Ok Pongangut ni Pol nok Pongoni-ngoni
3
Sok kodoksuan,
mga pigilugan,
pongoni-ngonihan niyu pa ami soliyan nami mokposampoy nok Parman nok Tuhan pasal ni Panghuꞌ Isa,
bagun modaliꞌ kosaplag diyon sok towanan,
bu bagun nilon da sop tolimaon mamaꞌ nok kotolimaꞌ niyu kituꞌ dun.
2 Pongoni-ngoni amu da sop nok tabanganin ami tidu sok kolaatan nong mga tow,
poꞌ kanaꞌ og lam nong mingandol sok Panghuꞌ Isa.
3 Sugaid ok Panghuꞌ ta kopongandolan,
bu popagasonin bu ipatonin amu tidu sog Iblis.
4 Bu pasal sok kopoksolobuk ta sok Panghuꞌ ta,
mingandol ami nok potattapon niyu ok kopoginang nok sinuguꞌ nami diniyu.
5 Mura-murahan bogoyan amu da nok Panghuꞌ Isa nong modalom nok ponabut pasal sog lasa nok Tuhan.
Mura-murahan mokosandal amu mamaꞌ nog Al-Masih.
Ok Podinsamaꞌ para song mga Mokololaꞌ
6 Dadi ningkomun mga koilugan,
tidu sok kopatut nog binogoy dinami ni Panghuꞌ Isa Al-Masih,
suguon nami amu,
pokpolayuꞌ amu song mga koilugan ta nog lolaan bu daꞌ tombaꞌ nong mga tintuluan nong mamaꞌ nong mitabuk niyu tidu dinami.
7 Na kiosunan niyu na ponoy kobiyan-biyanan nami moginang.
Sumboy amu mogdogiling dun,
poꞌ kanaꞌ ami mololaꞌ monontong nok kotubuꞌ-tubuan nami kobon nami diyon diniyu.
8 Bu ondaꞌ ami tolimaꞌ nok pongonganon nog daꞌ nami bayadoy,
sugaid miktiksaꞌ ami gobi-gondow bagun daꞌdun diniyu ok kologonan mokpotubuꞌ dinami.
9 Ongon bosiya ok kopatut nami mongoni diniyu nok tabang,
sugaid ininang nami kini bagun moimung ami nok suntuan niyu.
10 Bisan pa sog bon nami diyon diniyu,
pidinsamaꞌ nami na tumaluꞌ diniyu mga moktotombaꞌ nong mamaꞌ nini,
“Sima-sima og diꞌ mogusaha,
sumboy diꞌ kuman.”
11 Tinaluꞌ nami kini poꞌ midongog nami nog ongon og duma diyon diniyu mga moktotombaꞌ nong mololaꞌ mogusaha,
bu daꞌdun og ininang nilon,
muwal da monginlabot sog ginang nog duma.
12 Dadi tidu sok kopatut nog binogoy ni Panghuꞌ Isa Al-Masih dinami,
suguon bu pongonihon nami tokodoy ong maꞌ niyon nok tow nok sumboy ilon mogusaha nong mosannang bagun ilon mokokan.
13 Bu amu sop mga koilugan,
diꞌ amu motonop moginang nok kobaisan.
14 Na bilaꞌ ongon diyon diniyu nog ondiꞌ tumombaꞌ nok tintuluan dini sok sulat nami kini,
tulikoy niyu ok tow koyon,
bu diꞌ amu lumimugoy diyanin bagun yanin kosipogan.
15 Tibuwa diꞌ niyu yanin bantahon,
sumboy tintuluan niyu yanin mamaꞌ nog gilug niyu.
Ok Pomilin
16 Bung mayan lolayun da posannangon nok Panghuꞌ ta ok pongatoyan niyu bisan olo pa ong matong diniyu,
poꞌ yanin da ok tubud nok kosannangan.
Bung mayan tattap da ok Panghuꞌ diyon diniyu kotanan.
17 Akon si Pol,
ong miksalam-duwaa kini diniyu.
Komotu tokodoy ok sinumulat nini.
Poꞌ maꞌ nini og gindanan sog lam nong mga sulatu.
18 Bung mayan modiyon diniyu kotanan ok kolasa-kololat nok Panghuꞌ ta niyu Isa Al-Masih.
Wassalam