Kiwakilan si Pol Mokposampoy song mga Kanaꞌ Yahudi
3
Saan na pingoni-ngonihan ku amu.
Dini u ningkomun mipirisu sabap sok pokposampoyu diniyu mga kanaꞌ Yahudi pasal ni Isa Al-Masih.
2 Midongog niyu na bayuꞌ in ok pasal sok kolasa-kololat nog binogoy nok Tuhan dinakon nok kiwakilanin akon mokposampoy diniyu.
3 Pitampalin dinakon ong maksudin kituꞌ nong mibuni tagnaꞌ.
Mikosulatu na nong mopolok pasal nini.
4 Na bilaꞌ mikobasta amu na nituꞌ,
mosabut niyu na nog binogoyan ku nok Tuhan nok kokosun pasal sog diꞌ motokkad nong maksudin diyon sog Al-Masih.
5 Sok tagnaꞌ kituꞌ daꞌ pa potampaloy song mga tow,
sugaid ningkomun piosun na nog Ruh Mahasutsi ong maksud koyon song mga mokpoposampoyin bug mga konabihanin.
6 Maꞌ nini ong maksud nok Tuhan,
kopusakaan da sop ong mga kanaꞌ Yahudi bilaꞌ tumombaꞌ ilon song Mobais nok Suksugan.
Moitung ilon sukuꞌ nog Al-Masih,
bu kobahagian ilon sog jinanjiꞌ nok Tuhan biyan sok kosolobuk nilon sog Al-Masih.
7 Dadi biyan sok kolasa-kololat bug kowasa nog binogoy nok Tuhan dinakon,
kiwakilanin akon nok sosuguonin mokposampoy nong Mobais nok Suksugan kini.
8 Sog lam nong mga sukuꞌ nok Tuhan,
akon tokodoy ok kinobabaan.
Sugaid kiwakilanin suusa akon nok kolasa-kololat mokposampoy song mga kanaꞌ Yahudi nong Mobais nok Suksugan.
Ok Suksugan kini pasal sog landuꞌ kobais bu diꞌ motokkad nog barakat nong motabuk nilon bilaꞌ tumombaꞌ ilon sog Al-Masih.
9 Ok Tuhan,
ong Mikpoongon nog lam nituꞌ,
piniliꞌ in akon mokpodolag sog lam nok tow nong maksudin sok pogawon nong mibuni diyon diyanin tidu sog daꞌ pa koongon og dunya.
10 Minaksud nok Tuhan mamaꞌ nituꞌ bagun mopotongow song ningkomun kini ok kokosunin nog diꞌ motokkad sog lam nok taga pogbayaꞌ bug kowasa sog gawan bug langit biyan sog jomaa nong mga moktotombaꞌ.
11 Miinang koyon bagun mounut og asal nong maksud nok Tuhan nog ininangin na ni Isa Al-Masih,
ok Panghuꞌ ta niyu.
12 Dadi sabap sok kosolobuk ta sog Al-Masih bu kopongandol ta diyanin,
mokopolani ita na sog gadapan nok Tuhan nog dunut kotowakkal bu kosannangan.
13 Dadi ponganguton ku diniyu,
diꞌ amu mosusa bisan sog diyalomu nok kobinsanaan pasal diniyu,
poꞌ kini para sok kobaisan niyu.
Ok Pongoni-ngoni ni Pol para song mga Moktotombaꞌ
14 Pasal niyon,
sinumudjudu sok Tuhan,
og Gommaꞌ,
15 poꞌ yanin ok piktiduhan nok kotanan nok piongonin dituꞌ sok surgaꞌ bu dini sog dunya.
16 Ok kobaisan bug kotasin,
diꞌ kolabihan.
Saan na mongoni-ngoni u nog duhulanin og diyalom pongatoyan niyu nong moksipagon pa ok kotombaꞌ niyu dunut kowasa biyan sog Ruh nin.
17 Dadi biyan sok kotombaꞌ niyu modiyon og Al-Masih sok pongatoyan niyu.
Bung mayan pasal niyon gumamut bu moksipagon pa og lasa niyu.
18 Mura-murahan duhulan amu dunut nog lam nok sukuꞌ nok Tuhan nok ponabut pasal sog landuꞌ koliwag,
kodalom bu kotas nog lasa nin song manusiyaꞌ.
19 Bung mayan mosabut niyu og diꞌ motokkad nog lasa nog Al-Masih bagun kopalitan amu nong mojukup nok pongaddatan nok Tuhan.
20-21 Na pudjihon ok Tuhan solama-lama pasal sog lam nok ponginangonin sog jomaa nong mga moktotombaꞌ pangkat-momangkat biyan sok kopoksolobuk ta ni Isa Al-Masih.
Poꞌ tidu sok kowasa nin nok tumugu dinita,
moinangin ok kotanan bu labi pa tokodoy tidu sok pongonihon ta atawa sok pomikil ta.
Patut yanin potason!
Amin.