4
Amu sop ok taga gulipon,
og goyitan niyu dinilon sumboy mobais bu mologdong,
bu ondiꞌ amu mogbiddaꞌ dinilon.
Pikil niyu nog amu sooy,
ongon da sop og Gamu niyu dituꞌ sok surgaꞌ.
Ok Pomilin
2 Ondiꞌ amu mololaꞌ mongoni-ngoni,
bu pokpotubud amu dunut poksukul sok Tuhan.
3 Bung mayan mongoni-ngoni amu da sop para dinami nok tabangan ami nok Tuhan bagun lumuhaya ami mokposampoy nok suksugan nok pidolag na nok Tuhan pasal ni Isa Al-Masih.
Yonin kini ok sabapan nong mipirisu u ningkomun.
4 Dadi pongoni-ngoni amu nong mopotampalu song mga towanan ok suksugan kini nok sinuguꞌ dinakon nok Tuhan.
5 Sumboy da sop gamiton niyu ok kokosun dunut poghalliꞌ song mga tow nog daꞌ pogunut sog Al-Masih,
bu diꞌ niyu liyusan ong mga waktu mokposampoy dinilon pasal diyanin.
6 Ok koponaluꞌ niyu song mga tow,
sumboy molingkat bu taga kolasa-kololat bagun godamon ilon monginongog diniyu.
Bu sumboy mokosun amu tumabal nong mga sak nog bisan sima dinilon.
Mga Salam-duwaa
7 Pasal sok kobotang-botangu dini,
ong mokposampoy diniyu si Tikikus.
Yanin kini og gilug ta nok kolasahan bu kopongandolan moginang para sok Panghuꞌ,
bu mamaꞌ dinami nog gulipon da sop yanin nok Panghuꞌ.
8 Piangoyu yanin diyon diniyu,
bagun kosunan niyu bug olo og bayuꞌ nami dini bu supaya polasigonin sop ok pongatoyan niyu.
9 Podunuton ku sop ni Tikikus og gilug ta nok kolasahan bu kopongandolan nok si Onesimusa,
ok salu jomaa niyu.
Posunan nilon amu sog lam nong mikobiyan dini.
10 Na og duma u dini sok pirisuhan nok si Aristarkus,
miksalam-duwaa diniyu,
bu miksalam-duwaa da sop og goguapuꞌ ni Barnabas nok si Markus.
Pasal ni Markus,
tinugunan amu na asal nok tolimaon niyu mahatul bilaꞌ matong yanin diyon diniyu.
11 Si Isa nog iningalanan da sop Yustus,
miksalam-duwaa da sop diniyu.
Ok tolu kotow da kini,
ok salu-bangsa u Yahudi nog duma u mokposampoy dini pasal sok Pomarinta nok Tuhan.
Mosolag ok tabang bug pokpolasig nilon dinakon.
12 Simalam-duwaa sop diniyu si Epapras,
ok salu jomaa niyu bu gulipon da sop ni Isa Al-Masih.
Mimagas yanin mongoni-ngoni para diniyu bagun lolayun mopagon ok kotombaꞌ niyu bu kosunan niyu tokodoy ok kolegan nok Tuhan.
13 Kisaksian ku nong mimagas tokodoy yanin moginang para sok kobaisan niyu bu song mga moktotombaꞌ diyon sog bonuwa Laodikiya bu Hirapolis.
14 Si Lukas,
ok kolasahan ta nog doktor kituꞌ,
bu si Demas miksalam-duwaa da sop diniyu.
15 Na posampoy niyu da sop ok salam-duwaa nami song mga koilugan ta sog bonuwa Laodikiya bu sog gilug ta ni Nimpa,
bu sog jomaa nong mikpuduk-puduk sog baloyin.
16 Dadi bilaꞌ modoksuꞌ niyu bastahon ok sulatu kini sog jomaa niyu,
podam niyu sop song mga moktotombaꞌ nog Al-Masih sog Laodikiya bagun mobasta nilon.
Tubus ok sulat nok pinoyitu dituꞌ sog jomaa nog Laodikiya,
odam niyu sop bagun niyu mobasta.
17 Pasal ni Arkippus,
taluꞌ niyu pa diyon diyanin nog amoy-amoy podayunonin bu doksuonin og ginang nog inuwakil diyanin nok Panghuꞌ.
18 Akon si Pol,
ong miksalam-duwaa kini diniyu.
Komotu tokodoy ok sinumulat dun.
Diꞌ niyu kolingowan nog dini u ningkomun sog diyalom nok pirisuhan.b
Bung mayan ok kolasa-kololat nok Tuhan modiyon diniyu.
Wassalam