Ok Kotubuꞌ-tubuꞌ nong Mosuat ok Tuhan dun
4
Kosukpatan mga pigilugan,
tinintuluan nami na amu bug ponoy ok kopogonong-onong niyu nong mosuat ok Tuhan dun,
mamaꞌ na nog ininang niyu ningkomun.
Na sabap sok kopoksolobuk ta niyu ni Panghuꞌ Isa,
pongonihon nami tokodoy nog dungag-dungagan niyu pa ok poginang niyu nong mamaꞌ niyon.
2 Poꞌ kiosunan niyu na asal,
ok sinuguꞌ nami diniyu tidu sok kopatut ni Panghuꞌ Isa.
3 Ok kolegan nok Tuhan sumboy sutsi amu.
Dadi sumboy diꞌ amu mogjina.
4 Saan na amu mga kolakihan,
pogbayaan niyu og ginawa-baran niyu bagun ok pogoyit niyu song mga kolibunan miyan sok kosutsihan bug pongaddat,a
5-6 kanaꞌ miyan song napsu bagun daꞌdun diniyu ong mongakkal bu monglaat nok pokasi nin laki pasal nini.
Mamaꞌ niyon og ininang nong mga len bangsa nog daꞌ pokokilala sok Tuhan.
Tibuwa sumboy kanaꞌ amu maꞌ niyon,
poꞌ siksaon da nok Tuhan og lam niyon,
mamaꞌ na nok tinaluꞌ bu pidinsamaꞌ nami diniyu.
7 Poꞌ daꞌ ita onggatoy nok Tuhan para sok kolomuꞌ-lomuꞌ,
sugaid para sok kosutsi.
8 Dadi sima-sima ok tumolikud sok tintuluan kini,
na kanaꞌ ok tow ok tinolikudanin,
sugaid ok Tuhan nong migbogoy diniyu nog Ruh nin nong Mahasutsi.
9 Na pasal sog lasa niyu song mga pigilugan sok kotombaꞌ,
diꞌ ami na sumboy moksulat diniyu,
poꞌ tinonduan amu na nok Tuhan nong moglasa-linasahoy amu.
10 Mattan nok kolasahan niyu ong mga pigilugan ta bisan ayin sok probinsiya niyu nong Makedonya.
Tibuwa bisan maꞌ niyon,
pongonihon nami diniyu,
pogdungag-dungagan niyu pa og lasa niyu koyon.
11 Poksulut-sulut amu!
Diꞌ amu monginlabot sog duma,
sugaid pogusaha amu,
mamaꞌ na nok sinuguꞌ nami kituꞌ diniyu.
12 Inang niyu ok tintuluan koyon bagun pogaddatan amu nong mga kanaꞌ moktotombaꞌ,
bu diꞌ amu mongandol nok tabang sog bisan sima.
Pasal sok Pokpuliꞌ nok Panghuꞌ
13 Na mga pigilugan,
kolegan nami nok kosunan niyu ok pasal song mga pigilugan ta nong minatoy na kituꞌ,
bagun diꞌ amu mokkorukkaan mamaꞌ nog duma tow nog daꞌdun na og dinodamahan nilon.
14 Tinumombaꞌ ita nong minatoy si Isa bu mitubuꞌ puliꞌ.
Na domikkiyan,
tinumombaꞌ ita nong mokobiyan da sop koyon song mga minatoy kituꞌ nok tinumombaꞌ ni Isa.
Pokpuliꞌ dini ni Isa,
pongoyiton da sop ilon nok Tuhan dunut diyanin.
15 Ok sinuksugu kini diniyu,
ok tinonduꞌ nok Panghuꞌ.
Ita kini nok tinumombaꞌ diyanin,
sokaliꞌ sauton nok totubuꞌ pa sog waktu nong mokpuliꞌ ok Panghuꞌ,
kanaꞌ mokuna lumumpak diyanin tidu song mga minatoy na.
16 Poꞌ monog ok Panghuꞌ tidu sog langit dunut gekes nok suguan,
tawag nok kounutan nong malaikat bu tingog nok tombuliꞌ nok Tuhan.
Bu ong mga minatoy kituꞌ nong moktotombaꞌ ni Isa Al-Masih,
mokuna motubuꞌ puliꞌ.
17 Doksuꞌ ita niyu nok sunoy mosaut nok totubuꞌ pa dini sog dunya,
mogdunut na bug mga tow kituꞌ nok pitubuꞌ tidu sok kopatoy.
Tubus ita niyu kotanan oyiton na posunguꞌ sog gabun bagun lumumpak nok Panghuꞌ sog gawan.
Bu tattap ita na mogdunut diyanin.
18 Dadi polasig niyu ok sosolokotow diniyu nong mga lapal kini.