Dungag Ponintuluꞌ pasal song mga Kopandoyan nok tidu sog Ruh nok Tuhan
14
Dadi pogmuhut-muhutoy niyu tokodoy ok poglasa-linasahoy.
Bu poktuyuoy niyu ong mga barakat nok pomogoy diniyu nog Ruh nok Tuhan,
labi-labi na ok kopandoyan mokposampoy nok taluꞌ nok podatongonin song mga duma nong moktotombaꞌ mamaꞌ nong mga nabi masa tagnaꞌ.
2 Na ok tow nog binarakatan nog Ruh nok Tuhan nok kopandoyan moktaluꞌ nog bahasa nog daꞌ in poganadoya,
moktaluꞌ yanin hadja posunguꞌ sok Tuhan biyan sok kowasa nog Ruh in.
Daꞌdun sok pokasi nin manusiyaꞌ ong mokosabut dun poꞌ binuni dinilon.
3 Sugaid ok tow nog binarakatan nok kopandoyan mokposampoy nok taluꞌ nok podatongon nog Ruh nok Tuhan diyanin,
moktaluꞌ yanin nong mokpopagon nok kotombaꞌ nong mga tow,
mokpobogan bu mokposannang nok pongatoyan nong mga duma nin.
4 Ok tow nog binarakatan moktaluꞌ nog bahasa nog daꞌ in sibon poganadoy,
og ginawa nin da ok polasigonin dun.
Sugaid ok kiwakilan nok kopandoyan mokposampoy nok taluꞌ nok podatongon nog Ruh nok Tuhan diyanin,
polasigonin og lam nong mga moktotombaꞌ sog jomaa.
5 Na bisan mamaꞌ niyon,
ok kolegan ku bosiya kobarakatan amu kotanan nok kopandoyan tidu sog Ruh nok Tuhan moktaluꞌ nong mga bahasa kituꞌ nog daꞌ niyu pa poganadoy.
Sugaid labi pa mobais bilaꞌ barakatan amu nok kopandoyan mokposampoy nok taluꞌ nok podatongon nog Ruh nok Tuhan diniyu,
mamaꞌ nong mga nabi masa tagnaꞌ,
bagun mopolasig ok kotombaꞌ nok tibuk nog jomaa diyon.
Ok tow nong mokposampoy nok podatongon diyanin koyon,
mosolag pa ok tabangin para song mga kodumahan niyu moktotombaꞌ gabaꞌ sok tow nog barakatan nok kopandoyan mokposampoy sog bahasa nog daꞌ in pa sibon poganadoy,
luwal da bilaꞌ ongon ok koilugan niyu kiwakilan mogmaana dun.
6 Na mga koilugan ku sok kotombaꞌ,
bilaꞌ mangoyu diyon diniyu mokposampoy sog bahasa nog diꞌ niyu mosabut,
olo bayuꞌ in ong malap-alap niyu nok kobaisan?
Tantu daꞌdun.
Sugaid bilaꞌ mangoyu diyon diniyu mokposampoy nok kokosun atawa ponintuluꞌ atawa mga taluꞌ nok podatongon dinakon nok Tuhan biyan sog bahasa ta niyu,
na mosabut niyu bu mokotabang koyon diniyu.
7 Poꞌ bisan ong mga lomotan nog gamiton mokpotukar,
mamaꞌ nok suling bug gitara,
ok tow nong mokpotaluꞌ dun sumboy mokposabut song mga monginongog bug olo kolanganoy nok potukaronin.
8 Olohon kokosun nong mga sundalu nok pitawag ilon posunguꞌ sok pogbunuan bilaꞌ kanaꞌ motampal ok pokpotaluꞌ nok tombuliꞌ nok pokposun dinilon?
9 Botangon ta amu,
bilaꞌ sumolap ok taluꞌ niyu,
ongon taꞌ ong mokosabut dun?
Mamaꞌ amu da miktaluꞌ nog daꞌdun og duma niyu,
bu mogasta hadja og lowoy niyu.
10 Modakol tokodoy og ginisan nog bahasa sog dunya kini,
bu ok kotanan niyon taga maana.
11 Sugaid bilaꞌ diꞌ u kosunan og bahasa nog len nok tow,
diꞌ ami na mokosinabut.
12 Saan na amu,
pagga pigmuhut-muhutan niyu ong mga kopandoyan nong mokobogoy nog Ruh nok Tuhan,
pogapasoy niyu ong mga kopandoyan nong mokopolasig nok kotombaꞌ nok tibuk jomaa.
