Ok Ponintuluꞌ bug Gaddat niloꞌ Pol sok Tesalonika
2
Dadi mga pigilugan,
kiosunan niyu nog daꞌ pogasta ok kobaisan nok poktibow nami diyon diniyu sok Tesalonika.
2 Sog daꞌ ami pa angoy diniyu,
mibinsanaꞌ bu pimosipog ami sog bonuwa Pilipia maꞌ nok kiosunan niyu na.
Tibuwa ongon ok kotowakkal nami tidu sok Tuhan bagun mokposampoy ami diniyu nong Mobais nok Suksugan bisan modakol ok sinumaggaꞌ dinami.
3 Poꞌ ok ponintuluꞌ nami motud.
Daꞌdun ok pigomuꞌ nami nog olo-olo,
bu kanaꞌ da sop kini ok pomodupang diniyu.
4 Sugaid pagga pingandol bu inuwakil dinami nok Tuhan ong Mobais nok Suksugan pasal sok pogawon biyan ni Panghuꞌ Isa,
mokposampoy ami,
kanaꞌ bagun kosuatan ong mga tow dinami,
sugaid bagun kosuatan ok Tuhan nog lumiling nok pongatoyan nami.
5 Kiosunan niyu da sop nog daꞌ ami poktaluꞌ nong mga pogulug-ulug,
bu daꞌ ami ponintuluꞌ bagun mokosin.
Kosaksian koyon nok Tuhan.
6 Daꞌ ami da sop pogapas nok poksanglit tidu diniyu atawa sog duma nok tow.
7 Bisan ongon ok kopatut nami mga mokpoposampoy ni Isa nog bogoyan bosiya nok kogunahan nami,
diꞌ ami mogimakat dun.
Tibuwa molunuk ok pongatoyan nami diniyu,
mamaꞌ hantang nong mobais nog ginaꞌ mogipat nog gumbataꞌ in.
8 Pasal sog lasa nami diniyu,
migloliyag ami mokposampoy diniyu nong Mobais nok Suksugan nok Tuhan pasal ni Isa Al-Masih.
Bu kanaꞌ hadja koyon,
sugaid lamig ami moglillaꞌ diniyu nog ginawa-baran nami poꞌ mohalgaꞌ amu tokodoy dinami.
9 Mga pigilugan,
mipondom niyu da ok tiksaꞌ bug sigpit nami kobon nami mognasihat diniyu pasal song Mobais nok Suksugan tidu sok Tuhan.
Migusaha ami sok kotubuꞌ-tubuan namib gobi-gondow bagun daꞌdun ok kopobogatan nami.
10 Kisaksian niyu,
bu kisaksian da sop nok Tuhan bug ponoy kosutsi bu kologdong ok pogoyit nami diniyu mga moktotombaꞌ,
bu daꞌdun ong motuntut dinami.
11 Kiosunan niyu da ok pogoyit nami diniyu mamaꞌ sopantun nok pogoyit nong mobais nog gommaꞌ sog gumbataꞌ in.
12 Pikpopagon nami ok sosolokotow diniyu,
pikpolasig,
bu pimituwahan nami amu bagun dumait ok kotubuꞌ-tubuꞌ niyu sok Tuhan.
Yanin ong mingonggat diniyu mampuꞌ sok pomarinta nin bug kotasin.
13 Daꞌ ami da lotaꞌ moksukul sok Tuhan.
Poꞌ dangan midongog niyu ok Parman nok Tuhan nok pisampoy nami diniyu,
tinabuk niyu,
kanaꞌ mamaꞌ tahan da koyon taluꞌ nok tow.
Sugaid tinolimaꞌ niyu sabap ok Parman dodaꞌ koyon nok Tuhan nok taga kowasa tumugu sog diyalom pongatoyan niyu mga moktotombaꞌ.
14 Amu mga pigilugan,
kibiyanan amu nog batuk song mga jomaa nok Tuhan sog Yahudiya,
yonin na ong mga sukuꞌ ni Isa Al-Masih diyon.
Poꞌ mibinsanaꞌ amu sog duma nok salu-bangsa niyu,
mamaꞌ nok kobinsanaꞌ dinilon nog duma sok salu-bangsa nilon mga Yahudi.
15 Ilon ong mikpopatoy ni Panghuꞌ Isa bug mga nabi song masa tagnaꞌ.
Ningkomun ilakad da sop ok pominsanaꞌ nilon dinami.
Ondaꞌ ilon pokposuat sok Tuhan bu sinaggaan nilon ong modakol nok tow.
16 Poꞌ pigondiꞌ nilon dinami mokposampoy song mga len bangsa pasal sok Parman nok Tuhan bagun diꞌ ilon moawon.
Na pasal niyon,
pigdungagan nilon og dakol nong mga dusa nilon.
Sugaid posunguꞌ na ilon poponogan nong mulkaꞌ nok Tuhan.
Og Gindowan ni Pol song mga Tow Tesalonika
17 Na mga pigilugan,
sinumuwoy ami na diniyu podaliꞌ,
sugaid miksolobuk ita da sok pongatoyan.
Dadi labi pa pigmuhut-muhutan nami nong moktongow ita puliꞌ kobalan nog landuꞌ ok pinglowan nami diniyu.
18 Saan na meleg ami mangoy diyon diniyu.
Ong motudin,
akon mipikilu mangoy diyon kanaꞌ hadja insan,
sugaid diꞌ modayun poꞌ binolabagan ok kopanow nami nog Iblis.
19 Kolegan nami mokpuliꞌ diyon diniyu poꞌ amu ong mokobogoy dinami nok pogloliyag bu ok pogdodama,
bu amu ok tumbas nami nog bantugon nami bilaꞌ mongadap ita niyu na ni Panghuꞌ Isa sog waktu nong mokpuliꞌ yanin dini.
20 Tantu amu mga moktotombaꞌ ok tobud nog loliyag bug kobantug nami sok pokpuliꞌ in.