1 Kurintu 15

Og Halgaꞌ nok Kotubuꞌ Mokpuliꞌ ni tidu sok Kopatoy

Na mga koilugan sok kotombaꞌ, popondomon ku diniyu ong nok pisampoyu diniyu. Tinabuk niyu bu toktob ningkomun binologbogan niyu. 2 Ong Mobais nok Suksugan kini, ong mokoawon diniyu basta onggaydan niyu pahatul ok kopongandol niyu. Sugaid bilaꞌ tumolikud amu dun, mogasta hadja ok kotabuk niyu niyon.

3 Pisampoyu diniyu ong mitabuku da sop nok pononduꞌ nong mohalgaꞌ tokodoy, yonin na nok si Isa minatoy para song mga ta mamaꞌ nok pidinsamaꞌ sumulat sok Kitab, 4 bu kinubul yanin, sugaid sog ikotolu ondow pitubuꞌ yanin puliꞌ, mamaꞌ da sop nok pidinsamaꞌ sumulat sok Kitab. 5 Puwas nituꞌ mikpotongow yanin ni , bu doksuꞌ sok tumpukan nok sopuluꞌ bu duwaꞌ nong mulidin. 6 Tubus mikpotongow sop si Isa sok tumpukan nog lima gatus nong mga koilugan ta sok kotombaꞌ. Ok kodakolan nong mikotongow diyanin kituꞌ totubuꞌ pa, sugaid og duma ondaꞌ na diya. 7 Doksuꞌ mikpotongow yanin dituꞌ ni Yaꞌkub, bu tubus mikpotongow na yanin sok kotanan nok kiwakilanin mokposampoy. 8 Sok kodoksuan mikpotongow na sop si Isa dinakon, bu inimungin akon nong mokpoposampoy bisan mamaꞌ u sopantun nog bataꞌ binataꞌ sok kanaꞌ pa bulanin. 9 Poꞌ akon ok kinobabaan nong mga ni Isa Al-Masih. Song motudin kanaꞌ u tanan daitan tawagon nong mokpoposampoy poꞌ tagnaꞌ pigbinsanaꞌ u ong mga , og ummatin.

10 Sugaid tidu sok nok pitongow nok Tuhan dinakon, inimungin akon nong mokpoposampoy. Bu kanaꞌ mogasta ok kolasa-kololatin dinakon, poꞌ labi pa ok tugosan ku mokposampoy nong tidu sog duma mga mokpoposampoy. Sugaid song motudin, kanaꞌ kini og bunga nok tiksaꞌ u, tibuwa tidu sok kolasa bug kololat nog binogoy nok Tuhan dinakon. 11 Saan na bisan akon atawa mga duma ta nong mokpoposampoy, yonin na kini ok pononduꞌ nok pignasihat nami song mga tow, bu yonin kini ok tinombaan niyu.

Ok Pokpotubuꞌ puliꞌ song mga Patoy

12 Na pagga ok pokposampoy nami diniyu nok pitubuꞌ puliꞌ og tidu sok kopatoy, manu ongon pa ma og duma diniyu moktaluꞌ nog daꞌdun da ok pokpotubuꞌ puliꞌ nok tow nong minatoy na? 13 Sugaid bilaꞌ soupama motud nog daꞌdun da ok pokpotubuꞌ puliꞌ tidu sok kopatoy, na ondaꞌ na sop bosiya potubuoy mokpuliꞌ og Al-Masih. 14 Bu bilaꞌ motud nog ondaꞌ potubuoy puliꞌ og Al-Masih, hati nin daꞌdun da og jatu nok pokposampoy nami, bu daꞌdun da sop og jatu nok kotombaꞌ niyu. 15 Bu bilaꞌ ondaꞌ bosiya potubuoy puliꞌ og Al-Masih, ong maana nin loput ong mga taluꞌ nami pasal sok Tuhan, poꞌ miktaluꞌ ami ma nok pitubuꞌ in puliꞌ og Al-Masih. Tibuwa bilaꞌ soupama daꞌdun ok pokpotubuꞌ puliꞌ tidu sok kopatoy kanaꞌ koyon motud. 16 Bilaꞌ daꞌdun ong minatoy nok potubuon mokpuliꞌ, na daꞌ na sop bosiya potubuoy mokpuliꞌ og Al-Masih. 17 Bu bilaꞌ ondaꞌ bosiya potubuoy mokpuliꞌ og Al-Masih, ong maana nin, daꞌdun tokodoy og jatu nok kotombaꞌ niyu, bu daꞌ amu pa bosiya koampun tidu song mga niyu, 18 bu bisan ong mga mingandol sog Al-Masih nong miwapat na, misiksaꞌ na bosiya. 19 Bilaꞌ soupama motud nog daꞌdun ok pokpotubuꞌ puliꞌ nong mga minatoy, ok pongandol bug pogdodama ta sog Al-Masih toktob da sok kotubuꞌ kini, bu labi bosiya mokololat-lolat ita niyu sok kotanan nong manusiyaꞌ.

