Si Pol bu ong mga Mikpobaluꞌ-baluꞌ nong mga Mokpoposampoy
11
Maap niyu dona akon bilaꞌ moktaluꞌ u ningkomun nong mikaan nok kodupangan.
Poktiggol amu suusa dinakon!
2 Mibatiku og landuꞌ nog lasa nok Tuhan diniyu,
saan na mogbantoyu ok tumpukan niyu moktotombaꞌ bagun daꞌdun ong mongagow diniyu tidu sog Al-Masih.
Poꞌ og lam niyu moktotombaꞌ mopononggiꞌ song molissin nog budjang nog jinanjian ku pokawingon sog Al-Masih.a
3 Sugaid kondokan ku nok sunoy koakkalan amu mamaꞌ nog inakkalan si Apuꞌ Hawa nong mamak song masa nituꞌb,
bu mosimoy ok pikilan niyu bangka amu kobolong song mosutsi bu ikhlas nok kopoksolobuk niyu sog Al-Masih.
4 Poꞌ bilaꞌ ongon mangoy diyon og duma mokpoposampoy nok selen ok ponintuluꞌ nilon pasal ni Isa tidu sok ponintuluꞌ nami,
potiyangon niyu ilon moktonduꞌ.
Bu mipodinsamaꞌ niyu tabukon og baluꞌ-baluꞌ nog ruh nok kanaꞌ og Ruh nok Tuhan,
sampoy na ok suksugan nok taluꞌ nilon nong mobais,
sugaid selen tidu sok pisampoy nami.
5 Sok ponontongu diꞌ da lumiyu dinakon ong mga mikpobaluꞌ-baluꞌ mokpoposampoy kini nong mokopandoy dow tokodoy.
6 Bisan motud nok kanaꞌ u mopandoy moktaluꞌ sok kodakolan nok tow,
ondaꞌ u kobusoy nok kokosun.
Pitampal kini diniyu bisan ponoy sog lam nok pognasihat nami.
7 Sok ponabut niyu og dusa taꞌ nong mokpobabaꞌ u bagun amu potason?
Poꞌ mikposampoyu diniyu nong Mobais nok Suksugan nok Tuhan nog daꞌdun og gastu niyu dun.
8 Tinumabuku nok kotubuꞌ-tubuan ku tidu song mga duma nog jomaa nong moktotombaꞌ bagun ku amu poktolagadan.
9 Sog bon ku diyon diniyu,
kanaꞌ amu kibogatan nok kulang-kabusu,
poꞌ ong mga koilugan ta niyu nong miktidu song Makedonya ong migbogoy dinakon nong mga kogunahan ku.
Dadi ondaꞌ u sibon pokpobogat diniyu,
bu ondiꞌ u monginang dun loma-dinglag.
10 Daꞌdun sok polibut niyu sok probinsiya Akaya nong mokopolotaꞌ nok taluꞌ u nog daꞌ u pongoni nok tabang diniyu.
Og Al-Masih ok kosobonnalan bu dini yanin dinakon,
yanin ok saksiꞌ u nong motud ok taluꞌ u.
11 Na sunoy pikilon niyu nok saan diꞌ u mokitabang diniyu pasal kanaꞌ u amu kolasahan.
Kanaꞌ koyon motud.
Kiosunan nok Tuhan nok kolasahan ku tokodoy amu.
12 Sugaid pagga tinumabuk ong mga mokpobaluꞌ-baluꞌ mokpoposampoy koyon nok tabang diniyu,
podayunon ku og ginangu nog diꞌ u mokpotabang diniyu bagun diꞌ ilon mogimakat dun.
Poꞌ sunoy mogbantug ilon nog batuk ok poktolagad nami bug nilon sok Tuhan.
13 Ong mga tow koyon ong mga mikpobaluꞌ-baluꞌ nong mokpoposampoy,
ong mga mokolimbung nok sosuguon nong mokpobaluꞌ-baluꞌ motimaluy nong mga mokpoposampoy nog Al-Masih.
14 Kanaꞌ da ma sop koyon mokosobuꞌ-sobuꞌ,
poꞌ bisan tanan og Iblis mokotimaluy nong mosahaya nong malaikat.
15 Saan na kanaꞌ mokosobuꞌ-sobuꞌ nong mokpobaluꞌ-baluꞌ da sop ong mga sosuguonin moginang nong mologdong.
Sugaid sok kodoksuan,
tabukon nilon ok tumbas mounut song mga ginang nilon.
