5
Na mga pigilugan,
diꞌ na sooy nami amu sulatan bug olo waktuhoy mokobiyan ok pokpuliꞌ ni Panghuꞌ Isa,
2 poꞌ kiosunan niyu da sop ok pokpuliꞌ in sog dunya,
mamaꞌ sopantun nok polonakow nog diꞌ kosunan bug olo waktuhoy dun matong.
3 Bilaꞌ moktaluꞌ ong mga tow nog “Ongon ok kosannangan bu daꞌdun na ong mokomula,”
sunoy pa datongan na ilon nok sakit mamaꞌ hantang nog libun pinakitan,
bug diꞌ ilon mokopolaguy dun.
4 Tibuwa amu mga pigilugan,
daꞌ amu sok kodoloman.
Dadi diꞌ amu na kotokkowan bilaꞌ matong og waktu niyon mamaꞌ nok polonakow nog diꞌ kosunan og datongin.
5 Poꞌ ita niyu ong mga sukuꞌ nok kodolagan.
Kanaꞌ ita niyu mamaꞌ nong mga tow nok sukuꞌ nok kodoloman.
6 Dadi diꞌ ita moktulug-tulug sok kotombaꞌ ta mamaꞌ nog duma.
Sumboy andam ita bu motinow ok pikilan ta.
7 Poꞌ og gobi,
yonin na og waktu nok poktulug,
bu yonin da sop og waktu nok poglangu-langu nong mga tow.
8 Sugaid pagga sukuꞌ ita ma nog dolag,
na sumboy motinow ok pomikil ta bagun andam ita.
Imungon ta ok kotombaꞌ bug lasa ta mamaꞌ hantang nok taming ta sok kolaatan.
Bu ok pongandol ta nog awonon ita nok Panghuꞌ sog gondow binayaꞌ,
imungon ta mamaꞌ nok saduk bosi pononding nog gulu ta,
maꞌ nok sopantun sundalu nong minonding sog ginawa nin nok taming bu saduk bosi.
9 Poꞌ daꞌ ita gantaoy nok Tuhan bagun mosugat nong mulkaꞌ,
sugaid bagun moawon biyan sok Panghuꞌ ta niyu Isa Al-Masih.
10 Minatoy yanin para dinita,
bagun diyon ita da dunut diyanin bisan sok kotubuꞌ atawa sok kopatoy.
11 Saan na polasig bu popagon niyu ok pongatoyan nong monolokotow diniyu,
mamaꞌ nog ininang niyu ningkomun.
Kodoksuan nok Pituwa ni Pol
12 Mga pigilugan,
pongonihon nami diniyu,
pogaddatan niyu ong mga miktiksaꞌ bu minintuluꞌ diyon diniyu,
yonin na ong mikkounutan sok kotombaꞌ niyu sok Panghuꞌ.
13 Posolag niyu og lasa niyu dinilon sabap sog ginang nilon!
Poksulut-sulut amu sosolokotow.
14 Pongonihon nami diniyu mga pigilugan,
podinsamaan niyu ong mga mokololaꞌ moginang,
polasig niyu ong mokotalow bu tabangan niyu ong mga mokolamma sok kotombaꞌ nilon.
Poksabar amu sog lam nilon.
15 Sumboy diꞌ amu tokodoy moksinulioy nong molaat,
sugaid pokpohatul amu sok sosolokotow diniyu bu sog lam nong manusiyaꞌ.
16 Pogloliyag amu lolayun,
17 diꞌ amu lumotaꞌ mongoni-ngoni,
18 bu poksukul amu bisan olo ok sumugat diniyu,
poꞌ yonin koyon ok kolegan nok Tuhan para diniyu poꞌ misolobuk amu ni Isa Al-Masih.
19 Diꞌ niyu saggaan og ginang nog Ruh nok Tuhan.
20 Bu bilaꞌ ongon miktaluꞌ nog ok pokposampoyin miktidu sok Tuhan,
diꞌ niyu pobabaon ok tinaluꞌ in.
21 Sugaid liling niyu og lam mga pononduꞌ bilaꞌ motud dodaꞌ nok tidu sok Tuhan,
bu potattap niyu ok kobaisan.
22 Hallian niyu og lam nok kolaatan.
23 Na ok Tuhan,
ong mogbobogoy nok kosannangan,
bung mayan sutsihonin amu.
Bung mayan bantoyan bu poogotonin amu nog daꞌdun og buling nog dusa sok sosolokotow diniyu song nyawa bug ginawa-baran niyu,
bagun sok pokpuliꞌ nok Panghuꞌ ta Isa Al-Masih,
daꞌdun og ikotuntutin diniyu.
24 Kopongandolan ok Tuhan,
ong mingonggat diniyu tumombaꞌ diyanin,
dadi kiosunan ta nog inangonin tokodoy og lam nini.
25 Mga pigilugan,
pongoni-ngoni amu sop para dinami.
26 Pogjara-jarahoy amu nong mosutsi sog lam nong mga koilugan ta niyu diyon.
27 Pongonihon ku biyan sok pogbayaꞌ nok Panghuꞌ ta nog bastahon niyu ok sulat kini sog lam nok koilugan ta niyu diyon.
28 Bung mayan modiyon diniyu ok kolasa-kololat nok Panghuꞌ ta Isa Al-Masih.
Wassalam