Og Gindanan nok Kopokpuliꞌ niPanghuꞌ Isa Al-Masih
2
Dadi pigilugan,
pasal sok kopokpuliꞌ nok Panghuꞌ ta nok si Isa Al-Masih dini,
bu ok kopoglumpukin dinita posunguꞌ diyanin,
ongon ok pongonihon nami diniyu.
2 Diꞌ amu molomu mosasow atawa koiglanan nong mga taluꞌ-taluꞌ nong minatong na og gondow nok pokpuliꞌ nok Panghuꞌ ta.
Diꞌ amu tumud dinilon bisan ongon ok pokposun nog baluꞌ-baluꞌ tidu sog Ruh nok Tuhan,
atawa ok pokposampoy,
atawa ok sulat nong miktidu dow dinami moktaluꞌ nong maꞌ niyon.
3 Naꞌ amu tokodoy mokpolimbung nog bisan sima ong moktaluꞌ dun nong maꞌ nituꞌ.
Poꞌ sog diꞌ pa mokpuliꞌ ok Panghuꞌ,
motongow poguna og landuꞌ tokodoy kopongatu nok towanan diyon sok Tuhan.
Bu ongon ok solokotow nok tumuwaꞌ nog landuꞌ baldusa.a
Yanin koyon,
ok kodoksuanin ok kosiksaan solama-lama.
4 Ok tow kini sumaggaꞌ sok Tuhan bu sog olo-olo nok poksumbahon nong mga manusiyaꞌ.
Potasonin og lawasin tidu sok kotanan,
bu sumolod pa yanin bangka ingkud sog Baloy nok Tuhan bangka nin posaplagoy nog yanin dow ok Tuhan.
5 Daꞌ niyu taꞌ kopondom nok tinaluan ku na amu maꞌ nini sog waktu nog diyon ku pa diniyu?
6 Kiosunan niyu da bug olo ong mikoanggaꞌ nog baldusa kini bagun tumuwaꞌ yanin sog waktu nog ginantaꞌ diyanin.
7 Poꞌ ningkomun miktolipun na moglilow ok kopongatu nong mga towanan,
sugaid mibuni pa.
Ongon pa ong mokoanggaꞌ dun,
tibuwa bilaꞌ mawaꞌ na yanin,
8 bangka pa tuwaꞌ og landuꞌ baldusa koyon.
Sugaid bilaꞌ matong si Panghuꞌ Isa,
papason yanin tidu sog goyup nog babaꞌ in,
tunagon yanin nok sulow nok sahaya nin.
9 Tibuwa sog daꞌ pa datong ok Panghuꞌ ta,
ok tow koyon nog landuꞌ baldusa,
bogoyan yanin nok pagas nog Iblis.
Potongowonin koyon biyan sog ginisan nok ponginangonin bug gindanan nong mokosobuꞌ-sobuꞌ bagun modakol ok tumombaꞌ sok pomodupangin.
10 Og ginangin mongakkal nong mga tow posunguꞌ sok kolaatan.
Saan na siksaon ilon poꞌ diꞌ ilon meleg tumombaꞌ sok kosobonnalan nog yonin na dodaꞌ bosiya mokopogawon dinilon.
11 Na tidu diyon,
duhulon nok Tuhan nok kolimbungan ilon,
bagun tumombaꞌ ilon nong mga loput.
12 Dadi ok kodoksuanin,
mosiksaꞌ ong mga tow nog daꞌ tombaꞌ sok kosobonnalan,
sugaid mokpoduhul sog ginang nok kolaatan.
Ok Pokpopagon nok Kopongandol
13 Tibuwa pasal diniyu mga koilugan,
ok kolasahan nok Panghuꞌ,
sumboy dodaꞌ lolayun ami moksukul sok Tuhan.
Poꞌ miampuꞌ amu song miguna nok piniliꞌ in bagun amu moawon.
Miawon amu biyan sok kowasa nog Ruh nin nog inimung amu nong mosutsi nok sukuꞌ in,
bu biyan sok kotombaꞌ niyu sok kosobonnalan.
14 Poꞌ diyon song Mobais nok Suksugan ong miposampoy nami diniyu,
midongog niyu ok pogonggat nok Tuhan diniyu,
bagun mosunuꞌ amu sok kotas nok Panghuꞌ ta nok si Isa Al-Masih.
15 Dadi mga koilugan,
popagon niyu ok pongandol niyu,
bu unutoy niyu ok kosobonnalan nok tinintuluꞌ nami biyan sok pognasihat bu biyan sok sulat nami diniyu.
16-17 Bung mayan mokpolasig bu mokpopagon nok pongatoyan niyu ok Panghuꞌ ta Isa Al-Masih bu ok Tuhan Gommaꞌ ta nong molasa bu mololat dinita.
Daꞌdun ok kodoksuan nok pogamuꞌ-amuꞌ in dinita,
bu binogoyin dinita niyu nong mopagas nok pogdodama.
Dadi bung mayan mobais lolayun ong moinang bu motaluꞌ niyu.