Ong Mosannang nok Kotubuꞌ diyon sok Kodolagan
5
Saan na poktuyuoy niyu tokodoy pogdogilingan ok pongaddatan nok Tuhan,
pagga inimungin amu nog gumbataꞌ in nok kolasahan.
2 Poglinasahoy amu mamaꞌ nok kolasa nog Al-Masih dinita.
Poꞌ piglillaꞌ in ong nyawa nin pasal dinita,
mamaꞌ hantang yanin nok kurban nok kisuatan ok Tuhan dun.
3 Dadi pagga sukuꞌ amu na ma nok Tuhan,
sumboy diꞌ amu na tokodoy mogjina,
moginang nog len nok kolomuꞌ-lomuꞌ atawa monapsu,
poꞌ kanaꞌ koyon mobais nog dongogan pasal sok sinutsi nok sukuꞌ nok Tuhan.
4 Sumboy daꞌdun ong moglabit diniyu nok kolomuꞌ-lomuꞌ,
sumolap nok taluꞌ atawa gansoy nong mokosipog-sipog nok kanaꞌ dumait diniyu.
Sugaid sumboy moksarang-sukul amu sok Tuhan.
5 Poꞌ motantu niyu,
ong mga polojina,
bu mga mokolomuꞌ-lomuꞌ nok tow,
diꞌ na dodaꞌ mokampuꞌ sok Pomarinta nog Al-Masih bug Tuhan.
Maꞌ niyon da sop ong mokonapsu nok tow,
poꞌ imungon nilon ong mga olo-olo nituꞌ nok tuhan nilon.
6 Ong mga monginang nong maꞌ niyon dumugtul ilon sok Tuhan.
Dadi naꞌ amu meleg dupangon sok sumolap nok taluꞌ nog bisan sima towoy bagun ondiꞌ amu moyit dun,
poꞌ pogmulkaan da nok Tuhan ong maꞌ niyon nok tow.
7 Saan na,
diꞌ amu tokodoy mampuꞌ song mga tow nong monginang nong mamaꞌ nituꞌ kituꞌ.
8 Sok tagnaꞌ kituꞌ diyon amu pa sok kodoloman,
sugaid ningkomun diyon amu na sok kodolagan pasal tinumombaꞌ amu na sok Panghuꞌ.
Dadi ponginang amu nong mopatut sok tow nog diyon sog diyalom kodolagan.
9 Poꞌ og bunga nok kodolagan motongow sog lam nog ginang nok kobaisan,
kologdongan bug kosobonnalan.
10 Dadi pongmuhut-muhutan niyu kosunan bug olo og ginang nong mogloliyag ok Panghuꞌ dun.
11 Diꞌ amu monginang nog daꞌdun og guna nin mamaꞌ nok pinginang nok tow nog diyon sok kodoloman.
Golom pa mogdayun amu pa moginang nong mobais bagun motampal ok kolaat nog ginang nilon.
12 Poꞌ ok pinginang nilon nong mibuni mokosipog bisan moagi hadja nong mga tow.
13 Tibuwa kobuyaan da og lam bu tumampal da bilaꞌ kopollagan na nog dolag.
14 Poꞌ ong modolom,
mopinda song modolag bilaꞌ kosilowan.
Saan na ongon ok ponaluon kini,
“Tanud amu na mga mitulug,
pogbuwat amu mga mamaꞌ hantang nok patoy,
bu kosilowan amu nok sahaya nog Al-Masih.”
15 Dadi pokpotubud amu bug ponoy amu moglokotubuꞌ.
Diꞌ amu mogdogiling song mga tow nog daꞌdun kokosunin pasal sok Tuhan,
sugaid sok tow nok taga kokosun.
16 Diꞌ niyu pogastahan og waktu niyu,
sugaid pogimakatan niyu sok kobaisan poꞌ modakol ok kolaatan sog dunya sog waktu kini.
17 Dadi diꞌ amu na monginang nok kodupangan,
sugaid poganadoy bu sabut niyu ok kolegan nok Panghuꞌa.
18 Diꞌ amu moglangu-langu,
poꞌ mokopoglaat koyon sok kotubuꞌ niyu.
Sugaid pokpobayaꞌ amu sog Ruh nok Tuhan.
19 Bilaꞌ ongon og lumpuk-lumpukan niyu,
pogabit-abit amu nok tidu sog diyalom nok Kitab.
Bu sog ikhlas nok pongatoyan niyu pogbobatan niyu nok kolangan tidu sok Kitab Jabur bug len pongpudji sok Pogbayaꞌ-bayaꞌ nong miktidu sog Ruh nin.
20 Sog lam nog olo-olo,
poksarang-sukul amu lolayun sok Tuhan,
nog Gommaꞌ ta pasal sok kosolobuk ta sok Panghuꞌ ta Isa Al-Masih.
21 Mokpobabaꞌ amu song monolokotow diniyu pasal sok pogaddat niyu sog Al-Masih.
Pituwa song mga Moglaki-bini
22 Dadi amu mga kolibunan,
pokpobabaꞌ amu sog laki niyu mamaꞌ nok kopokpobabaꞌ niyu sok Panghuꞌ Al-Masih.
23 Poꞌ og laki ok kounutan nog libunin,
mamaꞌ nog Al-Masih ok Panghuꞌ nong mga sukuꞌ in bu ong Mogogawon dinilon.
24 Dadi mamaꞌ hantang nok kopokpobabaꞌ nong mga moktotombaꞌ sog Al-Masih,
sumboy mokpobabaꞌ og libun diyon sog laki nin sog lam nituꞌ.
25 Amu mga kolakihan,
sumboy kolasahan niyu og libun niyu,
mamaꞌ hantang nog Al-Masih landuꞌ kolasa sog ummatin bu atasin piglillaꞌ ong nyawa nin pasal dinilon.
26 Piglillaꞌ in bagun moimungin ilon sutsi.
Pilissinin ilon biyan sok pokpoliguꞌ bug Parman nok Tuhan.
27 Saan na ininangin koyon bagun tabukonin ita niyu mga sukuꞌ in nog daitan sumolobuk diyanin,
hantang pongantim nog libun molingkat bu sutsi nog daꞌdun mosilaꞌ dun.
28 Dadi amu mga kolakihan maꞌ nituꞌ da sop,
sumboy kolasahan niyu ong mga libun niyu,
mamaꞌ nok kolasa niyu sog ginawa-baran niyu.
Sima-sima ong molasa sog libunin,
molasa da sop sog ginawa nin.
29 Poꞌ daꞌdun sibon ok tow nog diꞌ molasa sog ginawa nin,
sugaid pokanonin bu ipatonin na dodaꞌ.
Mamaꞌ da sop niyon ok pogipat nog Al-Masih sog ummatin.
30 Poꞌ ita niyu kini hantang langkap sog lawasin.
31 Na pasal sok poglaki-bini,
mamaꞌ nini ok sinulat sok Kitab,
“Sumuwoy og laki sog gommaꞌ bug ginaꞌ in bu mampuꞌ sog libunin,
bangka ilon poksolobuk.”b
32 Ok sinulat kini modalom ong maana nin,
poꞌ miktaluꞌ u pasal sog Al-Masih bug ummatin.
33 Tibuwa motud da sop para diniyu mga kolakihan,
kolasahoy niyu og libun niyu mamaꞌ nok kolasa niyu sog ginawa-baran niyu,
bu amu mga kolibunan,
pogaddatoy niyu og laki niyu.