Og Ikoduwaꞌ Sulat ni Pol song mga Moktotombaꞌ sok
TESALONIKA
1
Salam diniyu mga moktotombaꞌ sok Tesalonika,
og jomaa nok Tuhan og Gommaꞌ ta bug Panghuꞌ ta Isa Al-Masih.
Tidu kini dinakon,
si Pol bug duwaꞌ kotow duma u nok siloꞌ Silas bug Timuti.
2 Bung mayan modiyon diniyu ok kolasa-kololat bug kosannangan nong miktidu sok Tuhan og Gommaꞌ ta bug Panghuꞌ taꞌ Isa Al-Masih.
Ok Poksukul bug Pongoni-ngoni ni Pol
3 Pigilugan,
sumboy dodaꞌ lolayun ami moksukul sok Tuhan pasal diniyu.
Bu mopatut tokodoy nog inangon nami poꞌ migdodungag ok kopagon nok kopongandol niyu diyanin bu miksisolag da sop ok poglinasahoy niyu.
4 Dadi ami tokodoy ong migbantug diniyu song mga jomaa nok Tuhan ayin-ayin,
poꞌ mopagon pa ok kosandal bug kopongandol niyu diyanin bisan binsanaon bu siksaon amu.
5 Og lam niyon koyon mokpomotud nong mologdong og hukuman nok Tuhan.
Poꞌ bisan mitiksaꞌ amu ningkomun pasal misunuꞌ amu sok piktowanin,
ok kodoksuan nok tiksaꞌ niyu,
patut amu sok pomarinta nin.
6 Mologdong ok Tuhan,
tumbasanin nok kobinsanaan ong mga tow nong mominsanaꞌ diniyu.
7 Bu amu ong mikobiyan na nok kobinsanaan,
koawaan amu sampoy na ami nok kosusahan bilaꞌ mokpotongow na si Panghuꞌ Isa tidu sok surgaꞌ.
Monog yanin dunut mga malaikatin nok taga kowasa,
8 bu linibutan yanin nog gapuy nong miksuliyab.
Siksaonin ong mga tow nok tumolikud sok Tuhan bu diꞌ mogunut song Mobais nok Suksugan pasal sok Panghuꞌ ta niyu Isa.
9 Kotimalan ilon nok kosiksaan solama-lama.
Poduwoyon ilon tidu sok kongkoman nok Panghuꞌ bu tidu sok kosahaya nong mokosobuꞌ-sobuꞌ nok kowasa nin.
10 Og lam nini mounut sog gondow nok pokpuliꞌ in kituꞌ nok potason bu pudjihon yanin nog lam nong mga sinutsi nok sukuꞌ in.
Na amu sooy,
misunuꞌ amu sop song mga sukuꞌ in,
pasal tinumombaꞌ amu da sop sok pokposampoy nami diniyu.
11 Saan na lolayun nami amu pongoni-ngonihan sok Tuhan nog itungonin amu nog dumait sok pongonggatin diniyu.
Bung mayan biyan sok kowasa nin,
duhulonin ok sosuku nong maksud niyu nong mobais bug mga ginang niyu nong miktidu sok pongandol niyu diyanin.
12 Dadi sabap niyon potason ong ngalan nok Panghuꞌ ta niyu Isa biyan diniyu,
bu barakatan amu da sop sabap diyanin mounut sok kolasa-kololat nok Tuhan ta bug Panghuꞌ ta Isa Al-Masih.