Pasal sok Ponintuluꞌ nok Kanaꞌ Motud
4
Na motampal tokodoy ok tinaluꞌ nog Ruh nok Tuhan nok tidu ningkomun sampoy na sog binayaꞌ gondow ongon ong mga tumolikud sok kotombaꞌ nilon,
bu unuton nilon ok pongakkal bug ponintuluꞌ nok tidu song mga soytan.
2 Ong maꞌ niyon nok ponintuluꞌ,
pinganat nong mga migbaluꞌ-baluꞌ bu moloput.
Motogas na ok pongatoyan nilon,
bu daꞌdun na ok poksusun nilon.
3 Hinaram nilon ok poglaki-bini,
bu pigondiꞌ nilon ong mga kan nok piongon nok Tuhan.
Sokaliꞌ og lam nituꞌ,
gantaꞌ tolimaon dunut poksukul nong mga moktotombaꞌ bu mikokosun nok kosobonnalan.
4 Poꞌ og lam nok piongon nok Tuhan mobais,
bu daꞌdun ok sumboy haramon bilaꞌ tinolimaꞌ da koyon dunut poksukul.
5 Poꞌ mihalal na koyon biyan sok Parman nok Tuhan bug pongoni-ngoni.
Ong Mologdong nok Sosuguon ni Panghuꞌ Isa Al-Masih
6 Dadi bilaꞌ monintuluꞌ a nong maꞌ niyon song mga pigilugan ta,
moimunga nong mobais nok sosuguon ni Isa Al-Masih nong moksilasig sok pokposampoy nok Parman pasal sok kotombaꞌ ta bu song mobais nok ponintuluꞌ nog inunut nu.
7 Hallioy nu ong mga suksugan kododunyahoy nog inimung-imung hadja bu daꞌdun ok kopologunahanin.
Tibuwa polayam nu pa og ginawa-baran nu sok poktuhan.
8 Ok pokpolasig nog lawas ongon da ok kobaisanin.
Sugaid,
labi mobais og ginang nong mounut sok poktuhan.
Poꞌ ongon ok kobaisan nog dodamahan ta dun sok kotubuꞌ ta ningkomun sampoy sog ahirat.
9 Motud ok ponaluon kini bu dumait tokodoy tolimaon.
10 Sabap niyon,
miktiksaꞌ bu mingmuhut-muhut ita mokposampoy poꞌ pingandolan ta ok Tuhan,
ok totubuꞌ solama-lama,
ong Mogogawon nog lam nong manusiyaꞌ,
labi na ong mga moktotombaꞌ.
11 Dadi suguꞌ nu bu ponintuluꞌ nu og lam niyon.
12 Diꞌ nu malingon bilaꞌ babaꞌ-babaon ka sowkat na mobataꞌ a.
Sugaid bogoyan nu nok suntuan ong mga moktotombaꞌ biyan song mobais nok ponaluon bug goyitan nu,
biyan sok kolasa,
sok kotombaꞌ bu sok kosutsi.
13 Sog bon nog diꞌ u pa mokangoy diyon diniyu,
poktuyuꞌ a tokodoy mogbasta nok Kitab sog jomaa,
tintuluan bu nasihatan nu ong mga tow.
14 Gamit nu ok kopandoyan nog binogoy dinika nok Tuhan dangan pidinsamaꞌ tumaluꞌ dinika nong mga migmokogulang soliyan nilon ika pingoni-ngonihan dunut pogdopon.a
15 Potattap nu og ginawa-baran nu song mga ginang koyon,
bagun motampal sok kotanan nok kodungagan ok kokosun nu moginang para sok Tuhan.
16 Potubudoy nu ok tobiat nu bug ponintuluꞌ nu.
Podayun nu koyon nog daꞌdun ok kotonop nu,
poꞌ biyan niyon kanaꞌ hadja og ginawa-baran nu ong moawon,
sugaid sampoy ong mga minginongog dinika.