Ok Pituwa song mga Mokogulang bug Gumbataꞌ
6
Dadi amu mga gumbataꞌ,
tombaꞌ amu sog duwaꞌ mokogulang niyu pasal sok kosolobuk niyu sok Panghuꞌ,
poꞌ yonin koyon ong mologdong inangon.
2-3 Tinaluꞌ nok Tuhan sok Kitab,
“Pogaddatoy niyu og gommaꞌ bug ginaꞌ niyu bagun mobais ok kobotang-botang niyu,
bu mopayat og gumul niyu sog dunya.”
Yonin koyon ong mikuna nok suguan nok Tuhan dunut janjiꞌ nok tumbas.
4 Bu amu sop duwaꞌ mokogulang,
naꞌ niyu kobingisan ong mga gumbataꞌ niyu bagun diꞌ nilon amu sungginon.
Sugaid ipaton niyu ilon mahatul dunut nok pokpaat bug ponintuluꞌ mounut sog leg nok Panghuꞌ.
Ok Pituwa song mga Gamu bug mga Gulipon
5 Amu sop mga gulipon,
tombaꞌ amu sog gamu niyu bu pogaddatoy niyu ilon dunut gondok.
Inang niyu nog ikhlas,
nong mamaꞌ da nok si Isa Al-Masih ok tinolagad niyu.
6 Poginang amu bisan diꞌ nilon amu motongow,
kanaꞌ sop hadja bagun amu sangliton,
sugaid unut niyu ok kolegan nok Tuhan nog ikhlas sok pongatoyan niyu pasal gulipon amu nog Al-Masih.
7 Dadi poginang amu dunut loliyag nong mamaꞌ hantang nok Panghuꞌ ok piktolagadan niyu,
kanaꞌ ong mga tow.
8 Pikil niyu nok tumbasan nok Panghuꞌ og ginang nong mologdong song monolokotow dinita,
bisan og gulipon atawa kanaꞌ.
9 Amu sop mga gamu,
pohatuloy niyu ong mga gulipon niyu.
Diꞌ niyu ilon pongondokon poꞌ kiosunan niyu nok solobuk da ok Panghuꞌ niyu dituꞌ sok surgaꞌ,
bu daꞌdun ok polabihonin.
Ong mga Gamit Ponaggaꞌ sog Iblis
10 Dadi kosukpatan ku,
pogot niyu ok kotombaꞌ niyu sok Panghuꞌ ta bu sok kopagas nok kowasa nin.
11 Maꞌ sopantun nok sundalu,
solug niyu ong mga gimu nok Tuhan nog binogoyin diniyu,
bagun niyu kosaggaan ok ponassat nog Iblis poꞌ landuꞌ ok pongakkalin.
12 Poꞌ og duma ta kini mogbunuꞌ,
kanaꞌ ong mga manusiyaꞌ,
sugaid ong mga migbayaꞌ bug miglokounutan nog diꞌ motongow,
mga soytan nok taga kowasa sok kodoloman sog dunya kini bu sog langit.
13 Saan na solug niyu og gimu pononding nog binogoy nok Tuhan diniyu bagun mokatu amu sog lam nituꞌ,
bu diꞌ amu kotokkowan bilaꞌ mosugat amu nok kolaatan nog Iblis.
Dadi bisan ponoy ok kologon nok ponassat,
kosaggaan niyu,
bu moksipagon amu pa.
14 Saan na pongatu amu.
Imung niyu ok kosobonnalan mamaꞌ nok sobitan sog gawak niyu bagun mopodinsamaꞌ amu,
bu solug niyu og dogdoy bosi sog digdob niyu,
yonin na ok kologdongan nok tidu sok Tuhan.
15 Bu sumboy andam amu mokposampoy nong Mobais nok Suksugan pasal sok kosannangan bisan olo waktuhoy,
yonin na koyon hantang sopatus niyu nong mokpobais nok kopanow niyu.
16 Tubus gamit niyu da sop ok kotombaꞌ niyu sog Al-Masih,
poꞌ yonin na koyon og hantang taming nong mokopalong nog gapuy sok panaꞌ nog Iblis.
17 Bu ok pongandol niyu sok pogawon nog binogoy diniyu nok Panghuꞌ,
imung niyu maꞌ nok saduk bosi pononding nog gulu niyu.
Gamit niyu da sop ok kalis nog Ruh Mahasutsi,
nog yonin na ok Parman nok Tuhan.
18 Sumboy lolayun amu mongoni-ngoni sog lam nituꞌ biyan sok tabang nog Ruh nok Tuhan.
Poghalliꞌ amu bu diꞌ amu lumotaꞌ mongoni-ngoni para sog duma niyu mga sukuꞌ nok Tuhan.
19 Pongoni-ngonihoy niyu da sop akon sok Tuhan nog bilaꞌ mognasihatu,
bogoyan ku nok Tuhan nok taluon ku bagun motowakkalu mokposampoy nong Mobais nok Suksugan nok pitampalin na.
20 Pasal sok pokposampoyu sog Al-Masih,
mipirisu u ningkomun.
Saan na pongoni-ngonihoy niyu pa akon nog ongon ok koboluꞌ u moktaluꞌ mounut sog inuwakil dinakon.
Ok Pomilin
21 Piangoyu diyon diniyu si Tikikus,
og gilug ta nok kolasahan bu kopongandolan nok sosuguon sog ginang nok Panghuꞌ.
Dadi yanin na ong moksuksug diniyu pasal dinakon,
bagun niyu da sop kosunan bug olo ok kobotang-botangu dini bu pasalan sog ginangu.
22 Pasal niyon piangoyu yanin diniyu,
bagun posunonin ong mga olo-olo pasal dinami dini bu polasigonin sop ok pongatoyan niyu.
23 Mga koilugan ku,
bung mayan lolayun modiyon diniyu ok kosannangan,
kolasa bug kotombaꞌ tidu sok Tuhan og Gommaꞌ ta bug Panghuꞌ ta niyu Isa Al-Masih.
24 Mura-murahan lolayun kobogoyan da nok kolasa-kololat og lam nok tattap linumasa sok Panghuꞌ ta Isa Al-Masih.
Wassalam