Sumboy Dogilingan ok Pokpobabaꞌ ni Panghuꞌ Isa
2
Kanaꞌ taꞌ mobogan ok pongatoyan niyu,
sabap sukuꞌ amu nog Al-Masih?
Kanaꞌ taꞌ nong migloliyag amu sabap poglasahonin amu?
Kanaꞌ taꞌ diyon diniyu og Ruh Mahasutsi,
bu ongon ok kolasa bug kololat niyu?
2 Dadi pagga maꞌ nituꞌ,
jukup niyu og loliyagu biyan sok poksolobuk nong niyat bug maksud niyu,
bu poglasa-linasahoy amu.
3 Bisan olo og inangon niyu,
diꞌ amu mokpolabi nog ginawa-baran niyu bu mokpobantug dun,
sugaid pokpobabaꞌ amu bu niyat niyu og len nok tow og labi tidu diniyu.
4 Kanaꞌ ok kobaisan niyu ok pikilon niyu,
sugaid ok kobaisan nog duma niyu.
5 Og gaddat-niyat niyu sumboy mamaꞌ ni Isa Al-Masih.
6 Bisan bonnal yanin nok Tuhan,
daꞌ in imakatoy ok kopatutin nog batuk yanin sok Tuhan,
7 sugaid piglillaꞌ in bangka nin pibabaꞌ og ginawa nin.
Mikpohantang yanin gulipon,
bu binataꞌ yanin sog bayuꞌ-bayuꞌ nong manusiyaꞌ.
8 Dangan miimung na yanin nong manusiyaꞌ,
pibabaꞌ in bu piglillaꞌ in og ginawa nin sok kolegan nok Tuhan toktob sok kopatoy biyan sok poglansang diyanin sok kayu.
9 Dadi piotas yanin nok Tuhan,
bu binogoy diyanin ong ngalan nong motas tidu sok kotanan
10 bagun sok poglabit nong ngalan ni Isa,
sumudjud og lam nong mga dituꞌ sok surgaꞌ bug dini sog dunya,
sampoy sog diyalom nog lupaꞌ,
11 bu mangkon ilon nok si Isa Al-Masih ong mogbayaꞌ.
Dadi biyan dun potason ok Tuhan,
og Gommaꞌ ta.
Sumboy Dumait ok Kotubuꞌ sok Kotombaꞌ
12 Na pagga maꞌ nituꞌ mga kolasahan ku,
bisan daꞌ u na diyon,
mogdayun amu pa mogunut sok kolegan nok Tuhan mamaꞌ nog diyon ku pa diniyu.
Pogmuhut-muhut amu moginang nog dumait sok pogawon nok Tuhan diniyu dunut gondok niyu diyanin.
13 Poꞌ ok Tuhan dodaꞌ ong mogoginang sok pongatoyan niyu,
bu bogoyanin amu nog leg bug pagas bagun mokinang amu nong mokososuat diyanin.
14 Bisan olo-olo og inangon niyu,
diꞌ amu mokkumong-umong bu moksuwal
15 bagun sutsi bu mokologdong amu bu diꞌ kotuntutan.
Poꞌ amu og gumbataꞌ nok Tuhan bisan kilibutan amu nong mga pokasi niyu nong molaat bu molikoꞌ ok pikilan nilon.
Amu mamaꞌ nok tiyow nok sinumahaya dinilon dini sog dunya
16 kobon niyu mokpoposampoy nok Parmana nong mokobogoy nong mosannang nok kotubuꞌ.
Dadi sog gondow nong mokpuliꞌ og Al-Masih,
mogloliyagu nog daꞌ pogasta og ininangu diniyu.
17 Pasal sok kotombaꞌ niyu sog Al-Masih,
poglillaꞌ niyu og ginawa-baran niyu sok kolegan nok Tuhan.
Na ok kotombaꞌ niyu,
mamaꞌ sopantun nok kurban bogoyon sok Tuhan.
Dadi bisan pa mobuyus og duguꞌ u sok kopatoy mamaꞌ hantang nok kurban dunut kurban nok kotombaꞌ niyu,
mogloliyagu da dunut diniyu.
18 Domikkiyan da sop,
sumboy amu mogloliyag dunut dinakon.
Mangoy si Timuti bu si Epaprudi sok Pilipi
19 Bilaꞌ duhulon da ni Panghuꞌ Isa,
pangoyon ku diniyu si Timuti sok Pilipi nong mosompun,
bagun sok pokpuliꞌ in loliyagon ku nok suksuganin pasal diniyu.
20 Daꞌdun og duma u nong mamaꞌ ni Timuti nong mokpikil da sop tokodoy sok kopiyahan niyu.
21 Poꞌ ok pilabi nog duma,
og leg hadja nog ginawa-baran nilon,
kanaꞌ og leg ni Isa Al-Masih.
22 Tibuwa kiosunan niyu nok si Timuti kopongandolan.
Mamaꞌ nog bataꞌ bug gommaꞌ,
tinabanganin akon mokposampoy nong Mobais nok Suksugan.
23 Dadi bilaꞌ motantu u na ok koposunguan nok kobotang-botangu dini,
kolegan ku bosiya,
pangoyon ku yanin diniyu,
24 bu mingandolu ni Panghuꞌ Isa nong mangoyu da sop diyon nong mosompun.
25 Na mipikilu nok sumboy pulion ku diniyu og gilug taꞌ niyu nok si Epaprudi nok piangoy niyu dinakon bagun mongaku nong mga kulang-kabusu.
Dinumahanin akon sog ginangu,
bu miimung ami mamaꞌ nog duwaꞌ sundalu momologbog nok Parman nok Tuhan.
26 Populion ku yanin diniyu poꞌ ginindowin na og lam niyu,
bu misasow ok pikilanin poꞌ midongog niyu nong milongkoꞌ yanin.
27 Na motud sop dodaꞌ nong milongkoꞌ yanin,
bu matoy bosiya yanin dun.
Sugaid kilolatan yanin nok Tuhan,
bu kilolatanin da sop akon,
poꞌ mogidud bosiya ok kosusahan ku bilaꞌ matoy yanin.
28 Saan na melegu tokodoy populion yanin diniyu,
bagun mogloliyag amu bilaꞌ motongow niyu yanin,
bu moksibogan na ok kosusahan ku.
29 Dadi tolimaꞌ niyu yanin dunut mosolag nog loliyag poꞌ mogilug amu sok Panghuꞌ,
bu pogaddatan niyu ok tow mamaꞌ diyanin.
30 Poꞌ pasal sog ginangin sog Al-Masih moglam-lam yanin matoy,
poꞌ piglillaꞌ in ok kotubuꞌ in bagun mojukup ok poktabang niyu dinakon.