Ok Pomilin
4
Dadi mga pigilugan nok kolasahan bu ginindowu,
pokpotattap amu sok kotombaꞌ niyu sok Panghuꞌ.
Amu og loliyagu bu maꞌ hantang tumbas nong mga ginangu.
2 Pongonihon ku diniyu Ewodiya bug Sintika nok poksulut amu poꞌ sukuꞌ amu nok Panghuꞌ.
3 Pongonihon ku da sop dinika,
og duma u sok poginang nog dumait ong ngalan nu Sinsigus,a
tabangoy nu ong mga kolibunan koyon!
Poꞌ mitiksaꞌ ilon koyon mogunut dinakon mokposampoy nong Mobais nok Suksugan dunut ni Klemen bug duma pa mogoginang nong misulat ong mga ngalan nilon sok Kitab Kotubuꞌ.b
4 Pogloliyag amu lolayun poꞌ misukuꞌ amu sok Panghuꞌ!
Taluon ku puliꞌ,
pogloliyag amu!
5 Potongow niyu sog lam nok tow ok kosabar nok pongatoyan.
Posunguꞌ na matong ok Panghuꞌ.
6 Diꞌ amu mosusa nog olo-olo,
sugaid og lam nituꞌ posun niyu sok Tuhan biyan sok pongoni-ngoni dunut poksarang-sukul.
7 Na bilaꞌ moinang niyu ong mamaꞌ niyon,
monanam nok pongatoyan niyu ok kosannangan nok Tuhan nog lumabi pa sok ponabut nong manusiyaꞌ.
Ok kosannangan koyon,
yonin na ok pononding nok pongatoyan bug pikilan niyu pasal sukuꞌ amu ni Isa Al-Masih.
8 Na mga pigilugan,
liyu niyon,
polabihon niyu bug olo ong motud,
mopatut halgaan,
mologdong,
sutsi,
mobais,
bu mokososuat song mga tow.
Og lam nog dait sangliton koyon,
sumboy pomikilon niyu.
9 Ok piganadan bu mitabuk niyu,
midongog bu mitongow niyu tidu dinakon,
inang niyu.
Bu modiyon diniyu ok Tuhan nong mogbobogoy nok kosannangan.
Ok Poksarang-sukul ni Pol sok Poktabang nilon diyanin
10 Migloliyagu tokodoy sok Panghuꞌ poꞌ pitongow niyu na puliꞌ bug andun ok kosolag nok kolasa-kololat niyu dinakon biyan sog binogoy niyu koyon.
Lolayun niyu akon mopikil,
sugaid daꞌdun hadja og waktu niyu mokpotongow dun.
11 Daꞌ u koyon taluoy sabap sog ongon ok kulang dinakon,
poꞌ kinumosun ku moksarang-sukul bisan ponoy ok kobotang-botangu.
12 Kibiyanan ku na ok kiondaan atawa mikkoongonan.
Dadi bisan olo-olo ok kobotang-botangu,
kiosunan ku na bug ponoy ok pogoyit dun,
ok taga kan atawa daꞌdun,
moglabi-labi atawa kulang.
13 Kosandalan ku og lam nituꞌ sabap sok poksolobuku sog Al-Masih ong migbogoy dinakon nok pagas.
14 Tibuwa minsan maꞌ nituꞌ,
mobais nok kipoyitan niyu akon nok tabang sok kosigpitan ku.
15 Kiosunan niyu na nok tidu sog waktu nong miktagnaꞌ u mokposampoy nong Mobais nok Suksugan diniyu sog lungsud nok Pilipi,
bu poggonatu sok probinsiya niyu nong Makedonya,
og jomaa niyu da ok tinumabang sok ponggastu u.
16 Bisan sog waktu nog dituꞌ u pa sog lungsud nok Tesalonika,
kanaꞌ hadja insan ok tabang niyu dinakon.
17 Kanaꞌ nong miktaluꞌ u nong mamaꞌ nini pasal nong mingangutu nok tabang niyu dinakon,
sugaid bagun mogdungag ok tumbas niyu tidu sok Tuhan pasal sog ginang niyu nong mobais.
18 Na jukup na og lam nok kogunahan ku,
bu miglabi pa tanan,
poꞌ mitabuku na tidu ni Epaprudi ok tabang nok pinoyit niyu dinakon.
Ok poktabang niyu kini mamaꞌ nok kurban nok kosuatan ok Tuhan bu tabukonin.
19 Na bogoyon diniyu nok Tuhan og lam nok kogunahan niyu tidu sog daya nin nog diꞌ motokkad poꞌ misolobuk amu ni Isa Al-Masih.
20 Ok Tuhan,
og Gommaꞌ ta niyu patut potason solama-lama.
Amin.
Ok Poksalam-duwaa ni Pol
21 Na posampoy niyu sog lam nong mga sinutsi nok sukuꞌ ni Isa Al-Masih diyon ok salam-duwaa nami.
Ong mga pigilugan nog dini dinakon,
sinumalam da sop diniyu.
22 Og lam nog duma nok sukuꞌ ni Isa Al-Masih dini miksalam-duwaa da sop diniyu,
labi na ong mga salu baloy nok Sultan sog Rum.
23 Bung mayan modiyon sok pongatoyan niyu ok kolasa-kololat ni Panghuꞌ Isa Al-Masih.
Amin.
Wassalam