Pasal song mga Kounutan nong mga Moktotombaꞌ
3
Motud ok ponaluon nog bilaꞌ ongon meleg moimung kounutan sog jomaa nong mga moktotombaꞌ,
mobais og gawoy nok poktuyuanin.
2 Na ok kounutan koyon,
sumboy daꞌdun ong mosallaꞌ dun,
solobuk da og libunin,
mosabar,
kosunanin moktimbang-timbang ong mobais bug molaton,
dumait yanin pogaddatan,
mohurmat song mga tow nong mongumbaloy diyanin bu mokosun monintuluꞌ.
3 Sumboy kanaꞌ yanin polonginum,
kanaꞌ mokpominasa,
sugaid molunuk ok pongatoyanin,
kanaꞌ polosuwal,
bu diꞌ monapsu sog gartaꞌ.
4 Sumboy mobais ok pogoyitin song mga sakupin sog baloy,
bu pogaddatan bu tombaan yanin nong mga gumbataꞌ in.
5 Poꞌ bilaꞌ ok tow diꞌ mokosun mogoyit nok sakupin sog baloy,
na ponoy ma ok pogoyitin nog jomaa nong mga moktotombaꞌ sok Tuhan?
6 Ok tow nong moglokounutan sumboy ok pilion kanaꞌ bogu tinumombaꞌ ni Isa,
poꞌ onsunoy mogabbu yanin bangka yanin kosiksaꞌ mamaꞌ nog Iblis.
7 Sumboy sop yanin pogaddatan nong mga tow nok kanaꞌ moktotombaꞌ sog Al-Masih,
bagun diꞌ yanin silaon bu diꞌ mooyit nok sassat nog Iblis.
8 Domikkiyan da sop ong mga moktotolagad sog jomaa,
sumboy dumait pogaddatan,
diꞌ mogduwaꞌ dilaꞌ,
kanaꞌ mogoginum,
bu kanaꞌ da sop yanin monapsu sog gartaꞌ.
9 Sumboy momologbog ilon sok kosobonnalan nok pidolag nok Tuhan pasal sok kotombaꞌ diyon ni Isa,
bu daꞌdun og dusa nong mokosasow sok pikilan nilon.
10 Sumboy lilingon sop moguna ok pongaddatan nilon.
Bu bilaꞌ motampal nog daꞌ ilon kotuntutoy sok pongaddat nilon,
na bangka pa ilon koimung nong moktotabang nong mga kounutan nog jomaa.
11 Na domikkiyan da sop ok kolibunan nilon,
sumboy ilon dumait pogaddatan,
diꞌ moglibak,
mosabar,
bu kopongandolan sog lam nituꞌ.
12 Ong mga moktotolagad sog jomaa,
sumboy solobuk da og libun nilon,
bu sumboy mobais ok kopogoyit nilon sog gumbataꞌ nilon bug mga sakup sog diyalom baloy nilon.
13 Na bilaꞌ mobais og ginang nong mga moktotabang song mga kounutan,
pogaddatan ilon nong mga tow,
bu mokotowakkal ilon moktaluꞌ pasal sok kotombaꞌ nilon ni Isa Al-Masih.
Ok Ponintuluꞌ pasal sok Kotombaꞌ
14 Sinulatu kini dinika Timuti,
bisan na migdodama u nong mangoyu diyon nong mosompun.
15 Sugaid onsunoy moanggaꞌ u,
saan na sinulatu og lam nini bagun kosunan nu bug ponoy ok pongaddatan nog ummat nok Tuhan.
Poꞌ ita og ummatin,
ong mga sukuꞌ nok Tuhan nog yanin ok totubuꞌ solama-lama.
Pingandol dinita ong mosobonnal nok pononduꞌ,
dadi sumboy tonduon ta,
bu bologbogan ta ok kosobonnalan.
16 Landuꞌ nok kosobuꞌ ok ponintuluꞌ nok kotombaꞌ ta niyu.
Tagnaꞌ mibuni pa,
sugaid ningkomun pitampal na nok Tuhan song manusiyaꞌ ok pasal sog Al-Masih.
Tinumombaꞌ ita na nog
Dimatong yanin sog dunya miktimaluy manusiyaꞌ,
sinaksian yanin nog Ruh nok Tuhan nong mologdong yanin,
mitongow yanin nong mga malaikat,
winasihat yanin song mga kobangsa-bangsahan,
tinombaan yanin dini sog dunya,
bu inoyit yanin sok surgaꞌ sog diyalom nok kotas nok Tuhan.