Ok Pitongow nok Panghuꞌ diyon ni Pol
12
Kitogolan ku mogbantug bisan daꞌdun ok kopolosuddahan dun.
Sugaid posunon ku diniyu ningkomun ong mga pitongow dinakon nok Panghuꞌ.
2 Na sopuluꞌ bu pat tahun na miniyan nong misukuꞌ u na nog Al-Masih,
ongon ok pibiyan dinakon.
Mioyitu sog ikotolu pangkat nok surgaꞌ,
sugaid ondaꞌ u kosunoy bug lawasu taꞌ tokodoy atawa ong nyawa u da ong minangoy dituꞌ.
Ok Tuhan da ong mikokosun dun kituꞌ.a
3 Kiosunan ku nok kibiyanan ku kini,
sugaid diꞌ u kosunan bilaꞌ lawasu tokodoy atawa ong nyawa u da ong mioyit diyon.
Ok Tuhan da ong mikokosun dun.
4 Dangan midopotu na sok surgaꞌ,
ongon ong midongogu nok taluꞌ nog diꞌ motokkad potampalon bu ondaꞌ kumboyoy poktaluon nong manusiyaꞌ.
5 Mikopogbantugu bosiya pasal sok kibiyan-biyanan ku nong mioyitu kituꞌ,
sugaid diꞌ u meleg mogbantug pasal sog ginawa-baran ku luwal dona song mga olo-olo nituꞌ nong mokpotongow nok kolamma u.
6 Bilaꞌ mogbantugu sooy pasal song mikobiyan dinakon kituꞌ,
kanaꞌ u da sop dupang-dupang poꞌ motud ma ok tinaluꞌ u nok pinoyitu sok surgaꞌ.
Sugaid ondiꞌ u na moktaluꞌ pasal dun,
poꞌ diꞌ u meleg nong motas ok ponontong nong mga tow dinakon tidu pa song mikotongow ilon sog ginangu,
bu mikodongog ilon sok taluꞌ u.
7 Tibuwa bagun ondiꞌ u mokpotas sabap song mga landuꞌ kosobuꞌ-sobuꞌ nok pitongow dinakon koyon,
kinumboy nok Tuhan nok pogbinsanaonb ku nok sosuguon nog Iblis gantaꞌ popondom dinakon nog diꞌ u mokopokpotas.
8 Tolu kali u na pongoni-ngonihoy sok Panghuꞌ nog bung mayan awaonin na dinakon og binsanaꞌ kini.
9 Sugaid tinaluanin hadja akon,
“Jukup na tokodoy ok kolasa-kololatu dinika poꞌ motongow tokodoy ok kowasa u biyan sok kolamma nu.”
Saan na linoliyagu mogbantug nong mga kolamma u,
bagun sop lolayun motongow ok kowasa ni Isa Al-Masih dini dinakon.
10 Dadi pasal sog Al-Masih,
kosuatan ku moksandal nog lamma u bu pomosipog dinakon nong mga tow bu bisan kosigpitan ku,
binsanaon ku nong manusiyaꞌ,
atawa kobiyanan ku nong mga len nog logon,
poꞌ bilaꞌ molamma u,
diyon ku na konanam nog bogoyanin akon nok pagas.
Ok Kolasa ni Pol song mga Moktotombaꞌ sok Kurintu
11 Kodupangan ok pogbantugu kini,
sugaid pasal diniyu miimungu nong maꞌ niyon.
Dait bosiya nok sugutan niyu akon tidu song mga landuꞌ dow kopandoy nong mokpoposampoy koyon.
Poꞌ bisan daꞌdun og halgaꞌ nog ginawa-baran ku,
kanaꞌ u da mobagak dinilon.
12 Na ong mga gindanan nong mikposobonnal nok kiwakilan ok tow mokpoposampoy,
yonin na ong mga mokosobuꞌ-sobuꞌ nog gindanan bug mga mokowasa nog ginang.
Na ong mga ginang koyon,
mitongow niyu nog ininangu dunut poksabar sog bon ku diyon diniyu.
13 Pibatuku amu bug mga duma nog jomaa nog Al-Masih liyu dona sog ondiꞌ u meleg nok kobogatan amu sok kulang-kabusu.
Na bilaꞌ molaton koyon diniyu,
ampun niyu akon!
14 Ningkomun kini mikpodinsamaꞌ u mangoy diyon diniyu sog ikotolu kali.
Diꞌ u meleg nok kobogatan amu pasal dinakon,
poꞌ kanaꞌ og diyon diniyu ok pilabi u,
sugaid amu tokodoy.
Kanaꞌ u mokitabang diniyu,
sugaid bung mayan mokotabangu diniyu poꞌ mamaꞌ amu nog gumbataanan ku.
Kiosunan ta nok kanaꞌ og gumbataꞌ ong mokpotubuꞌ song mokogulang nilon,
sugaid ong mokogulang ong mokpotubuꞌ sog gumbataꞌ nilon.
15 Loliyagon ku mogbogoy diniyu nog lam nog dinakon bu bisan ok kotubuꞌ u bagun amu moawon.
Bung mayan kanaꞌ moksibikaꞌ og lasa niyu dinakon bisan mogidud og lasa u diniyu.
16 Na sogaran na,
kiosunan niyu da nok kanaꞌ u mikpobogat diniyu sok kulang-kabusu,
sugaid ongon pa ong moktaluꞌ nog inakkalan bu piglimbungan ku amu.
17 Piksinan ku taꞌ buwan amu biyan song mga tow nok piangoyu diyon diniyu?
18 Dangan pingoni u si Titus nong mangoy yanin diniyu bu piduma u diyanin og gilug taꞌ sok kotombaꞌ,
piksinan amu taꞌ ni Titus?
Tantu ondaꞌ,
pasal si Titus bug akon batuk da nok pikilan bug gawoy bu miglokotubuꞌ song mologdong nok pobiyan.
19 Kalu sog bon kini mopikil niyu nok piksugutan nami og ginawa-baran nami posunguꞌ diniyu.
Na kanaꞌ!
Sugaid sok ponontong nok Tuhan,
bu pasal sok kosolobuk nami sog Al-Masih,
miktaluꞌ ami mga kolasahan,
nog daꞌdun og gawoy nami nog len,
luwal da mokpogot nok kotombaꞌ niyu.
20 Pasal ok kondokan ku bilaꞌ matongu diyon,
diꞌ u amu motongow monginang nong mamaꞌ nok kolegan ku,
bu diꞌ niyu sop motongow og ginangu mamaꞌ nok kolegan niyu.
Sunoy pogdatongu sok tumpukan niyu moktotombaꞌ,
ongon ong mga moksuwal-suwal sok kodumahan niyu,
mogdalu,
mogboluꞌ,
moglibak bu mogabbu.
Kiondokan ku nok sunoy ongon ong mga momabaꞌ-babaꞌ bu monasow,
bu ongon ong mokpikil hadja nog ginawa-baran nilon.
21 Kiondokan ku nok kosipogan ku sok Tuhan bilaꞌ mokpuliꞌ u diyon,
bu madap ita niyu na.
Poꞌ mosolag ok korukkaan ku bilaꞌ daꞌ pa poktowbat ong mga tow nong mikodusa tagnaꞌ biyan sok pokpoduhul nok konapsuhan nilon,
moginang ginis-ginisan nong mokoliksok,
bug mga ginang nog landuꞌ na mokosipog.