3
Dadi dangan diꞌ nami na kotatasan ok pinglowan nami diniyu,
mipikil nami ni Silas nong mokpobagak ami sog Aten,
2 bu populion nami si Timuti diniyu.
Yanin og gilug ta sok kotombaꞌ bug duma nami nok sosuguon nok Tuhan mokposampoy pasal sog Al-Masih.
Sinuguꞌ nami yanin mokpopagon bu mokpolasig nok kotombaꞌ niyu
3 bagun diꞌ mopinda ok kotombaꞌ niyu song mga kobinsanaan nok kobiyan-biyanan niyu.
Asal niyu da kiosunan ok kobinsanaan misunuꞌ sog leg nok Tuhan para dinita.
4 Poꞌ sog bon nami diyon diniyu,
bakas nami na amu kitaluan nong mosugat ita niyu nok kobinsanaan.
Na miunut koyon,
bu kiosunan niyu na.
5 Saan na dangan daꞌ u kosandaloy nog daꞌdun ong modongogu pasal diniyu,
piangoy nami diyon diniyu si Timuti bagun nami kosunan bug ponoy ok pagas nok kotombaꞌ niyu.
Kiondokan ku nong mooyit amu nok sassat nog Iblis,
boyaan nog daꞌdun na ok kopologunahan nog ginang nami diyon diniyu.
Ok Suksugan Pokpolasig tidu ni Timuti
6 Tibuwa song ningkomun,
minatong na si Timuti tidu diniyu,
bu mobais ok suksuganin pasal sok kotombaꞌ bug kolasa niyu.
Sinuksuganin ami nog lolayun niyu ami pondomon,
bu ginindow niyu da sop ami nong mamaꞌ nok pogindow nami diniyu.
7 Dadi mga pigilugan,
bisan sog diyalom ami nok kosigpitan bu kobinsanaan,
mosannang da ok pongatoyan nami poꞌ mopagas da ok kotombaꞌ niyu.
8 Linumasig ami na poꞌ mopagon da ok poksolobuk niyu ni Panghuꞌ Isa.
9 Landuꞌ ok poksukul bug loliyag nami sog gadapan nok Tuhan pasal diniyu.
10 Gondow-gobi ikhlas ok pongoni-ngoni nami nong moktongow ita niyu puliꞌ bagun nami kodungagan bilaꞌ ongon pa og gantaꞌ kulang nok kotombaꞌ niyu.
11 Na bung mayan duhulan ami nok Tuhan,
Gommaꞌ ta bu Panghuꞌ ta Isa nong mokangoy ami da diyon diniyu.
12 Bung mayan dungagan nok Panghuꞌ ok kolasa niyu bagun moglabi-labi para sok sosolokotow diniyu bu sog lam nok tow,
mamaꞌ nok poglasa nami diniyu.
13 Dadi bung mayan popagononin ok pongatoyan niyu bagun sutsi amu bu diꞌ kotuntutan sog gadapan nok Tuhan,
og Gommaꞌ ta niyu sok pogdatong nok Panghuꞌ ta Isa dunut nog lam nong mga sutsi nin.a