Ok Poksandal ni Pol sok Pokposampoyin
16 Dadi taluon ku puliꞌ nog diꞌ niyu pikilon nok solobuku nog dupangon.
Sugaid bisan mamaꞌ niyon ok ponontong niyu dinakon,
pongonihon ku diniyu nok kumboyon niyu na akon mogbantug bisan dona mikaan.
17 Song motudin ok taluꞌ u nok pogbantug kini tidu sok pikilan ku,
kanaꞌ sinuguꞌ nok Panghuꞌ,
sugaid miktaluꞌ u mamaꞌ nog dupangon.
18 Pagga modakol ong migbantug pasal sog ginang nog ginawa-baran nilon mounut sog gaddat nong mga tow sog dunya,
akon kini mogbantugu da sop.
19 Sunoy tolimaon niyu da ok taluꞌ u diniyu poꞌ pagga modalom ok kokosun niyu,
migloliyag amu bayuꞌ in monginongog song mga modupang nok tow.
20 Poꞌ sinandalan niyu bisan migabbu ong mga tow sog gadapan niyu,
pigbayaan amu,
pingagow og gartaꞌ niyu,
piglimbungan amu,
atawa bisan sumpilingon ong muluꞌ niyuc.
Og lam niyon mikpotiyang amu.
21 Mokosipog dinami moginang mamaꞌ nok pinginang nilon diniyu,
bu diꞌ nami tokodoy koyon mogaus.
Tibuwa bilaꞌ mogaus ilon mogabbu sog ginawa-baran nilon,
na akon sooy,
mokogausu da sop moginang dun bisan kodupangan na ong mamaꞌ nini kini.
22 Mga Ibranid taꞌ ilon?
Na akon sooy!
Mga tow Israel taꞌ ilon?
Na akon sooy!
Mga ponupuꞌ taꞌ ilon ni Nabi Ibrahim?
Na akon sooy!
23 Mga moktotolagad ilon taꞌ nogAl-Masih?
Mamaꞌ u nong mogbunog sok taluꞌ u kini,
tibuwa labi u pa tidu dinilon!
Labi pa ok tiksaꞌ u sok poktolagadu tidu dinilon,
lolayun ku mopirisu bu poglamboton,
bu mohumu agon-agon ku na matoy sabap sok pomologbogu sog Al-Masih.
24 Lima kali u na ponanamoy nok tolu puluꞌ bu siyam lakpos nong mga salu bangsa u Yahudi.
25 Tolu kali u kolambot nog lolambot nong mga tow Rum,
bu insan ku binatue.
Tolu kaliꞌ u pokobiyan nong milonod ok kappal nok sinakoyan ku,
bu insan miglantung-lantungu sog dagat sog bon nok sogobi bu sondow.
26 Song mga modakol nok kipanowan ku,
sog diyalomu nok komulahan song mga kosubaan bu sok komulahan nong mga tow polongapaꞌ.
Piksipihan ku mulahon nong mga salu-bangsa u Yahudi bu mga kanaꞌ Yahudi.
Sog diyaloman ku nok komulahan sog ayin-ayin bonuwahoy,
song mga lungsud bu sog ginlupaan mimala,
sog dagat bu song mga mikpobaluꞌ-baluꞌ koilugan sok kotombaꞌ.
27 Kibiyanan ku lolayun ok tiksaꞌ bug boloy,
bu piktiggolan ku nok kulang ok tulugu.
Piksandalan ku ok kuwow bu gutom.
Sumolingka daꞌdun ok kan ku.
Kitigdowan ku poꞌ kulang ok ponapotu.
28 Bu kanaꞌ hadja koyon,
mikkosusahan ku da sop gondow-gondow sok pogipat nog lam nog jomaa nog Al-Masih.
29 Bilaꞌ ongon ong molamma sok kotombaꞌ,
misusa u pasal sok kolamma nilon.
Bu bilaꞌ ongon moyit sok kodusahan,
landuꞌ ok sakit-atoyu dun.
30 Mopoku mogbantug,
sugaid bilaꞌ kotogolan ku,
bantugon ku hadja olo-olo nituꞌ nong mokpotongow nok kolamma u.f
31 Mikokosun ok Tuhan,
og Gommaꞌ ni Panghuꞌ Isa nog ondaꞌ u pogloput.
Yanin ok pudjihon solama-lama.