Ok Poksolobuk nong mga Moktotombaꞌ
4
Saan na,
akon kini nong mipirisu ningkomun sabap sok kopogunutu sok Panghuꞌ,
pongonihon ku tokodoy diniyu,
inang niyu ok patut song mga tow nong misukuꞌ sok Tuhan.
2 Sumboy lolayun mobabaꞌ og goyitan niyu,
molunuk ok pongatoyan niyu,
mosabar amu,
bu moktiniggoloy dunut lasa sog duma niyu.
3 Lolayun niyu pa pogmuhut-muhutan ok kopoksolobuk nok tidu sog Ruh nok Tuhan biyan song mobais nok kopoksulut-sulut niyu.
4 Poꞌ ita niyu kini,
mamaꞌ sopantun nok solobuk lawas nog Al-Masih,
solobuk da sop og Ruh nok Tuhan,
solobuk ok pogdodama ta niyu para loma-dinglag pagga misukuꞌ ita nok Tuhan,
5 solobuk da ok Panghuꞌ ta,
solobuk da ok kotombaꞌ ta,
bu solobuk da ok kopokpoliguꞌ ta,
6 solobuk da ok Tuhan nog yonin og Gommaꞌ nok kotanan ta,
bu yanin ong mogbayaꞌ sok kotanan bu moginang biyan sok kotanan,
bu migonong sog lam ta niyu.
7 Sugaid bisan miksolobuk ita nog lawas,
miglen-len ita niyu nok ponginangon nog binogoy ni Isa Al-Masih song monolokotow dinita niyu tidu sok kolasa-kololatin.
8 Saan na ok taluꞌ sok Kitab,
“Dangan mimondag yanin,
minenek yanin sok tas.
Miguna yanin sok tumpukan nong mga dinagin,
bu binogoyanin ong mga piktowanin nok kobaisan.”
9 Dadi pagga tinaluꞌ nog “minenek yanin sok tas,”
posabut sop niyon,
nong minonog poguna og Al-Masih sog lupaꞌ.a
10 Saan na ong minonog kituꞌ,
yanin da sop ong minenek sok tas pa nok kolangitan,
bagun jukuponin ok kotanan.
11 Si Isa Al-Masih ong migbogoy nok kobaisan song mga piktowanin.
Og duma inimungin nong mga mokpoposampoy,
og duma inimungin nong mga nabi,
bu ong mga duma kiwakilanin mokposaplag nong Mobais nok Suksugan.
Ong mga duma kiwakilanin mokpotontul song mga moktotombaꞌ,
bu og duma inimungin nong mga guru nok Parman nok Tuhan.
12 Saan na inimungin ong mamaꞌ nituꞌ,
bagun ita niyu,
mga sukuꞌ in,
mokoinang nog winakilin dinita bagun moksipagon pa og ummatin.
13 Na bilaꞌ maꞌ niyon,
mokopoksolobuk tokodoy og lam ta niyu biyan sok kopongandol ta bu sok pogilala ta ni Isa Al-Masih nog yonin og Bataꞌ nok Tuhan taman moksipagon ok kotombaꞌ ta,
bu modopot ta na og jukup nok pongaddatan ni Isa.
14 Dadi kanaꞌ ita na mamaꞌ nog gumbataꞌ nong modaliꞌ koyit nong miglologinis nok pononduꞌ.
Ondiꞌ ita na modaliꞌ tumud sok towanan nok kolegan nilon moyit ita sok kolaatan biyan sok pongakkal bu pomodupang nok pononduꞌ nilon.
15 Sugaid moktaluꞌ ita niyu nok kosobonnalan dunut nok kasi-lasa sok pokkahi ta,
bu sumboy mogdodungag ok poganggid-anggid nok pongaddatan ta sog Al-Masih nog yanin mamaꞌ nog gulu ta.
16 Na ita niyu mga moktotombaꞌ,
mamaꞌ sopantun nog lawasin nong miksukpat-sukpat song mga gugat bug longlonguan biyan sok poglilow nok sosolokotow sog ginang nog inuwakil dinita.
Dadi mogdungag og lasa ta niyu,
bu mopagon og ummatin.
Ong mga Pongaddat nog Dumait song mga Mogogunut sog Al-Masih
17 Na pasal sok kopatut nog binogoy dinakon nog Al-Masih,
taluan ku amu nog diꞌ amu na mogdogiling sog gaddat nong mga len bangsa nog diꞌ mondok sok Tuhan,
poꞌ daꞌdun guna nok pikilan nilon.
18 Modolom ok ponabut nilon,
bu molayuꞌ ilon song mosannang nok kotubuꞌ kituꞌ nog bogoyon bosiya nok Tuhan dinilon.
Poꞌ miawam ilon pasal sok kotogas nok pongatoyan nilon.
19 Kibolongan ilon nok sipog.
Lolayun na ilon mokpoduhul nong napsu nilon song miglologinis nok kolomuꞌ-lomuꞌ.
20 Sugaid amu,
kanaꞌ maꞌ niyon ok tinonduꞌ diniyu pasal sog Al-Masih.
21 Poꞌ midongog niyu na dodaꞌ ok suksugan pasal ni Isa,
bu tinintuluan amu na nok kosobonnalan nog diyon diyanin.
22 Saan na bilaꞌ upamahan sog danul nog dogdoy,
awaoy niyu na og dan polangoy bug kotubuꞌ niyu kituꞌ nong mokopoglaat diniyu biyan song mga mokopoglimbung nong napsu niyu.
23-24 Doksuꞌ sumboy sumolug amu nog bogu pongaddatan kituꞌ nong mitabuk niyu tidu sok Tuhan mamaꞌ sopantun diyanin nong mologdong bu sutsi.
Dadi ibut-ibut diniyu nok pogbayaan amu nog Ruh nok Tuhan bagun lolayun mobogu bangka kopinda ok pongaddatan niyu sok kobaisan.
25 Saan na pagga tinolikudan niyu na ok koloputan,
sumboy sosolokotow dinita moktaluꞌ nok kosobonnalan sog duma ta niyu,
pasal miksolobuk ita niyu na.
26 Bilaꞌ molingit amu,
hallian niyu tokodoy nog diꞌ amu mogdusa.
Og lingit niyu sumboy mobolong na sog daꞌ pa sindop og gondow.
27 Naꞌ niyu bogoyan nog waktu og Iblis sumolod sok pongatoyan niyu bagun diꞌ amu moyit sok kolaatan.
28 Ok polonakow sumboy lumotaꞌ na monakow bu moginang bagun mokotabang song mga miskinan.
29 Naꞌ amu moktaluꞌ nong molaat bu mokobisa,
sugaid poktaluꞌ amu nong mobais bu tumolop nong mokotabang sok pokasi niyu bagun mokalap nok kobaisan ong mga minginongog diniyu.
30 Diꞌ niyu bogoyan nok kosusahan og Ruh Mahasutsi,
poꞌ yanin og gindanan nok poglokat diniyu song matong nog gondow binayaꞌ.
31 Sumboy bolongon niyu na og lam nog gubaan,
pogdumut bug lingit niyu.
Naꞌ amu na moksuwal-suwal bu mokkulibot,
bu bolong niyu na ok pogjinongkihoy.
32 Tibuwa pohatuloy niyu bu kololatoy niyu ong mga duma niyu.
Poginampunoy amu mamaꞌ nok koampun nok Tuhan dinita pasal sok kotombaꞌ ta sog Al-Masih.