20 Sugaid motud tokodoy nok pitubuꞌ puliꞌ si Al-Masih tidu sok kopatoy, bu yonin kini ong mokposobonnal nok potubuon puliꞌ nok Tuhan ong mga minatoy. 21 Poꞌ mamaꞌ nong minatong ok kopatoy biyan sok solokotow, ok pokpotubuꞌ puliꞌ minatong da sop pobiyan sok solokotow. 22 Poꞌ koongonan ita kotanan nok kopatoy pasal sog dusa ni Apuꞌ masa tagnaꞌ, sugaid potubuon ita da sop kotanan mokpuliꞌ pasal sok kopoksolobuk ta ni Isa Al-Masih. 23 Sugaid kanaꞌ batuk og waktu nok pokpotubuꞌ dinita mokpuliꞌ. Ong mikuna mitubuꞌ mokpuliꞌ, yonin na si Isa. Doksuꞌ pokpuliꞌ in dini sog dunya, potubuonin na ong mga piktowanin. 24 Tubus nituꞌ matong ok kodoksuan nog dunya, bu dagon ni Isa Al-Masih og lam nok kosultanan, mga migbayaꞌ bu mga taga kowasa, bangka nin wakilon ok pogbayaꞌ posunguꞌ sok Tuhan, og in. 25 Poꞌ sumboy mogbayaꞌ si Isa toktob sog dagon nog Gommaꞌ ong mga banta nin, bu moimung ilon mamaꞌ nog gontudan nog botisin. 26 Bilaꞌ modoksuꞌ in na dagon ok kotanan nituꞌ, mobolong na ok kopatoy. 27 Poꞌ tinaluꞌ sok Kitab nok pidiyalom nog og lam nog olo-olo diyanin. Tibuwa sok taluꞌ kini nog inuwakil na diyanin og lam nituꞌ, motampal nog daꞌ kosunuꞌ og Gommaꞌ dun. 28 Tibuwa bilaꞌ mopodiyalom na og lam sok pogbayaꞌ nog Al-Masih, yanin da sop tokodoy, og Bataꞌ, mokpodiyalom sok pogbayaꞌ nog Gommaꞌ in nong migbogoy diyanin sog lam nituꞌ. Dadi ok Tuhan, og Gommaꞌ, yonin na ok taga kowasa sok kotanan.

