Ok Poglasa
13
Bisan mokotaluꞌ u nong miglologinis nog bahasa nong mga tow atawa nong mga malaikat,
sugaid bilaꞌ daꞌdun da og lasa u,
daꞌdun og guna nok kopandoyan ku koyon.
Mamaꞌ u da hantang nong mobukag nog gagung atawa kulintangan nong mogokting.
2 Bisan kowakilan ku nok kopandoyan mokposampoy nok taluꞌ nok podatongon nog Ruh nok Tuhan dinakon,
bu bisan daꞌdun ok kulang sok kokosun ku,
bu motokkadu ong mga modalom nok kosobonnalan,
sugaid bilaꞌ daꞌdun og lasa u,
posabut dun daꞌdun og halgaꞌ u.
Bisan pa mopinda u og bontud sok kibotanganin pasal sok kosolag nok kotombaꞌ u,
sugaid bilaꞌ daꞌdun da og lasa u sok pokasi u,
posabut dun daꞌdun kobalan dinakon.
3 Bisan pomogoyu og lam nog gartaꞌ u para song mga miskinan,
bu bisan poglillaꞌ u og lawasu tutungon,
sokaliꞌ daꞌdun da og lasa u,
na daꞌdun da ong moalapu dun.
4 Ong motud nok poglasa mosabar,
mobais song mga duma,
kanaꞌ moima,
kanaꞌ mokpotas-potas bu kanaꞌ moabbu.
5 Ok poglasa kanaꞌ momabaꞌ-babaꞌ sog duma,
kanaꞌ modaliꞌ molingit bu kanaꞌ mogdodiyalom-atoy.
Bilaꞌ lumasa ok tow,
polabihonin ok kolegan nok pokasi nin tidu sok koleganin.
6 Ok tow taga poglasa ondiꞌ mogloliyag sog ginang molaat,
sugaid migloliyag sok kosobonnalan.
7 Ok poglasa lolayun moksandal nog olo-olo nituꞌ,
lolayun ongon ok pongandol bug pogdodama sok Tuhan sog lam nog olo-olo,
bu lolayun mosabar sog bisan olo sigpit nok kobiyananin.
8 Ok poglasa daꞌdun ok kodoksuanin.
Sugaid ok kopandoyan mokposampoy nok taluꞌ nok podatongon nog Ruh nok Tuhan song mga duma moktotombaꞌ mamaꞌ nong mga nabi masa tagnaꞌ,
ongon ok toktobanin.
Ongon da sop og waktu nong mobolong da ok kopandoyan mokposampoy sog bahasa nog daꞌ pa sibon poganadoy,
bu bisan ong modalom nok kokosun nong mga tow,
miyan da.
9 Poꞌ ok kokosun ta bu ok kopandoyan ta mokposampoy nok taluꞌ nok podatongon nog Ruh nok Tuhan,
sobahagiꞌ da.
Kanaꞌ pa pisabut dinita ok kotanan.
10 Sugaid bilaꞌ matong na og waktu nog jukupon na nok Tuhan og lam nituꞌ,
mobolong na ok kanaꞌ kituꞌ jukup.
11 Sog waktu nong mikaan ku pa,
ok koponaluꞌ u,
ok kopomikilu,
bu ok ponabutu,
ginumbataꞌ pa.
Sugaid dangan ginumulangu na,
binolongu na og gaddat ginumbataꞌ koyon.
12 Domikkiyan da sop,
ok pogilala u ningkomun sok Tuhan sobahagiꞌ pa bu mikaan,
sugaid matong da og waktu nong mojukup na ok pogilala u diyanin,
mamaꞌ nog ok Tuhan mojukup ok pogilala nin dinakon.
Ningkomun mamaꞌ nok tinumontong ita diyanin biyan sok solamin nong molobog,
sugaid motampal na kotanan bilaꞌ matong da og gondow nong madap ita sok Tuhan.
13 Dadi tolu ginis da og daꞌdun ok kodoksuanin,
yonin na ok pongandol,
pogdodama,
bug poglasa,
bu ok poglasa og labi mohalgaꞌ sog lam nituꞌ.