13 Dadi bilaꞌ ongon ok tow nog binarakatan nog Ruh nok Tuhan moktaluꞌ nog len bahasa nog daꞌ in poganadoy,
sumboy yanin mongoni-ngoni nog barakatan da sop yanin nok kopandoyan mogmaana dun.
14 Poꞌ bilaꞌ mongoni-ngoni u song mamaꞌ niyon nog bahasa nok tidu sog Ruh nok Tuhan,
mingoni-ngoni ong nyawa u,
sugaid daꞌ kotosop sok pikilan ku.
15 Na pagga maꞌ niyon,
yonin kini og inangon ku.
Ongon og waktu nong mongoni-ngoni bu mokkolangan ku sog bahasa kituꞌ nog daꞌ kotosop sok pikilan ku nog binogoy dinakon nog Ruh nok Tuhan,
bu ongon og waktu nong mongoni-ngoni bu mokkolangan ku sog bahasa u tokodoy.
16 Na bilaꞌ moglumpuk-lumpuk amu mga moktotombaꞌ bu mokpudji amu sok Tuhan song mga mokosobuꞌ-sobuꞌ nog bahasa kituꞌ nog binogoy diniyu nog Ruh nok Tuhan,
na ondiꞌ mokampuꞌ tumabal nog “Amin” ong mga kodumahan niyu,
poꞌ diꞌ nilon mosabut og bahasa koyon.b
17 Tantu mobais tokodoy ok poksarang-sukul niyu sok Tuhan,
sugaid diꞌ da moksipagas ok kotombaꞌ nong mga kodumahan niyu dun,
poꞌ diꞌ nilon mosabut.
18 Song motudin,
bilaꞌ sala-sala u poggamiton ku ong mokosobuꞌ-sobuꞌ nog bahasa kituꞌ nog binogoy dinakon nog Ruh nok Tuhan labi na tidu diniyu,
bu miksarang-sukulu sok Tuhan pasal dun.
19 Sugaid sog waktu nok pokpulun-pulun nog jomaa nong mga moktotombaꞌ ni Isa Al-Masih,
golomu pa mokpituwa bisan dona lima toktang basta mosabut nilon,
tidu sok sopuluꞌ ngibu nog diꞌ nilon mosabut.
20 Na mga koilugan ku sok kotombaꞌ,
diꞌ amu mogginumbataꞌ sok pomikil niyu,
sumboy mogulang amu!
Tibuwa pasal sok kolaatan sumboy logilingan niyu ong mga bataꞌ popula nog daꞌdun sene-sabut nilon dun.
21 Misulat sog diyalom Kitab Sutsi,
taluꞌ nok Tuhan,
“Moktaluꞌ u song mga tow kini
biyan song mga tow nog len-len og bangsa bu miglen-len og bahasa
sugaid bisan maꞌ niyon
ondiꞌ da ilon monginongog dinakon.”c
22 Dadi ok kopandoyan moktaluꞌ nog bahasa nog daꞌ pa poganadoy,
og gindanan para song mga tow nog daꞌ tombaꞌ nog hukumon ilon.d
Sugaid ok kopandoyan mokposampoy nok Parman nok podatongon nog Ruh nok Tuhan song mga duma nong moktotombaꞌ,
og gindanan para song mga tow nok tinumombaꞌ,
kanaꞌ song mga tow nog ondaꞌ tombaꞌ.
23 Saan na bilaꞌ moglumpuk-lumpuk na og lam nong mga moktotombaꞌ,
bu moktaluꞌ ok ponolokotow diniyu song mga bahasa nong mokosobuꞌ-sobuꞌ koyon,
tubus ongon sumolod ong mga tow nok kulang ok kokosun nilon atawa ondaꞌ pa tombaꞌ sog Al-Masih,
na mokopoktaluꞌ ilon nog amu koyon mga bunogon.
24 Sugaid bilaꞌ sumolod ilon soliyan nog lam niyu mokposampoy nok taluꞌ nok podatongon nok Tuhan diniyu biyan song mismu nog bahasa niyu,
mokonanam ilon nog baldusa ilon sog lam nok taluꞌ niyu,
bu mobatik nilon nog dait ilon siksaon nok Tuhan.
25 Soliyan nilon monginongog,
mopotampal ong mibuni sog diyalom pongatoyan nilon.
Dadi sumudjud ilon dunut poksusun nilon bangka poksumba sok Tuhan.
Bu mangkon ilon nog diyon dodaꞌ diniyu ok Tuhan.
Ok Pogusoy-usoy nog Gaddat sok Poksombahayang
26 Saan na mga koilugan ku sok kotombaꞌ,
ok sosuku diniyu ongon og binogoy diyanin nog Ruh nok Tuhan.
