Ok Totabangan posunguꞌ song mga Miskinan nong Moktotombaꞌ sog Jerusalem
16
Na ningkomun pogabit-abitan ta pasal sok pogbogoy niyu nok totabangan song mga pokasi niyu sukuꞌ nog Al-Masih sok siyudad nog Jerusalem.
Inang niyu da sop mamaꞌ nok sinuguꞌ u song mga jomaa nong mga moktotombaꞌ sok probinsiya nog Galatiya.
2 Dadi moksimpan ong monolokotow diniyu kada Gahad sog baloyin nok totabangan andun-andun mounut sog guntung nog gusahanin,
bagun bilaꞌ matongu na diyon,
sagad na kotanan.
3 Pogdatongu diyon pangoyon ku sog Jerusalem sima-sima towoy nok piniliꞌ niyu mogoyit nok totabangan dunut nong mga sulat mokpokilala bagun tolimaon ilon.
4 Bu bilaꞌ sok pikilan niyu mobais pa nong mampuꞌ u da sop,
na mokodunut ilon dinakon mangoy dituꞌ.
Ok Kolegan ni Pol Tumibow sok Siyudad nok Kurintu
5 Mikpikilu nong miyan song Makedonya,
bu tidu dituꞌ mangoyu diyon diniyu.
6 Kolegan ku nok kalu-kalu mobon ku diyon diniyu,
bu sunoy mokpobagaku pa tanan sampoy modoksuꞌ ok timpu tigdow diyon.
Dadi kotabangan niyu akon sok poktulaku sog ayin-ayin pa dapit og angoyan ku.
7 Sog waktu kini kolegan ku bosiya mobon ok kotibowu diniyu,
kanaꞌ u hadja miyan diyon bilaꞌ kumboyon ku da nok Tuhan.
8 Sugaid mokpobagaku pa sog Epesus sampoy modoksuꞌ na og Halilaya Lima puluꞌa.
9 Poꞌ mogimakatu nong modakol nong meleg monginongog bangka tombaꞌ sok pokposampoyu,
bisan modakol da sop ong mokosaggaꞌ dun.
10 Bilaꞌ matong si Timuti,
pohatuloy niyu yanin bagun daꞌdun ok kondokanin diyon diniyu,
poꞌ moktotolagad yanin sok Panghuꞌ ta niyu mamaꞌ da sop dinakon.
11 Dadi ondiꞌ niyu potiyangan nog ongon ok tow momabaꞌ-babaꞌ diyanin soliyanin diyon mognasihat diniyu.
Bu bilaꞌ gumonat na yanin,
tabangoy niyu nong mokpodayun yanin nok kopanowin nong mosannang bagun mokopuliꞌ yanin dini dinakon.
Poꞌ pigbagadan ku yanin dunut mga koilugan ta sok kotombaꞌ.
Mga Pomilin-milin sog Jomaa sok Kurintu
12 Dadi pasal sop sog gilug ta niyu sok kotombaꞌ nok si Apollosb,
pingangutu tokodoy nong mangoy yanin diyon diniyu dunut song mga duma nok koilugan ta sok kotombaꞌ.
Sugaid diꞌ pa yanin meleg mangoy diyon ningkomun,
tibuwa tumibow da yanin diniyu bilaꞌ mokoluhaya na.
13 Poghalliꞌ amu bagun diꞌ amu mokosimoy sok kotombaꞌ niyu!
Diꞌ amu tokodoy mondok,
bu popagas niyu ok pongatoyan niyu!
14 Inang niyu ok kotanan dunut kolasa!
15 Mikokosun amu nok si Istepanus bug mga salu baloyin ong mga mikuna tumombaꞌ sog Al-Masih diyon sok probinsiya nog Akaya,
bu miktolagad ilon song mga tow sukuꞌ nok Tuhan.
Dadi pongonihon ku diniyu mga koilugan ku sok kotombaꞌ,
16 mokpodiyalom amu sok poglokounutan nong maꞌ niyon nok tow sampoy song mga kodumahan ta nong moktolagad sok Tuhan mamaꞌ dinilon.
17 Landuꞌ tokodoy og loliyagu nong minatong dini siloꞌ Istepanus,
Poltunatu bu si Akaykus,
poꞌ ilon og gantiꞌ niyu tinumabang dinakon pagga ondaꞌ amu dini.
18 Pilasig nilon ok pongatoyan ku,
mamaꞌ da sop nok polasigon nilon amu.
Sumboy pogaddatan niyu ong mga tow nong mamaꞌ dinilon.
19 Na ong mga jomaa nong mga moktotombaꞌ sog Al-Masih sok probinsiya nog Bataꞌ-bataꞌ Asiya simalam-duwaa diniyu.
Si Akila bug libunin nok Prisilac bug lam nong mga moktotombaꞌ nong miktopuk-topuk sog baloy nilon,
mikposampoy da sop nok salam-duwaa diniyu poꞌ miksolobuk ilon kotanan diniyu sok kotombaꞌ ni Panghuꞌ Isa Al-Masih.
20 Ok kotanan nong mga koilugan ta niyu dini miksalam-duwaa diniyu.
Pogjara-jarahoy amu nong mosutsi.
21 Akon si Pol,
ong miksalam-duwaa kini diniyu.
Komotu tokodoy ok sinumulat dun.
22 Na sima-sima og diꞌ lumasa sok Panghuꞌ,
pogmulkaan yanin nok Tuhan.
“U Panghuꞌ,
pokpuliꞌ a na dini sog dunya.”
23 Bung mayan kolasa-kololatan amu nok Panghuꞌ ta Isa Al-Masih.
24 Kolasahan ku amu kotanan biyan sok kopoksolobuk ta niyu sog Al-Masih.
Amin!
Wassalam