Og Ikosolobuk Sulat ni Pol Posunguꞌ ni
TIMUTI
Salam-duwaa ni Pol
1
1-2 Salam-duwaa dinika Timuti,
nog initungu og bataꞌ u nong motud sok kotombaꞌ!a
Akon kini si Pol,
ong mokpoposampoy ni Isa Al-Masih biyan sok suguan nok Tuhan ong Mogogawon dinita niyu bu si Isa Al-Masih og dinodamahan ta.
Bung mayan modiyon dinika ok tabang,
kolasa-kololat bug kosannangan tidu sok Tuhan,
og Gommaꞌ ta bu ni Isa Al-Masih ok Panghuꞌ ta.
Podinsamaꞌ pasal song mga Pituwa nog Loput
3 Na mamaꞌ nok pingangutu kituꞌ dinika dangan mikposunguꞌ u na song Makedonya,
ponganguton ku puliꞌ nong mokpobagaka pa sog Epesusb bagun kopogondian nu og duma nok tow diyon moktonduꞌ nok kanaꞌ motud.
4 Suguꞌ nu ilon nog diꞌ nilon malingon ong mga suksugan nong minokogulang nok kanaꞌ motud bug mga gusulan pangkat-momangkat nog daꞌdun kodoksuan atawa guna nin.
Yonin koyon ok sabapan mokopoglugat ong mga tow.
Ondiꞌ koyon mokotabang mokposampoy nog dalan pogawon nok Tuhan song manusiyaꞌ poꞌ og dalan koyon kosunan ta biyan sok kotombaꞌ.
5 Na ong maksud nok suguan koyon bagun og lam nong moktotombaꞌ moglinasahoy nok tidu sok sutsi nok pongatoyan,
mokobogan nok pikilan bu ikhlas nok kotombaꞌ.
6 Ongon ong mga tow nok sinumuwoy niyon,
dadi ok koposunguan nilon ok kopogdaawa nog daꞌdun ok kopolosuddahanin.
7 Ok kolegan nilon moimung nog guru saraꞌ agama,
tibuwa daꞌ nilon kosabut ong mga pinaluꞌ atawa mga pisampoy nilon koyon,
bu togolon nilon nog ilon ok sinumugat.
8 Na kiosunan ta nong mobais ok saraꞌ,
basta mologdong ok poggamit dun.
9 Bu kiosunan ta nog daꞌ poongonoy ok saraꞌ para song mga tow nong mologdong,
sugaid para song mga tow nog dinumugtul bu sinumaggaꞌ sok saraꞌ,
song mga tow nog daꞌdun og gondokin sok Tuhan bug mga baldusa,
song mga kanaꞌ sutsi bu daꞌ pogammal,
song mga polomatoy nog gommaꞌ atawa ginaꞌ atawa sok pokkahi nilon manusiyaꞌ.
10 Ok saraꞌ piongon da sop para song mga polojina,
bu song mga tow nong mogduma lunsan laki sooy atawa lunsan libun,
song mga mokpongidnap,
mga mogloput atawa sumaksiꞌ nog loput bu para sog lam nog duma nog dinumugtul song mologdong nok ponintuluꞌ.
11 Ok ponintuluꞌ koyon mialap tidu song Mobais nok Suksugan pasal ni Isa Al-Masih nok pingandol dinakon nok Tuhan,
ong Mokowasa bu patut pudjihon.
Ok Kolasa bug Kololat nok Tuhan diyon ni Pol
12 Moksarang-sukulu ni Isa Al-Masih,
ok Panghuꞌ ta niyu nong migbogoy dinakon nok pagas.
Poꞌ initungin akon nok kopongandolan,
bu kiwakilanin akon moginang para diyanin.
13 Sok tagnaꞌ pigunda-undahan bu binabaꞌ-babaꞌ u yanin,
bu piminasa u ong mga sukuꞌ in,
sugaid kilolatanin da akon poꞌ awamu pa sok pinginangu kituꞌ,
bu daꞌ u pa tombaꞌ dun.c
14 Na miglabi-labi ok kolasa-kololat nok Panghuꞌ taꞌ dini dinakon,
bu binogoyanin akon nok poktombaꞌ bug poglasa.
Maꞌ nituꞌ na dodaꞌ ong moongon sog ayin ok sinumolobuk ni Isa Al-Masih.
15 Motud bu dumait tokodoy tolimaon ok ponaluon nong minangoy si Isa Al-Masih dini sog dunya bagun mogawon nong mga baldusa.
Na akon na kini og labi baldusa tidu sog duma nok tow.
16 Sugaid kilolatan ku bagun mopotongow ni Isa Al-Masih og landuꞌ kosabarin dinakon.
Inimungin akon nok suntuan para song mga duma nok tumombaꞌ diyanin bu koongonan nok kotubuꞌ solama-lama,
bagun motampal nog daꞌdun og baldusa nog diꞌ moampun.
17 Patut pogbantugon bu potason ok Tuhan,
ok Sultan solama-lama,
og daꞌdun ok kodoksuanin bu diꞌ motongow.
Yanin ok solobuk-lobuk Tuhan.
Amin!
18 Timuti,
og bataꞌ u,
ok suguan nog wakilon ku dinikad mounut sok pidinsamaꞌ tumaluꞌ nok Tuhan pasal dinika biyan sok sosuguonin.
Pipondomu dinika ok pokpodinsamaꞌ koyon bagun unuton nu.
Imung nu nok pagon bagun kosaggaan nu nong mobais ong mga tow nok sumaggaꞌ sok kosobonnalan.
19 Ok kotombaꞌ nu sog Al-Masih sumboy mololaki bu daꞌdun og dusa nong mokosasow sok pikilan nu.
Ongon mga tow nog diꞌ mogunut dun,
bu simimoy na ok kotombaꞌ nilon sog Al-Masih.
20 Og duma dinilon yonin na siloꞌ Hemeneyus bug Aleksander nok pisagaran ku na sog Iblis,
bagun momintang ilon nog diꞌ monglaat sok Tuhan.e