29 Na ongon og duma mga tow nok taga gaddat poliguon og ginawa nilon gantiꞌ para sog duma nilon nong minatoy. Pikilon ta podaliꞌ, olo ok pogdodamahan nilon malap dun? Bilaꞌ soupama diꞌ potubuon puliꞌ ong mga patoy, daꞌdun og jatu nin bisan poliguon sooy ong mga tow totubuꞌ gantiꞌ para sok kodumahan nilon nong minatoy. 30 Na pasal dinami da sop, bilaꞌ daꞌdun ok pokpotubuꞌ puliꞌ, manu atasan nami ma lolayun nong mogmula ami? 31 Poꞌ mga koilugan ku, piglillaꞌ u ok kotubuꞌ u sok kopatoy gondow-gondow. Motud ok taluꞌ u kini, bu motud da sop nong migloliyagu sog ininang diniyu ni Isa Al-Masih, ok Panghuꞌ ta niyu. 32 Na ok kibiyanan ku sok siyudad nog mamaꞌ sopantun nong miksinaggaoyu bug mga mobingis nog binatang. Bilaꞌ diꞌ da bosiya potubuon puliꞌ ong mga minatoy, sok ponontong nong manusiyaꞌ daꞌdun bosiya ong malap-alapu sok kobinsanaan ku koyon. Golom pa bosiya nog unuton na tibuwa ok ponaluon nog duma, “Mokpoduhul ita kuman bu moginum, poꞌ sunoy matoy ita lomaꞌ.”

33 Kanaꞌ amu tokodoy meleg akkalan sok taluꞌ mamaꞌ niyon poꞌ ok pogdunut-dunut song molaat nok tow, mokopoglaat nong mobais nok pongaddatan. 34 Tanud amu, pologdong niyu ok pikilan niyu, bu lotaꞌ amu mogdusa! Poꞌ ongon og duma diniyu nog ondaꞌ pa pokindan sok Tuhan. Mokosipog diniyu ok taluꞌ u kini.

Og Bayuꞌ-bayuꞌ nog Lawas pogdoksuꞌ Potubuon Mokpuliꞌ

35 Sugaid sunoy ongon ong moksak, “Ponoy pokpotubuꞌ puliꞌ nok Tuhan song mga minatoy? Bu olo ma og bayuꞌ-bayuꞌ nog lawas nog bogoyonin dinilon?” 36 Kodupangan ok sak koyon. Tulikoy niyu ong mga boniꞌ. Bilaꞌ mongodok amu, sumboy matoy og boniꞌ bagun motubuꞌ mokpuliꞌ. 37 Bu bisan olo og ginisan nog boniꞌ nog odokon niyu, paloy taꞌ atawa og len-len, bilaꞌ motubuꞌ na kini, selen na og bayuꞌ-bayuꞌ nok pomulan tidu sog boniꞌ nog inodok niyu. 38 Bogoyan nok Tuhan mamaꞌ sopantun nog bogu lawas song mga boniꞌ mounut sok koleganin. Dadi ginis-ginis og bayuꞌ-bayuꞌ nong mga pomulan bilaꞌ motubuꞌ og boniꞌ mounut sog ginisan nong mga boniꞌ.

39 Domikkiyan da sop song mga len-len nok piongon, kanaꞌ mogbatuk-batuk. Solen og bayuꞌ-bayuꞌ nong mga tow bug len da sop ong mga binatang, solen og bayuꞌ-bayuꞌ nong mga manuk-manuk bu len da sop ong mga sodaꞌ. 40 Og bayuꞌ-bayuꞌ nog lam nok piongon nong motongow sog langit bu sog lupaꞌ, ondaꞌ da sop pogbatuk. Miglologinis ok kolingkat nog bayuꞌ-bayuꞌ nilon. 41 Bisan og gondow, bulan bug mga bitun, daꞌ pogbatuk og lingkat nok sahaya nilon. Bu ong mga bitun mikobiddaꞌ da sop ok kosohaya nilon monolobuk.

