow nong mogoginang nong mamaꞌ niyon,
kanaꞌ ilon mogapas nok kosuatan dun ok Panghuꞌ ta Isa Al-Masih,
sugaid ok kolegan nog ginawa-baran nilon.
Biyan sok kopandoy nilon moktaluꞌ-taluꞌ,
mopodupang nilon bu mopokabag nilon ok tolinga nong mga sukuꞌ nog Al-Masih nog awam.
19 Mikanat na ayin-ayin og dongogan pasal sok kotombaꞌ niyu sog Al-Masih,
dadi migloliyagu tokodoy.
Sugaid kolegan ku nok pongongosunan niyu monginang nong mobais,
bu daꞌdun ok sene-sabut niyu sog ginang nong molaton.
20 Ok Tuhan ong mogbobogoy nok kosannanganb,
bu diꞌ na mobon dagonin og Iblis para diniyu.
Bung mayan modiyon diniyu ok kolasa-kololat nok Panghuꞌ ta Isa Al-Masih.
21 Si Timutic,
og duma u sok poginangan,
simalam-duwaa diniyu dunut niloꞌ Lukiyus,
Yason,
bu Sosipater,
ong mga salu-bangsa u.
22 Akon,
si Tertius,
ok solobuk gilug niyu sok kotombaꞌ ni Panghuꞌ Isa nok pingoni ni Pol moksulat nok taluꞌ in kini.
Dadi miksalam-duwaa u da sop diniyu.
23 Ongon da sop ong mikposampoy nok salam-duwaa nin,
yonin na si Gayus,
og gapuꞌ baloy nok pigonongan nami bu ok poglumpukan nong mga moktotombaꞌ sog jomaa nog Al-Masih dini.
Mikposampoy da sop nok salam diniyu si Erastus,
yonin na ok kiwakilan mongonggayd nok sin nok parinta sok siyudad kini.
Bu og gilug ta nok si Kuwartus miksalam-duwaa da sop diniyu.
24 Bung mayan diyon diniyu ok kolasa-kololat nok Panghuꞌ ta Isa Al-Masih.
Amin.
Ok Pokpudji ni Pol sok Tuhan
25 Na pudjihon ta ok Tuhan,
ong mokopopagon nok kotombaꞌ ta mounut song Mobais nok Suksugan nok pisampoyu diniyu.
Ong Mobais nok Suksugan kini pasal ni Isa Al-Masih ginantaꞌ na asal nok Tuhan,
sugaid pitampal na sog waktu kini.
26 Na ningkomun soliyan pa posampoyoy ok suksugan kini sog lam nong mga kobangsa-bangsahan mamaꞌ nok pidinsamaꞌ tumaluꞌ ong mga konabihan sok Kitab bu mounut sok suguan nok Tuhan ok solama-lama ongon.
Posampoyon og lapal kini pasal ni Isa dinilon bagun mongandol bu mogunut ilon diyanin.
27 Ok Tuhan,
ok tunggal nong mokokosun sok kotanan.
Bung mayan potason yanin solama-lama biyan ni Isa Al-Masih.
Amin.
Wassalam