Ponintuluꞌ pasal sok Poksumba
2
Dadi muna-muna,
ponganguton ku tokodoy nong mongoni-ngoni bu moksukul ita niyu sok Tuhan para sog lam nok tow.
2 Mongoni-ngoni ita da sop para song mga sultan bug mga tow taga kowasa bagun mobais bu mosannang ok kotubuꞌ-tubuꞌ ta niyu dunut pogammal bug gondok sok Tuhan.
3 Yonin koyon ong mobais bu mosuat sok ponontong nok Tuhan,
ong Mogogawon dinita.
4 Ok koleganin moawon og lam nong manusiyaꞌ,
bu kosunan nilon ok kosobonnalan.
5 Poꞌ solobuk da ok Tuhan,
bu solobuk da sop ong mongongolot bagun mokpopuliꞌ nong manusiyaꞌ sok Tuhan,
yonin na ok tow nok si Isa Al-Masih.a
6 Piglillaꞌ in og ginawa nin gantaꞌ poglokat sog lam nong manusiyaꞌ.b
Yonin koyon ong mokpomotud sog leg nok Tuhan nong moawon og lam nong manusiyaꞌ,
bu pisampoyin dinita sog waktu nog ginantaꞌ in.
7 Saan na kiwakilan ku nok Tuhan nong mokpoposampoy bu mognanasihat para song mga tow kanaꞌ Yahudi bagun moktonduꞌ u dinilon pasal sok kosobonnalan bu kotombaꞌ sog Al-Masih.
Miktaluꞌ u nong motud,
ondaꞌ u pogloput.
8 Pasal song mga kolakihan,
ok kolegan ku nog bilaꞌ sumumba ilon dunut poginat nok komot nilon sok poksumbahan,
sumboy molonuꞌ ok pongatoyan nilon,
kanaꞌ nong molingit atawa moksinuwaloy ilon sog bisan sima towoy.
9 Pasal song mga kolibunan,
sumboy momakoy ilon nong mokosuat-suat bu dumait song mga kolibunan nong mogogondok sok Tuhan.
Ondiꞌ ilon landuꞌ moglibun-libun sog buk nilon atawa monolug nok pomulawan atawa mussaꞌ bu mokohalgaꞌ nok ponapot.
10 Sugaid monginang ilon nok kobaisan,
poꞌ yonin og dumait para song mga kolibunan nong mogogondok sok Tuhan.
11 Ong mga kolibunan,
bilaꞌ ongon ong mognasihat,
sumboy mokpobabaꞌ bu diꞌ ilon mogonek-onek.
12 Diꞌ u kumboyon ong mga kolibunan monintuluꞌ atawa mogbayaꞌ song mga kolakihan.
13 Poꞌ si Adam ong mikuna poongonon,
bangka si Hawa.
14 Tibuwa kanaꞌ si Adam ong mikuna kiakkalan nog Iblis,
sugaid og libunin,
bangka koimung nog baldusa.c
15 Sugaid bisan pasal niyon kosuknaan ong mga kolibunan nok ponakitan sog waktu nok pogbataꞌ nilon,
moawon da ilon basta potattapon nilon ok kotombaꞌ,
kolasa bu kosutsi dunut kobais nog goyitan nilon.