Ong Mosannang nok Kotubuꞌ-tubuꞌ
3
Binogoyan amu na nog bogu kotubuꞌ biyan sok pokpotubuꞌ puliꞌ nok Tuhan nog Al-Masih tidu sok kopatoy.
Saan na poktuyuan niyu ong mga olo-olo tidu sok Tuhan sok tas nok surgaꞌ,
nog yonin na ok pigingkudan nog Al-Masih sog dapit lintu nok Tuhan.
2 Polabi niyu bug olo og dituꞌ sok surgaꞌ,
kanaꞌ og olo-olo dini sog dunya.
3 Poꞌ amu koyon sopantun nong minatoy dunut nog Al-Masih,
bu og bogu kotubuꞌ niyu mitaguꞌ pa dunut diyanin dituꞌ sok Tuhan.
4 Sugaid sok pokpotongow puliꞌ nog Al-Masih nog yonin na ong migbogoy dinita nok kotubuꞌ,
na moampuꞌ amu da sop dunut diyanin sok kotasin.
5 Saan na sumboy niyu tokodoy papason og olo-olo nog ginang niyu nok kododunyahoy,
mamaꞌ na nong mga ginisan nok pogjina,
pokpoduhul sog ginawa-baran,
mga len ginang nong molaat bu ok konapsuhan.
Poꞌ ok konapsuhan mamaꞌ da hantang nok poksumba sok tuhan-tuhan,
sabap og gartaꞌ ok pilabi nong mga maꞌ niyon nok tow.
6 Ong mga ginang koyon ok sabapan nog datongan ong manusiyaꞌ nong mulkaꞌ nok Tuhan.
7 Sok tagnaꞌ kituꞌ mikinang amu da sop nong mamaꞌ niyon poꞌ ok konapsuhan ong migbayaꞌ diniyu.
8 Sugaid ningkomun bolong niyu na og lam nini,
ok pogdumut,
og lingit,
ok pogjongki sok pokasi niyu,
bu ok ponaluon nong mokosakit atawa mokosipog.
9 Diꞌ amu moktaluꞌ nog loput,
poꞌ tinolikudan niyu na ok polangoy niyu kituꞌ tagnaꞌ nong molaat,
10 bu ginantian niyu na nog bogu pongaddatan nog lolayun mopobogu sok kobaisan.
Dadi biyan niyon mogidud ok pogilala niyu song Mikpoongon,
bu mogbatuk-batuk amu diyanin.
11 Na tidu ningkomun,
daꞌdun ok pigbiddaan nog Yahudi bu kanaꞌ Yahudi,
ong miislam bug daꞌ koislam,
taga pongadjiꞌ bu daꞌdun,
gulipon bu kanaꞌ gulipon,
poꞌ og Al-Masih ong motas sok kotanan,
bu diyon yanin diniyu kotanan.
12 Pagga piniliꞌ amu sukuꞌ nok Tuhan nok kolasahanin bu inimungin mosutsi,
sumboy molilolatoy amu,
mahatul amu,
mobabaꞌ og goyitan niyu,
molunuk ok pongatoyan niyu,
bu mosabar amu.
13 Sumboy sosolokotow diniyu moktiniggoloy bilaꞌ ongon og dusa nong mga duma niyu diyon diniyu.
Moginampunoy amu mamaꞌ hantang nok koampun nok Panghuꞌ diniyu.
14 Sugaid labi-labi pa sumboy lumasa amu sog duma niyu,
poꞌ yonin na koyon ong mokopojukup nok poksolobuk niyu.
15 Ok kosannangan nog Al-Masih sumboy lolayun sok pongatoyan niyu poꞌ yonin ok koleganin bagun moksulut-sulut bu moksolobuk amu.
Bu sumboy moksarang-sukul amu diyanin!
16 Ok pononduꞌ nog Al-Masih sumboy mokpotattap bu moglabi-labi diyon sok pongatoyan niyu.
Pokpinituwahoy amu bu poktinontuloy dunut nok kokosun nog binogoy diniyu.
Pogbobatan niyu nok kolangan tidu sok Kitab Jabur bug len pongpudji sok Tuhan nong miktidu sog Ruh nin dunut poksarang-sukul.
17 Bisan olo og inangon niyu bug taluon niyu,
inang niyu ok kosuatan si Panghuꞌ Isa Al-Masih bu poksarang-sukul amu sok Tuhan,
og Gommaꞌ biyan diyanin.
Ok Pongaddatan nong mga Moktotombaꞌ
18 Pasal diniyu,
mga kolibunan,
pokpobabaꞌ amu sog laki niyu,
poꞌ yonin koyon og dait song mga sukuꞌ nok Panghuꞌ.
19 Bu amu mga kolakihan,
sumboy kolasahan niyu og libun niyu,
bu diꞌ niyu ilon poglingitan.
20 Amu mga gumbataꞌ,
tombaꞌ amu sog duwaꞌ mokogulang niyu sog lam nituꞌ,
poꞌ yonin koyon ok kosulutan nok Panghuꞌ.
21 Amu mga mokogulang,
kanaꞌ niyu posakiton ok pongatoyan nong mga gumbataꞌ niyu bagun diꞌ mogubaꞌ-ubaꞌ bu moksitogas og guluꞌ nilon.
22 Amu sop mga gulipon,
sumboy tumombaꞌ amu sog gamu niyu sog lam nituꞌ.
Poginang amu bisan diꞌ nilon amu motongow,
kanaꞌ sop hadja bagun amu sangliton,
sugaid tidu sok pongatoyan niyu bu pasal sog gondok niyu sok Tuhan.
23 Bisan olo ong mobais nok ponginangon niyu,
basta ikhlas sok pongatoyan niyu,
inang niyu mamaꞌ amu da miktolagad sok Panghuꞌ,
bu kanaꞌ song mga tow.
24 Poꞌ kiosunan niyu da nok kobogoyan amu nok Panghuꞌ nok pusakaꞌ ok tinogama kituꞌ para song mga miktolagad diyanin.
Pondom niyu nok si Panghuꞌ Al-Masih ok tinolagadan niyu.
25 Tibuwa,
ong monginang nong molaat,
tumbasan da sop nong molaat,
poꞌ ok Tuhan daꞌdun ok polabihonin,
bu mologdong og hukumanin.