Ok Sulat ni Pol song mga Moktotombaꞌ sog
GALATIYA
1
1-2 Salam-duwaa diyon diniyu mga jomaa nog Al-Masih sog Galatiya tidu sok koilugan ta dini bu dinakon.
Akon kini si Pol,
ong mokpoposampoy pasal sog Al-Masih.
Ok kopatutu mokposampoy kanaꞌ tidu sok tow,
bu daꞌ u wakiloy nong mga tow,
sugaid tidu ni Isa Al-Masih bu sok Tuhan,
og Gommaꞌ ta nong mikpotubuꞌ puliꞌ diyanin tidu sok kopatoy.
3 Bung mayan modiyon diniyu ok kolasa-kololat bug kosannangan tidu sok Tuhan,
og Gommaꞌ taꞌ bug Panghuꞌ taꞌ Isa Al-Masih.
4 Piglillaꞌ in ong nyawa nin pasal sog dusa ta bagun moawon ita tidu sok kolaatan dini sog dunya,
supaya mounut ok kolegan nok Tuhan nog yonin da sop og Gommaꞌ ta niyu.
5 Patut yanin potason solama-lama!
Amin.
Ong Mobais nok Suksugan pasal sog Al-Masih, ondiꞌ na Mopinda
6 Ok Tuhan ong migonggat diniyu moimung nok sukuꞌ in biyan sok kolasa bug kololat nog Al-Masih.
Dadi landuꞌ ok kosobuꞌ u nong modaliꞌ niyu yanin tolikudan,
bangka amu koyit sog len ponombaꞌ nok tinaluꞌ nilon,
ong mobais nok suksugan.
7 Sokaliꞌ song mattanin daꞌdun na muwal ong Mobais nok Suksugan nong mokoawon dinita.
Mitaluꞌ u kini poꞌ ongon ong mga tow nok sinumasow sok pikilan niyu,
poꞌ kolegan nilon likoon ong Mobais nok Suksugan pasal sog Al-Masih.
8 Tibuwa bilaꞌ ongon ong mokposampoy diniyu nog len pononduꞌ tidu sok pokposampoy nami tagnaꞌ diniyu,
na bung mayan pogmulkaan da yanin koyon nok Tuhan bisan pa ami atawa ong malaikat tidu sok surgaꞌ!
9 Na tinaluꞌ nami diniyu sibon,
bu taluon ku diniyu mokpuliꞌ,
bilaꞌ ongon ong mokposampoy nog ondiꞌ mounut song Mobais nok Suksugan kituꞌ nok tinabuk niyu,
bung mayan pogmulkaan da ok tow koyon!
10 Diꞌ amu mogniyat nok tinaluꞌ u kini poꞌ melegu sanglitan nong mga tow,
atawa kosuatan ilon dinakon,
na kanaꞌ,
sugaid ok Tuhan.
Poꞌ bilaꞌ migapasu nok sangliton ku nok tow,
na kanaꞌ u motud nog gulipon nog Al-Masih.
Inuwakilan nok Tuhan si Pol
11 Dadi mga koilugan,
popondomon ku diniyu nok kanaꞌ tidu song manusiyaꞌ ong Mobais nok Suksugan nok pisampoyu diniyu.
12 Daꞌ u kini kotabuk tidu sok tow,
bu kanaꞌ da sop ong manusiyaꞌ ong miktonduꞌ dinakon nini,
sugaid siIsa Al-Masih ong mikpotongow bu miktonduꞌ dinakon.
13 Bakas niyu na midongog ong mga pinginangu tagnaꞌ kituꞌ nong mimologbogu pa sog agama Yahudi.a
Piminasa u tokodoy ong mga sukuꞌ nog Al-Masih,
og ummat nok Tuhan,
poꞌ pigmuhut-muhutan ku papason ok kotombaꞌ nilon.
14 Sok kopogunutu sog agama nami Yahudi tagnaꞌ,
kilabihan ku pa ok kodakolan nong mga batuku nog gumul.
Landuꞌ na ok pomologbogu song mga gaddat tidu sok pingapuꞌ nami.
15 Tibuwa,
piniliꞌ u nok Tuhan sog daꞌ u pa bataoy,
bu tidu sok kolasa-kololatin,
inonggatin akon bagun imungonin nok sosuguonin.
16 Dadi pitongowin dinakon og Bataꞌ in bagun ku moposampoy ong Mobais nok Suksugan pasal diyanin song mga kanaꞌ Yahudi,
bu sog waktu koyon ondaꞌ u poksak sog duma nong mga tow bug olo og inangon ku.
17 Daꞌ u da sop angoy sog Jerusalem mokpotintuluꞌ song mga mokpoposampoy nong mikuna kiwakilan mokpoposampoy dinakon.
Sugaid minangoyu sog bonuwa Arab bangka u pokpuliꞌ sok siyudad nog Damaskus.
18 Puwas nok tolu tahun,
minangoyu sog Jerusalem bagun montow ni Petros,
bu dituꞌ u diyanin sog bon nok sopuluꞌ bu lima ondow.
19 Sugaid daꞌdun ong mitongowu nong mokpoposampoy nog Al-Masih nog len,
muwal da si Yaꞌkub,b
og gilug nok Panghuꞌ ta.
20 Sok sinulatu kini,
ok Tuhan ok saksiꞌ u nog ondaꞌ u pogloput.
21 Doksuꞌ minangoyu sok kobonuwahan nok Siriya bug Kilikiya.
22 Sog waktu nituꞌ,
diꞌ u pa tantu kilolahan nong mga moktotombaꞌ song mga jomaa nog Al-Masih diyon sog bonuwa Yahudiya.
23 Midongog nilon hadja ong mga suksugan nong mga tow pasal dinakon,
taluꞌ nilon,
“Ok tow nong miminasa dinita niyu tagnaꞌ bu mimagas bosiya mongladak nok kotombaꞌ ta,
mingwasihat na ningkomun pasal dun.”
24 Dadi pasal dinakon,
piotas nilon ok Tuhan.