Dadi bilaꞌ moglumpuk-lumpuk amu na,
og duma ongon ok kolangan nok pomudji sok Tuhan,
og duma sop moktonduꞌ yanin,
bu og duma da sop mokposampoy nok pitongow diyanin nok Tuhan.
Og duma binarakatan mokposampoy sog bahasa mokosobuꞌ-sobuꞌ kituꞌ,
bu ongon og duma nong mogmaana nok pokposampoyin koyon.
Inang niyu ok kotanan kini bagun moksipagon ong mga moktotombaꞌ.
27 Na bilaꞌ ongon og binarakatan mokposampoy sog bahasa mokosobuꞌ-sobuꞌ kituꞌ tidu sog Ruh nok Tuhan,
sumboy hadja duwaꞌ mangoy sok tolu kotow ong mokposampoy dun.
Moksukli-sukli ilon moktaluꞌ,
bu sumboy ongon ong mogmaana nok taluꞌ nilon.
28 Tibuwa bilaꞌ daꞌdun ok tow nong mokomaana nok taluꞌ koyon,
sumboy diꞌ ilon moktaluꞌ diyon sog jomaa niyu.
Sugaid potaluon ilon diyon sog diyalom pongatoyan nilon posunguꞌ sok Tuhan.
29 Na pasal song mga mokposampoy nok taluꞌ nok podatongon dinilon mamaꞌ nong mga nabi tagnaꞌ,
potiyangoy niyu moktaluꞌ og duwaꞌ atawa tolu kotow.
Bu ong mga duma diyon diniyu sumboy moktimbang-timbang bilaꞌ ok pokposampoy nilon tidu sog Ruh nok Tuhan atawa kanaꞌ.
30 Sugaid bilaꞌ ongon da sop matong nok Parman tidu sok Tuhan biyan sog len nok tow soliyan nog ongon ong moktaluꞌ,
sumboy lumotaꞌ ong miktaluꞌ kituꞌ,
bu sumukli og len nok tow kituꞌ moktaluꞌ.
31 Poꞌ bilaꞌ moksinuklihoy amu,
ok kotanan niyu mokoposampoy nok podatongon nok Tuhan diniyu bagun kotanan nong moginongog kumosun,
bu og lam niyu moksipagon sok kopongandol.
32 Bu ong mga nabi mogwakil ilon mokpodiyalom sog duma nilon nong nabi.
Dadi moksinuklihoy ilon da moktaluꞌ.
33 Poꞌ ok kolegan nok Tuhan,
ok pogusoy-usoy bug kosannangan.
Na mamaꞌ nok kolayaman sog lam nong mga jomaa nong mga moktotombaꞌ,
34 sumboy ondiꞌ moglimut ong mga kolibunan.
Ondiꞌ ilon kumboyon moktaluꞌ sog jomaa niyu,
sugaid mokpobabaꞌ ilon mamaꞌ da sop nok tinaluꞌ sok Kitab Sutsi.
35 Bilaꞌ meleg ilon kumosun sog olo-olo nituꞌ,
dituꞌ na ilon poksak sog laki nilon sog baloy,
poꞌ ondiꞌ tolop sok kolibunan moktaluꞌ sok poglumpuk-lumpuk nog jomaa niyu moktotombaꞌ.
36 Ong niyat niyu taꞌ nog amu ok piktiduhan nok Parman nok Tuhan,
atawa amu da tibuwa ok kidatongan dun?
37 Na bilaꞌ ongon diyon diniyu ong migniyat nong nabi yanin,
atawa nog binogoyan yanin nok kopandoyan nog Ruh nok Tuhan,
na sumboy kosunanin nok tidu sok Panghuꞌ ok sinulatu nok suguan kini.
38 Sugaid bilaꞌ diꞌ yanin tumabuk dun,
diꞌ da sop yanin tabukon.
39 Dadi mga koilugan ku sok kotombaꞌ,
pogmuhut-muhutoy niyu nog barakatan amu nok kopandoyan mokposampoy nok taluꞌ nok podatongon nog Ruh nok Tuhan song mga duma nong moktotombaꞌ,
mamaꞌ nok pidatongin song mga nabi masa tagnaꞌ.
Bu diꞌ niyu pogondian moktaluꞌ ok tow nog binarakatan mokposampoy diniyu sog bahasa nog daꞌ in pa poganadoy.
40 Sugaid sumboy inangon niyu ok kotanan nog olo-olo mahatul bu mogusoy-usoy.