Si Panghuꞌ Isa ok Pongandolan sok Pogawon
3
Na kosukpatan ku mga pigilugan,
pogloliyag amu pasal sok poksolobuk niyu sok Panghuꞌ.
Diꞌ u da motonop moksulat puliꞌ diniyu nog lam nini,
bu mokobais pa koyon diniyu.
2 Poghalliꞌ amu song mga molaat nong mognanasihat nong miktonduꞌ nok kanaꞌ mologdong,
poꞌ taluꞌ nilon nog diꞌ motolimaꞌ nok Tuhan ok kolakihan nok kanaꞌ Yahudi basta daꞌ pa koislam.
Dadi togolon nilon nog islamon bisan amu mga len bangsa nok kanaꞌ wajib dun.
3 Tibuwa ong motudin,
ita ong mga mogogunut ni Isa ong mitolimaꞌ nok Tuhan.
Mikpudji ita sok Tuhan biyan sog Ruh nin,
bu si Isa Al-Masih da ok pongandolan ta sok pogawon bisan miislam na atawa ondaꞌ,
kanaꞌ na ok pogunut ta sok saraꞌ.
4 Bilaꞌ ongon ok tow mokpikil nog ongon ok sabapanin moawon pasal sok kobotang-botang nog ginawa nin,
na labi u na.
5 Poꞌ inislamu na sog walu ondowu pa.
Misukuꞌ u nog bangsa Israel,
ok ponupuꞌ u ni Nabi Yaꞌkuba tidu sog bataꞌ in nok si Benhamin.
Bu bilaꞌ molabit ok pasal sog Yahudi,
na Yahudi u tokodoy.
Pasal sop sok pogunutu sok saraꞌ,
tinuman ku tokodoy,
poꞌ solobuku sok tumpukan nong mga Parisi.
6 Landuꞌ ok pomologbogu sog agama Yahudi boyaan piminsanaꞌ u tokodoy ong mga moktotombaꞌ ni Isa.
Bilaꞌ ongon ong moitung mologdong biyan sok pomologbogin sok saraꞌ,
ondiꞌ u kotuntutan.
7 Sugaid ok pingandolan ku kituꞌ tagnaꞌ nog baluꞌ u mokopogawon dinakon,
initungu na kolugian sabap sog Al-Masih.
8 Ong motudin,
og lam nituꞌ,
initungu na nok kolugian bilaꞌ pogbatukon sog landuꞌ kohalgaꞌ kituꞌ nong mikokilala u ni Isa Al-Masih,
ok Panghuꞌ u.
Sabap diyanin,
tolikudan ku na og lam nituꞌ,
bu initungu na nog daꞌdun og halgaꞌ in bagun mosukuꞌ u ni Isa Al-Masih,
9 bu bagun mokopoksolobuku diyanin.
Kanaꞌ u mopologdong biyan sok kounutu sok saraꞌ agama,
sugaid mopologdongu tidu sok kopongandolu sog Al-Masih.
Ok kologdong koyon miktidu sok Tuhan poꞌ initungin ok tow mologdong biyan sok kopongandolin sog Al-Masih.
10 Kolegan ku kolilahan ku mahatul og Al-Masih bu monanamu ok kowasa nok Tuhan nong mikopotubuꞌ puliꞌ diyanin tidu sok kopatoy.
Kolegan ku sumolobuk diyanin biyan sok kobinsanaan bisan matoyu sooy mamaꞌ diyanin.
11 Dadi bung mayan potubuon ku da sop nong mosannang tidu sok kopatoy sog gondow binayaꞌ.
Sumboy Popagonon ok Pongandol toktob sok Kodoksuan
12 Kanaꞌ ong maana u nong mialapu na og lam niyon,
atawa jukupu na,
sugaid pogmuhut-muhutan ku nong mounut og gantaꞌ ni Isa Al-Masih dinakon,
poꞌ inimungin akon ok sukuꞌ in.
13 Mga pigilugan,
ondaꞌ u pogniyat nog jukupu na,
sugaid kini da og gawoyu,
tolikudan ku ong mga miniyan,
bu pogmuhut-muhutan ku og hal-hiwal lomaꞌ-dinglag.
14 Mopononggiꞌ sok poglumbaꞌ,
pogmuhut-muhutan ku monamal gumobok toktob sok tamanan bagun malapu ok tumbasu sok surgaꞌ.
Yonin ok pidinsamaꞌ dinita nok Tuhan biyan ni Isa Al-Masih.
15 Ong mga mokopagon na ok kotombaꞌ in,
sumboy maꞌ niyon ok pokpikilon ta.
Na bilaꞌ kanaꞌ maꞌ niyon ok pokpikilon niyu,
potampalon da koyon diniyu nok Tuhan.
16 Sugaid sumboy hadja dayunon ta niyu bologbogan ok pinonduꞌ nok kiosunan ta na.
17 Mga pigilugan,
poglogiling amu dinakon,
bu tulikan niyu sop ong mga tow nong miglogiling sok suntuan nog binogoy nami diniyu.
18 Poꞌ modakol ong mingangkon nong mogogunut ilon ni Isa,
sugaid motongow sok pogoyit nilon nong mononaggaꞌ ilon diyanin,
poꞌ daꞌ nilon bogoyoy nog halgaꞌ ok kopatoy ni Isa sok kayu.
Lolayun ku na koyon taluon diniyu,
bu ningkomun taluon ku na sop puliꞌ dunut luwaꞌ u.
19 Na kosiksaan ok koposunguan nilon.
Ong napsu ok piktuhanan nilon,
bu binantug nilon ong mga ginang nilon nong mokosipog.
Ok pinikil nilon og olo-olo na hadja nog dini sog dunya.
20 Sugaid ita,
ok surgaꞌ og bonuwa ta tokodoy,
bu tidu diyon binagadan ta ong Mogogawon,
yonin na si Panghuꞌ Isa Al-Masih.
21 Og lawas ta kini nok taga kopatoy,
gantionin nog batuk-batuk nog lawasin sok surgaꞌ.
Moinangin koyon pasal song mosolag nok kowasa nin boyaan kopogbayaanin og lam nituꞌ.