Og Ikosolobuk Sulat ni Pol song mga Moktotombaꞌ sok
TESALONIKA
1
Salam diniyu ong mga moktotombaꞌ sok Tesalonika,
og jomaa nok Tuhan og Gommaꞌ ta,
bug Panghuꞌ Isa Al-Masih.
Tidu kini dinakon,
si Pol,
bug duwaꞌ kotow duma u nok siloꞌ Silas bu Timuti.
Bung mayan modiyon diniyu ok kolasa-kololat bug kosannangan!
Pasal sok Kotombaꞌ nong mga Tow Tesalonika
2 Lolayun ami moksukul sok Tuhan para sog lam niyu,
bu poglabiton nami amu sok pongoni-ngoni nami.
3 Sigi-sigi nami pondomon sog gadapan nok Tuhan,
Gommaꞌ ta,
ok ponginangon niyu tidu sok kotombaꞌ,
ok poktiksaꞌ niyu sabap sog lasa,
bu ok poksandal niyu pasal sog ongon og dodamahan niyu tidu sok Panghuꞌ ta Isa Al-Masih.
4 Mga pigilugan nok kolasahan nok Tuhan,
kiosunan nami nok piniliꞌ in amu.
5 Poꞌ dinatongan amu nong Mobais nok Suksugan pasal ni Isa Al-Masih nok pisampoy nami diniyu kanaꞌ hadja biyan sok taluꞌ,
sugaid dunut kowasa bug tabang nog Ruh nok Tuhan.
Mitantu nami nok kosobonnalan ok pisampoy nami diniyu.
Kiosunan niyu da og gaddat-tobiat nami nok pitongow nami para sok kobaisan niyu sog gobon nituꞌ.
6 Bu sinunud niyu og ginang nami bu mogogunut amu sok Panghuꞌ,
poꞌ bisan landuꞌ ok kobinsanaan,
tinolimaꞌ niyu ok Parman dunut loliyag nong miktidu sog Ruh Mahasutsi.
7 Sabap niyon miimung amu nok suntuan sog lam nong moktotombaꞌ song mga probinsiya nong Makedonya bug Akaya.
8 Poꞌ tidu diniyu simaplag ok suksugan pasal sok Panghuꞌ,
kanaꞌ hadja sog duwaꞌ probinsiya koyon,
sugaid song modakol pa nong mga bonuwa.
Dadi ayin-ayin ami angoy,
mibantug na ok kopongandol niyu sok Tuhan.
Diꞌ ami na sooy mokposampoy pasal diyon.
9 Poꞌ ong mga tow sok kobonuwahan koyon,
ilon na tokodoy ong minuksug pasal sok kotolimaꞌ niyu dinami.
Tinaluꞌ nilon bug ponoy ok poktolikud niyu song mga tuhan-tuhan,
bangka niyu tolimaoy bu sumbahoy ok sobonnal-bonnal nok Tuhan nog daꞌdun ok kodoksuanin.
10 Sinuksug sop nilon nong migdodama amu nong mokpuliꞌ og Bataꞌ in tidu sok surgaꞌ,
yonin na si Isa,
ok pitubuꞌ in puliꞌ.
Yanin ong mogawon dinita niyu tidu song mulkaꞌ nok Tuhan nong matong song mga manusiyaꞌ.