42 Mamaꞌ nini ong mokobiyan bilaꞌ potubuon na puliꞌ ong mga patoy. Og lawas ta dini sog dunya ongon da ok toktobanin bangka mogoduꞌ da bu mobolong. Tibuwa, og lawas nog bogoyon dinita bilaꞌ potubuon ita mokpuliꞌ solama-lama diꞌ matoy. 43 Kubulon og lawas ta kini nong moludak na bu daꞌdun ok pagasin, sugaid potubuon kini mokpuliꞌ nok Tuhan nong mosahaya na bu mopagas. 44 Og lawas nok kinubul sukuꞌ nog dunya, sugaid ok potubuon puliꞌ sukuꞌ nok . Poꞌ mamaꞌ nog ongon og lawas dini sog dunya, tantu ongon da sop og bogu lawas nong nyawa ta nog dait sok surgaꞌ. 45-46 Kanaꞌ og lawas ta sog ahirat ong mikuna, sugaid og lawas ta dini sog dunya. Sumunuꞌ na og bogu lawas ta sog ahirat, poꞌ tinaluꞌ sog diyalom Kitab, “Ong mikuna nok tow si binogoyan nok Tuhan nok kotubuꞌ.” Sugaid si nok tinawag nog binayaꞌ nog Adam, og Ruh yanin nong mogbobogoy nok . 47 Na ong mikuna nog Adam tidu sog dunya bu inimung tidu sog lupaꞌ, sugaid og binayaꞌ nog Adam miktidu tokodoy sok surgaꞌ. 48 Ong mga ponupuꞌ ni Adam migbatuk-batuk da sog lawas nok pingapuꞌ nilon nog inimung tidu sog lupaꞌ. Sugaid ong mga mogogunut ni Isa Al-Masih nong miktidu sok surgaꞌ, mogbatuk-batuk da sop diyanin bu moimung da sop sukuꞌ sok surgaꞌ. 49 Sog bon nog dini ita pa sog dunya, migbatuk-batuk ita ni Adam nok tidu sog lupaꞌ, sugaid loma-dinglag mogbatuk-batuk ita ni Isa Al-Masih nok tidu sok surgaꞌ.

50 Mga koilugan ku sok kotombaꞌ, potampalon ku kini diniyu. Og lawas ta kini nok taga gungod bug duguꞌ ondiꞌ mokampuꞌ sok poꞌ matoy da bu moludak og lawas ta kini, saan daꞌdun ok kotubuꞌ in solama-lama. 51-52 Tibuwa ponginongog amu, suksugan ku amu nong mokosobuꞌ-sobuꞌ. Ondiꞌ mokobiyan og lam ta niyu kini nok kopatoy, sugaid gantian nok Tuhan og lawas ta kini sok sokodop mata bilaꞌ oyupon na ok tombuliꞌ kituꞌ! Poꞌ bilaꞌ potaluon na og binayaꞌ nok tombuliꞌ, ong mga mimatoy kituꞌ, potubuon mokpuliꞌ nog daꞌdun ok kodoksuanin. Bu sima-sima ok totubuꞌ pa sog waktu koyon, gantian da sop mogdayun og lawas nilon. 53 Poꞌ og lawas ta kini nong matoy bu moludak sumboy gantian nog lawas nog ondiꞌ matoy bu ondiꞌ moludak. 54 Dadi bilaꞌ og lawas ta kini nong moludak bu matoy kogantian na nog lawas nog diꞌ moludak bu diꞌ matoy, mounut na ok sinulat sok Kitab,

“Mobolong na ok kopatoy,

bu mialap na ok kopomondagan.

55 U kopatoy, daꞌdun na tokodoy ok kopomondagan nu.

U kopatoy, daꞌdun na tokodoy ok kowasa nu nog landuꞌ kobisa.”

56 Mobisa ok kopatoy pasal song mga ta niyu, bu motampal og dusa biyan sok pogdugtul ta sok saraꞌ nok Tuhan, saan na ongon ok kowasa nin humukum dinita. 57 Sugaid moksarang-sukul ita sok Tuhan nong mogbobogoy dinita nok kopomondagan sog dusa bug kopatoy biyan sok Panghuꞌ ta niyu ni Isa Al-Masih!

58 Saan mga koilugan ku kolasahan, popagon bu bologbogoy niyu ok kopongandol niyu. Pogmuhut-muhut amu lolayun moktolagad ni Panghuꞌ Isa poꞌ mikokosun amu nok kanaꞌ mogasta ok tiksaꞌ niyu para diyanin, sugaid mobais ok kodoksuanin.